I was made in Mizoram

Thawmhnaw manah intodelh rawh!

2010-12-17T00:14:00.000-08:00

Chhungkaw khawsak harsa ve ang reng tak atanga seilian anih-na laiah Masi thawm-hnaw a neih loh châng a tlem hauh lo tih sawiin TBC Zaithanpuia chuan, "Tun hnu-a ka ngaihtuah kir leh hian nu leh pate kha kan va lo timang-ang nasa dawn mange aw ka ti thin.
“Kan duh duh kan dil a, kan ngen a, nu leh pate chu engkim titheiah kan ngai nghet tlat a, harsa tak chunga thei leh thei loa min lo buaipui thinte kha tun hnu-ah hian ka hrechhuak thar nasa hle a ni," a ti.

Mahni thawhchhuah ngeiin aw!
"Kum 18 kan tlin tawh chuan mahni pawhin in-hlawhfa chungin sum a tuak theih a, thawmhnaw hak tur thlengin nu leh pate dil buai ngai miah lovin a thawh chhuah ve theih a ni tih hi mimal tak pawhin ka hrechiang a. Nu leh pate'n min lei sak thei mahse, mahni thawh chhuah ngeia thawmhnaw hak tur lei hi a zahawm a, mi puitlinga insiamna hmanraw pawimawh tak pawh a ni.
“Mahniin kan thawk chhuak anga, kan buaipui bawk anga, chu taka chu kei pawhina ka ngaihsan em em pawh a ni," tiin nizan khan Zo rimawi khawvela entawn tlak mi chhuanawm kan neih-te zinga mi TBC-a hian a sawi.

Thim lalkulh thiah ngei tumin enthli thlai

2010-12-17T00:07:00.000-08:00

Engvangin nge Mizo thalaite’n Setanic nih an châk?
* Mihring tihtheih loh thiamna leh theihna (supernatural power) neih châk vang
* Star zâwng apiang an neih theih thin vang
* Ruihtheih thil zuk leh hmuam, a vir tawk leka an hmuh theih zel vang
* Nu leh pa lak atanga an beisei an dawn ngai loh vang

December 15, Nilai zan 8:30 vel khan a thiantenen Mualpui kawng lam en thlithlai turin an inbuatsaih a, helai hmunah hian Setan-a be thinte an awm avang leh hmun fai lem lo tak nia sawi thin a nih bawk avangin Joseph Zaia leh a thian-te chuan a taka luhchilh hmâ a, a hmun hmâ vel en thli thlai tura fehchhuah an tum a. Hetiang hian thil awmdawn sawi fiahna a nei.

"Helai hmun luhchilh tum hian nasa takin kan inbuatsaih a, hemi pual liau liau hian karkhat chhung zet Pu K Lianthanga Centre, Sihphir-ah tawngtaina kan nei. Mi pasarih vel kan ni dawn a, thlarau thiang-hlim awmpuina kan beisei tlat a, ramhuai kan hlau lo. Rebecca Brown leh Ellen G. White te pawh lo awmpui thin,Thlarauthianghlim hian min awmpui kan ring a, thlarau sualin min khawihnat ka ring lo, a hmun hi luhchilh tak tak kan la tum lova, Joshua leh Caleb ang deuh khan en thlithlai kan tum rih ang," tiin Joseph-a hian a sawi.

Joseph-a hi hun rei tak atang tawhin Social Front-ah a theih ang tawka inhmang-in, Setanic chungchangah phei chuan tawn hriat a ngah hle a, a subject buaipui berte zinga mi anih avangin chhuak hmasa lamah pawh khan Asia khawmualpuiah Setanic chungchanga Mizoramin dinhmun pahnihna a hauh mek tia a sawi phei chuan ngaihven a hlawh a, internet lamah pawh sawi leh khel zui a hlawh hle a ni.

"Tun dinhmunah chuan thalaite zinga Setanic an nihna chhan langsar berah chuan- Mihring tihtheih loh thiamna leh theihna (supernatural power) neih châkna vang leh awhna avang te, an star zâwng apiang an neih theih vangte, ruihtheih thil- zuk leh hmuam a vir tawk leka an hmuh theih zel vang te, nu leh pa lak atanga an beisei an dawn ngai loh vang te, mihring duhdan anga Pathian a thawh loh vanga min chhang thei lo Pathian biak ai chuan, tia thil dang biak duhna te hi a ni a.
“Heng thil te hian thalai beidawng leh beidawng lem lo te pawh nasa takin a hrut tan mek a ni," tiin Joseph-a hian thim thuneihna cho-chhuak tura an fehchhuah hma-in a sawi.

MAGDALENE inzawmkhawm leh ring tlat!

2010-12-16T23:56:00.000-08:00

(Scavenger Project band)
An buai tih chu ka hre tho a. Amaherawhchu phai lamah gig pahnih vel nei tura an inbiak fel avangin a hmingin ka pui mai a ni. Chutianga vocalist nghet anga awm tumna engmah ka nei lo. Steward leh Magdalene te hi inzawmkhawm leh se ka ti ngawih ngawih a, member dangte hnenah pawh vocalist thar la reng reng suh u tiin ka hrilh a ni: Lungmuana

Tunlai mipa zaithiam kan neih zinga 'class' sâng tak mai, a aw leh thiamna pawh hnam dang hovina an dahsan em em ni bawk, Lungmuana (Ex-Incarnation & Scavanger Project) chuan Zo rimawi khawvela band tha ber te zinga mi Magdalene buaina hian mimal tak pawhin amahah nghawng a nei tih a sawi a. A thiante ve ve an nih avangin an inkara inremna tha tak a awm leh theihnan theih tawp a chhuah a ti bawk.
"Steward-a a awm loh takah chuan min rawn sâwm a, harsatna a awm mek tih hrereng chungin ka lut a ni a. Mahse, chutiangin ka ngai ve hauh lova, vocalist nghet ka ni lova, ka pui a ni mai a.
“An harsatna chungchang hi zuk hriatpui vek lo mahila, an inzawmkhawm leh hi ka duhsak em em a, an mutan chungchangah pawh sawi theih ka neih loh rualin, Steward nen pawh kan inbe reng thin a. Magdalene hi an inzawmkhawm leh ngei ka ring tlat a ni," tiin he band-a zaipu anga awm mek, Lungmuana hian a sawi..
Hetih lai hian, tunhmâa a lo tal tawhna thin, Incarnation band an kal hleih theih tâk lovah chuan kumthar lam hian band thar din tumna an nei mek tih sawi bawkin, "Nia, Incarnation han tihchhoh leh pawh kan châk a, kan phur bawk. Amaherawhchu, sawi chauh a ni a, a taka 'tih' a awm bawk si loh chuan tihngaihna a awm lo thin khawp mai.
“Kumthar hian Pathianin rem a tihchuan band thar neih theih kan inbeisei a, engmah sawi chian ngam a ni lo na a, tumna erawh a awm mek," a ti bawk.

Zawlaidi (alcohol content) tam mah mah ti

2010-12-12T02:15:00.000-08:00

Tunah chuan sorkar hriatpuina-in kan rui sup sup tawh a, Masi a hnai tawh em em lehnghal. Engtin tak hmang hlawm ang i maw! Zaithiam duhawm tak, Rosy K Remsangpuii chuan a hminga ‘Zawlaidi’ an phuaha hi tha a tih leh tih lohna hetiang hian a bunchhuak.

ZAWLAIDI THAT NA
Mizo kut hnathawk te an hah man an tel a, hlawk tham a hmâ an zauh thei hi ka lawmpui em em a. Tin, Mizo pawisa hnam dang kuta luang lut lova, kan Mizopui te kuta kan chhung lut hi thil lawmawm takah ka ngai.

ZAWLAIDI THAT LOH NA
1) Alcohol content a sâng, 14% a ni. Beer- ah hian 7% te alcohol content a awm a, tam tak lawmah tla in, ruih nan an hmang mek. Hei bak baka zu a awm thei chuang dawn em ni? Alcohol content ber a san tawh ber chuan? KTP/TKP/SAY/PYD etc. ten an phalraina hi remchanga la in, ruih nan an hmang hi rilru lam thikthu alo chhe duh khawp mai.

2) Naupang kum tlinglo leh kum tling tir ten awlsam takin ruih mai na chance an hmu hnaivai a, hmanni-ah skul naupang uniform ha pathumin Zawlaidi bottle 5 an lo khai a, an lei/neih chhan awm ang ka han ngaihtuah a, puar nana an tih chu ka ringlo a, an phur khawp mai lehnghal a, a rilru natthlak ka ti! Nu leh pate ngaihngam taka kan awm laia fate khawilaiah emaw in terek a, an han rui tur chu! Nu leh pate i fimkhur ang u khai.

3) Acidity a tam khawp mai! Mi in regular takin kum hnih khat in ta se, Ulcer chu a nei hrim hrim. Zawlaidi in vanga pumna an sawi pawh ka hre zauh zauh.

4) Mi in zu diktak, local/ a sen chi etc. an ruih a, an man thin naah khan Zu pangai pawh lo rui mahse Zawlaidi ka in an tih miau chuan tu han in khap theih tak tak a ni tawh lo. Ni e, kan va sawi phak chu a awm lo teh meuh mai, mitin mahni hi kan pawimawh ber a, khawiah pawh awm ila zu zuar inah pawh, kan zahawmna humhim hna chu keimahni a ni a. Mahse naupang te te te’n an ruihpui mek ta mai hi keichu pai dam harsa ka ti a, en liam mai mai chi ni in ka hre lo.

YMA General Conferenc-ah khan tawngkam ka hriat pakhat chu, ‘Hei, keini chu sorkar hriatpui na in kan rui luih luih mai,’ an ti! Ngaihtuahna a kal thui duh khawp mai! Ti bo hul hual se chu ka tilo, ka lawmpui em em a, a siamtu te pawh, mahse lcohol content hi ti tlem tase, 5% etc vel ah. kan zia phah lon’g maw? Alcohol content hi a san avang hian kan haw haw dur dur a, lehlama khauh taka hma kan lak laiin, khan leh lamah kawng zau takin kan hawng leh si-ah ka ngai hmiah!

Mizoram Malsawmna ‘Malsawmi’

2010-12-12T02:12:00.000-08:00

Mizo film siam tawha rampâwna award dawng hmasa ber siamtu biangbiakna

North East Film & TV Producers’ Directors’ Association (NEFTPDA) bultum a, December 2-4-a, Shillong, Menghalaya-a neih zawh tak, ‘1st Regional Short Film Festival Of India 2010'-ah Mizoram aiawha tel Napolean RZ Thanga film siam, “MALSAWMI” chuan ‘Best Film Award’ leh ‘Best Director Award’ a dawng a. Kum 2011-a International Community Film Festival lo awm tur chu Mizoram-in a thleng dawn bawk.

Mizoram tihmingthatu Napo-a chuan state dang atanga film an siamte a hmuh chiah loh avangin award dawn ngei ngei a inring lem lo na a, inrintawkna erawh a hloh lo thung. Hetianga hlawhtlinna a neihna chhanah hian sum leh pai chu pakhatnaa dah lova, film thatnan theih tawp tak meuh meuh a chhuahna chuan rahtha a chhuah pui zawk a ti.

“Sum leh pai hi chu a pawimawh tak meuh mai, amaherawhchu hemi ringawt hi chuan national leh international- ah kan thlen theih ka ring chuang lo. Mizoramah award dawng mahila, rampâwnah min hriat leh chuan si loh chuan awmzia a awm tak tak lo. Kan film siam hi a tha tur a ni a, kan inpumpek tawp a ngai. Doordarshan leh sorkar department kaltlang hian sum chu a awm thin a, amaherawhchu Mizoram a pel hlei thei tlat lo maia hi ngaihtuah a ngai hle bawkin ka hria,” tiin Napo hian a sawi.
Ani hian sawi chhunzawmin, “Mizoram ringawta kan tawp chuan awmzia a awm lo. ‘Malsawmi’ film hi harsa tak chunga mahni sum leh pai senga kan siam ve a ni a, rampâwna boruak a siam theihnan tiin, English-a siam a ni a, Mizoram pâwna Mizo film, award dawng hmasa ber leh awmchhun a ni ta hi a ropui hlein ka hria. Mimal tak pawhin ka lawm em em a, National leh International-a kal zel pawh ka tum a ni,” tiin phur takin a sawi.
--------------------

"Mizo te hi lemchan thiam tak kan ni a, keimahniah hian theihna leh thiamna pawh a awm. Amaherawhchu, film kan siam te reng reng hi by-heart system a nih deuh zel avangin a hmuhnawm tur angin a hmuhnawm loh pah fova, film chan dan kan zir lohna hi a langsar em em a, chu chuan hmasawnna tur tam tak a tithuan awpin ka hria. State dangah te chuan an sorkar pawh an phur a, Film Development Co-operation’ hialte dinin, theih tawp a chhuahpui a. School of Acting leh Performing Arts-ahte zirlai intirin, an inchherchhuak a, hmâ pawh an sawn reng a ni.
Tin, Sorkar tanpuina bakah, sponsorhip te an neitha a, film-ah an tui tak tak a, an hmanraw neih pawh a changkang hle. Zir tur kan la ngah a, chutih laiin, Mizo te hi lemchan khawvelah hian tih tak takna, hmanraw tha leh sum a awm phawt chuan ‘hming’ kan chher thei tih hi rinhlelh rual a ni lo. -Napolean RZ Thanga

Steward-a’n hla inchuhna a awm mek tih pha lo

2010-12-12T02:08:00.000-08:00

Band-a a awm lai pawha solo album siam a tumna chu tunah hian a tak ram a thlenpui dawn ta niin a lang. Chutih laiin, a thil buaipui turah hian Magdalene-a a thiante puihna a dil dawn lo tih a sawi chiang a, an inthlauh thlak dan a mumal lova, hla inchuhna a awm mek thu pawh Steward-a hian a sawi.

Hetih lai hian, an inkar boruak a fel fai tawh emaw tih laia a hla phuahte an la chuhpui deuh nia a hriat avangin a rilru zawng zawng hi a la lachhuak thei lo niin a lang. “A nihna takah chuan band atanga ka chhuah khan ka sun tur ang ang chu sun zo nghalin ka inhria a. Amaherawhchu kan hla phuah ve chhun chhun te ‘band hla a ni’ tia min la chuhpui deuhna avang erawh hi chuan band ka chhuahsan hnu a, ral ve thei ta rih lo chu a ni,” tiin Steward hian a sawi.

Midang pawh an awm!
Tuna album thar tur a buaipuinaah pawh theih ang anga amah ngeiin kalpui ngei a tum dan a sawinaah a thian hluite sawm tumna engmah a neih lo tih hetiang hian a sawi. “Min duhsaktute leh thian dang, min pui thei tur an awm ve nual a. Ka thianhlui te sawm tumna engmah ka nei lo. Kan inthlah dan kha a mumal lo em a, keima lam atang chuan sawm tumna emaw an puihna ngen tumna ka nei lo,” a ti.

Hmachhawp chu...
Steward hi hlaphuah thiam tak a ni a, tarlan tawh angin, band-a a awm laia an hla larte kha ama kutchhuak deuh vek a ni. Tun tumah pawh hian Sap hla pahnih vel bak tih loh chu Mizo hla mawi tak tak, ama kutchhuak ngaihthlak theih a ni dawn a, inbuatsaihna pawh a theih ang angin a kal pui mek.

Band-a tal thang tawh anihna laiah solo kalpui tur chu a huphurh em? tia zawh-na chu, “Pathian zarah daihriat kan lo neih ve tawhna atangin huphurh hran love. Band tel lova solo album hmachhawp awma hi mimal tak paw’n chona lian takah ka ngai a, music arrangment pawh hi mahnia intodelh theih hram chu ka tum. Amaherawhchu, thian tha tak tak, Lawma (Mizo Idol) leh Mangheta (Evenflow) te bakah midangte pawh an awm a, ka huphurh lem lo khawp mai,” tiin ‘confi’ takin a sawi bawk.

BEIDAWNNA RUAM ATANGIN BEISEINA THAR

2010-12-12T02:06:00.000-08:00

Zâia rawngbawlna nei turin hmun hrang hrangah a fehchhuak a, a chhungril erawh a hul leh si. Mamawh a nei a, a tlakchhamna a hre mai si lo. A hmun a thleng a, a zai a, a tihtur a ti zo ve leh mai a. Mahse, a tawt ut ut a, a rilru a hah a, a mangang a, a tap chhuak thei si lo. Hlutei chuan a chunga thil thleng rei tak a zep tawh chu hetiang hian a sawi.

“Tleirawl chhuah tirh atang khan zaia rawngbawlin theih tawp ka lo chhuah ve thin a, mahse rawngbawlna kha ngaiah ka lo nei rei tawh hle a. Mihringin suala kan ngaih lem lo, ‘A ho lutuk’ kan tih mai mai ang chite kha Pathian hmuhah chuan ‘sual’ a ni lo thei si lo. “Bible ka chhiar ngai lova, chhiar ve chhun lahin zuk pawh tumna awm miah lovin, ka chiar liam mai mai thin a, keimahah hian ‘da’ ngawih ngawiha inhriatna ka nei bawk a, ka mangang hman hle a ni.

“Nun khawhar leh hrehawm tihruknain ka khat a, keimahin ka buai a, khawvel lama tlan ka ngam tak tak chuang bawk si lo. Ka beidawng lutuk a, heti chung pawh hian zaia rawngbawlna chu ka nei reng tho a ni. “Zan khat chu Belinda hian min rawn bia a, ‘Kei chu siamthar lehna ka chang tawh a sin,’ a rawn ti a. ‘I vannei bik hle mai’ tiin ka chhâng a. Tichuan, theih ang angin kan infuih a, tunah chuan hahdamna mak leh danglam tak mai pekin ka awm ta a, ka hlim em em a ni,” tiin Hluite hian phur takin a sawi.

Siam thar lehna a chan dawn hian room-a inchim buai ai chuan tiin, In chung lamah a chho va, fakna hla te ngaithlain, inhlan tharna a nei a. Testimony pawh a chhar belh nual nghe nghe. “A tirah te kha chuan Bible ka chhiar lai te hian kawng khar ri emaw ke pen ri ka hriat chuan Bible hi ka thukru vat thin kha a ni a. “Hei hi thla hnih vel kaltaa thil thleng a ni a. Ka tawt hle a, min hnawh ut ut tu a awm reng a, ka tah te hi a chhuak a, mahse ka tap thei bawk si lo,” tiin siam thar lehna dinhmuna inhlangkai mek, Hlutei hian a thil tawn a sawichhuak.

Driver ruih vangin Mathlenga thinrim puakchhuak

2010-12-02T23:48:00.001-08:00

Khawzawla hlawhtling taka neih zawh tak, Mizo Zaimi Insuihkhawm (MZI) khawmpuiah zaithiam hriathlawh Mathlenga chuan driver a ruih avanga hlau leh mangang tak chunga a hmun an thlen thu a sawi a. Haw lamah pawh an chuanna tur bus dirver hi zu rim nam tho a nih avanga an nupaa SUMO-a Aizawl an rawn pan tak thu a sawi bawk. A sawi lai hian, kha
thil thleng avanga a rilru natna leh a lungawi chiah lohna te thup theih rual a ni lova, a thinrimna hi a puakchhuak chiang hle. “A tirah tak chuan MZI hruaitute’n Bike keng tur leh senso ngai te min tum sak turin an sawi a. Amaherawhchu Bike ke a chhiat tak avangin Seling atangin kan nupa-in Bus-ah kan bei ta a, kan bus hi a muang em em a, kawng lakah zun ram thiara chhuk an tam em em a, dirver a rui bawk si a.
“Ka ngaihdan a ni lo hle a. Accident tâwk tawh ka nih avangin hrehrawm ka ti a, driver ngei pawh ka hrilh nghe nghe. Kawng tluanin hlau leh mangang takin kan chuang a, vanneihthlak takin Khawzawl hi kan thleng thei ta hram a ni,” tin a sawi.
Zai mite hi mimal motor-ah an chuang deuh vek a, hetianga inhnawhsa ruma bus-a chuang zaimi hi an awm lem lo nia hriat a ni. Haw dâwnah pawh thil duhawm lem lo tak a thleng thelh a. Chhuah hun tura tiha mi thenkhat an hmanhmawh lem loh avangin an chhuak lawk thei lova Hetah pawh hian Mathlenga ngaihdan a pel hle a, a tawngchhuak nghe nghe a. An chuanna tur driver hi a ruih avangin a chuang ngam ta lo a ni.
Mathlenga hian sawi chhunzawmin, “Kan kal lamah pawh khati kha a ni tawh a, haw lamah lehzel khatiang thil awm leh tura kha ka ngaingam lova, ka thin pawh a rim em em a. Tichuan, SUMO in kan rawn haw ringawt mai a ni. “Mipa ka ni a, driver chungchanga ka lungawi lohna te pawh MZI hruaitute hnenah ka hrilh hial a, MZI executive member ka ni ve a,
chutiangin hlawh leh khatiang kha engmah ka beisei lo hrim hrim. Haw lamah pawh mahnia intum chawpin kan nu nen kan haw mai a, mahse a hnu-ah MZI hruaitute’n cheng sangkhat min rawn pe a ni,” a ti bawk.

Ruati tel lova Masi hman ka huphurh hle: Vanhlupuii

2010-12-02T23:43:00.000-08:00

Natnain a tlak buak a, harsatna a tawh chhoh hmâ kha chuan unau inkawngeih em em, Vanhluipuii leh Vanlalruati te chuan Masi a lo thlen te hian hlim takin an zai a, chaw te an eidun a, thil engkim an tihnaah inphatsan ngai lovin an ti thin kha a ni a.
Nimahsela, kuminah erawh Vanhlupuii hian a tel lovin Masi a hmang dawn ta a, nizana kan inbiak lai pawh hian hrehawm a ti hle a, a huphurh hle bawk. “Kan unau hnih hian thil kan ti tam a, kan inzui tam a, In hrangah awm mahse, kan inhlat ngai lo. Engkimah kan ti dun tak meuh meuh a, a mala kan tih hi a awm ngai meuh lo.
“Chutiang khawpa inkawmngeih leh inpawh em em thin chu kan ni. Chhungte sun ve ve kan ni a, kan inhnem tawh fo thin a, amah ber a awm leh ta si lova, a hrilhhai thlak a, a buaithlak hle,” tiin Vanhlupuii hian a sawi.
Hetih lai hian, a boral hmâa recording a lo neih thlap tawh gospel album chu cheithat mek niin, kumina tihchhuah hman beisei a nih laiin, harsatna neuh neuh a awm bakah Masi te a lo hnai tawh bawk nen, kum thar tir lama tlangzarh thei tura
kalpui mai chu tha zawkin an hre ta a ni.
“Masi hla te a ni bawk si lova, chuvang chuan han tihchhuah tawp mai hi a hunin a zir chiah lova, kumthar lamah tichhuak zawk mai ila, kan ti a.
“Tlangzarh theih mai tura peihfel thawkhat a nih laiin, tlema zâwng siam that ngaite a awm a, kumthar tir lam kan tinzawn ta a ni,” a ti bawk.
----
July 2, 2008 chawhnu lamah khan kan In-ah lo lutin, “Ka u, Many Happy Returns of the Day,” tih pahin Swedish Cut Glass mawi taka fun le Audio CD min rawn pe a. A CD hmalamah chuan,

Dearest Ka u,
A small present
For your birthday
Ruati

tih a ziak a. “Kum 2004-a kan record tan a ni a, release mai peih sa diam tawh a nih kha,” tiin hlim takin ka birthday min rawn lawmpui a; kha mi ni khan he Gospel album hi a tel lova release a ni ang tihngaihna ka hre pha lo.
A hun hnuhnungah chuan, “lalpa, min tihdam china ka hla duh ber, Isua chanchin mawi hi a ni,” tiin hlim takin a zai thei ta a ni. “thih hi ka cho e, ka châk e, tihna ni lovin, he natna hian thlanmual lamah min hnuk lui tlat a nih chuan lungawi takin ka liam mai ang,” tiin min hnem a ni: Vanhlupuii

A nunhlui lanna en ngam lo

2010-12-02T23:36:00.000-08:00

A khuh hAwnnA: Lengzem huang atanga Fakna huanga a insuanluhna chuan Zo rimawi khawvel a barakhaih hle a. Tuipui ral ram hla tak atang pawhin lawmpuina leh uipuina a inzat nawk nghal a, Zomuanpuii boruak lenzual chiang taka tarlan a ni nghal bawk. Hun leh ni a lo inher a, siam thar lehna changte zingah pawh tuilai rap leh awn lam nei deuh an awm nia sawi mek lai hian, Zomuanpuii erawh a thutluknaah a chiang a, huaisen taka hmalam pan zel a tum.
Sum leh pai chungchangah tunhmâ angin lut zut zut tur awm tawh lo mahse, a chan tawkah a lungawi hle tho. Chutih laiin, demand channel-ah a zai lo chhuah chângte hian a nunhlui vui liamna hla hlui te a nih avangin a en tha ngam lova, a hmet sawn daih thin.

Zomuanpuii chuan, “Mihring mihrinna te hi a lo chhuak lo thei lova, lunglen chângte pawh ka nei ve fo thin. Hman zan phei chu ka casette/CD te kha ka en vawng vawng mai a, ngaihtuahna pawh a vak thui hman hle a ni.
“Demand channel-ah ka zai a lo chhuah te hian ka en tha ngam ngai lova, a tawp thlenga ka en hi ka hre leh tawh lo. Ka hmet sawn nghal vat thin a, ka en châk lo te pawh a ni ang. Lengzem hla ka sa lai hmuh ve reng kha tha berin ka hre lo a ni,” tiin a sawi.
Central YMA khawmpui, Lungleia neih zawh takah pawh khan a tawp zana zai tura ruat a ni a. Hemi tum pawh hian a inngaihtuah nasa hle. Tunhma te kha chuan lengzem hla hot tak te sa-in, boruak lian tak a nei thin kha a ni a. Tunah erawh a danglam zo ta.
“Ka thiante’n hla hot tak tak an sa a, boruak pawh a nuam a, mipui lamin an zawm tha em em a. Ka zai hun a lo thleng ta a, fakna hla ‘cool’ em em mai ka sa ta mai si a, kum hmasa te ka ngai lutuk a, a châng hi chuan mihring deuhna rilru hi a lo chhuak thin a, a hrehawm ve thin khawp mai,” a ti bawk.
Fakna huang a luhchilh dâwn pawh khan a rilru a insual ve nasa hle a, chhungte lam atanga duhsak taka fakna hla sa tura nawrna a dawng reng bawk nen. A han ngaihtuah a, kha leh chen an chaw bel lo ni thin kha a ni a, engtinnge eizawnna a neih zel dawn tih chu a ngaihtuahnaa lian ber a ni lo thei lo.
“Thil mak deuh mai chu, khatia camp-a ka lut hmâ kar 2-1 velah khan restaurant kan siam a, hemi hmang pawh hian eizawnna a lo inhawng reng tih kha ka lo hre reng reng lo mai a, ka pianthar hnu khan A remruat a ni tih ka hre ve ta chauh a ni,” tiin inchhung bungrua chi hrang hrang (superware) hmanga sumdawnna bei mek, zaithiam duhawm, Zomuanpuii hian a sawi bawk.

Maldives panin Dr. Luke inkapchhuak leh dawn

2010-12-02T23:28:00.000-08:00

Mizoram atanga rampawn (foreign)-a zai tura band zinchhuak hmasa ber record an siam a, nikum khan hlawhtling takin, khawvel hmun hrang hranga mite’n chawlh hahdamnana an hman lar berte zinga mi, Maldives-ah an inlan a. Lawm an hlawh a, an kham loh em avangin kuminah pawh Dr. Luke hi an rawn sâwm nawn leh a, rokhawlhna a awm lem loh chuan December 22, Nilaini hian Aizawl chhuahsanin, Maldives an pan dawn a ni.

Hemi chungchang hi sawi chiangin, Dr. Luke khuangpu Jerome chuan, “Nikumah khan ‘Kumtharah pawh kan la rawn sâwm leh ang che u’ min ti a, tawngkam tha mai maiah kan ngai a, mahse min rawn sâwm tak tak a, keimahni lam zawk hi kan inpeih loh avangin thuchiang kan hrilh thei lawk lova. “A chhan pakhatah chuan guitarist Mamuana hi Delhi-a lehkha zira a awm vang a ni a, kan han sawi ho tak tak hnu chuan kal leh ngei tha kan ti a, tichuan kan zuk tichiang (confirm) ta a ni,” tiin a sawi.

Hetih lai hian, inpuahchahna erawh an nei tha thei meuh lova, band member an kim miau loh avangin mahni awmna hmunah a remchandan ang angin an zir a. December 18 hian Mamuana hi a rawn thleng thei emaw a ni dawn a, Aizawl-ah hian ni hnih vel bak zirna hun tak tak an nei hman dawn niin a lang lo. Hei vang hian an sak tur leh zir turte chu Delhi-ah te an zuk thawn thla a, chutiang vel chu tuna an dinhmun chu a ni.

“Kan inpuahchahna a nep khawp mai. Tun hrihah chuan chuti tehchiama inbuatsaihna nei thei pawh kan ni lova, band member kan kim miau loh avangin a theih ang angin kan ti ve hram hram a ni. Kawng lehlamah erawh chuan lawmna tur kan nei thung a.
“Joseph-a (Ex- Realistic) in tun tumah hian min tawiawm thei dawn a, kan lawm tak zet. Feli hi a hah thei em em a, zankhatah darkar 4 inzawm zatin a zai thin a, Joseph-a’n min puih theih dawn avangin kan hahdam deuh tawh ang,” a ti bawk.
Dr Luke hian fakna hla bakah, instrumental turu tak tak vawrhchhuah an tum a, an zai leh rimawi ngaithlatute hian an music play hi an tuipui a, an ‘enjoy’ hle bawk. Mizoramah ‘Original nen a inang em, a sa dik em? Guitar zut a inang em?” ti-a lo khaikhin duah ang chi erawh Maldives-ah hian a awm ve lem loh avangin hahdam takin an che thei a, chu chu nuam an tih em emna chhan pawh a ni.

Dr Luke te hi an manager, David Hlawndo hovin an fehchhuak anga, an tum anga an awm thei a nih chuan January 3 hian Mizoram panin
an rawn let leh ang.

Mizoram aiawhin Delhi-ah ‘Kroashia’ fehchhuak dawn

2010-11-30T23:09:00.000-08:00

A la rei lem lo. Kroashia band hi April, 2010-a indin an ni a, Croatia ram hming chawia phuah an ni. 2010 Mizoram University Rock Fest-ah khan inlanin, runners up an ni nghal thei. Tunhnaia Mamit leh Ngopa chhiat tawkte puala ‘charity concert’ -ah pawh khan inlan lehin, mipui lawm an hlawh hle a. A bik takin an vocalist Sarah-i hian lawm a hlawh lehzual a, a ‘aw’ chak zia kha hahip tak meuhin an sawi.
New Delhi-a December 5-a neih tur, “7 Sisters Rock Festival” -ah Mizoram aiawha kal tura thlan an ni a. Inbuatsaihna pawh a kaltluang hle. Chutih laiin, kalna man turah harsatna an neih deuh hlek avangin tlawmngaia pui (sponsor) thei awm se an ti ngawih ngawih a. Mi tlawmngai leh rimawi lama tui mite tanpuina an ngen a ni.
Kroashia band member te hi Vocals- Sarah; Guitars- David, Bass-Amaria leh Drums-Ngaihte-a te an ni a. Internet-ah an hla demo te pawh ngaihthlak theih turin an dah tawh nghe nghe a. Sawi fiah lem lovin, mahnia a taka fiah chi a ni zawk.
Mizoram aiawha fehchhuak turte hi sum leh pai bakah tawngtainaa tanpui an mamawh em em a ni.

December 4 zan ‘Hard Rock Nite’

2010-11-30T23:08:00.000-08:00

Nikum lam khan AR Lammual-ah Hard Rock Night hlawhtling takin hman a ni tawh a, kumin pawh hian neih a ni leh ang. Concert i en a, i hla sak thiam loh an sa a, i telve tak tak thei lo, mahse Beetel Phones hard Rock Night-ah chuan i hla sak thiam tam tak an rawn sa dawn. December 4 zanah.
Nep lo tak an ni ang - Boomarang, Stacy’s Penitence leh Freddy’s Nightmare. Heng band pathumte hi tunlai Mizorama kan band neih zingah chuan a chhuanawm ber berte an ni. |hangtharte rimawi khawvelah ngat phei chuan a thleng sang ber pawl an ni awm e. India ram hmun hrang hranga rock show-ah pawh a neu lo ber berte an ni, an lawmman lak tawh thleng thleng chuan sawi lovang.
Nikum lamah pawh 1980s chhova rock rimawi meichher kengtu band lartak tak hla herlum leh a ni a, entu te pawhin an sukpui nasa hle a nih kha. Kuminah pawh 1980s leh 1990s chhova hla lar ber berte phawrhchhuah leh a ni dawn a, a entu nawlpuite’n kan lo zawm ve dual dual theih tur ho hla thlan a ni dim diam tawh a, band inlan turte hian an zir tluk tluk tawh.
Kumin atan hian song list upgrade a ni a, hla hlui, rock rimawi hla ropuite tihlu belhtu atan leh thangthar naupang zawkte’n Hard Rock Night nuam zawka an hman ve theihnan tunlai rimawi tlem belhchhah a ni a, chung zingah chuan Lady Gaga, My Chemical Romance, Tokio Hotel hlate rock rendition-a sak an ni dawn a.
Guns n Roses, Queen, Bon Jovi, Ozzy Ozzbourne, Judas Priest, Aerosmith, Metallica, Iron Maiden, Poison, Avenged Sevenfold,Ugly Kid Joe, Mr Big, My Chemical Romance, Van Halen, CCR, White Snake, atanga hla hit thlan khawm chauh sak a ni bawk ang. Heng bakah hian Lady Gaga leh Kesha hla rock renditiona sak a ni bawk ang. Intihhlimna hun leh inelna hun chi hran hran hman a ni bawk ang.
North East a sound nei tha ber Active Sound, ‘Das Line Array’ hman a ni leh dawn a. Kumin hian Lammual- ah artificial grass an phah avangin December 4, 2010 hian Vanapa Hall-ah inhnawh a ngai dawn a ni. Beetel Mobile Phone Hard Rock Night hi Beetel mobile phone sponsor a ni a, Event Solutions huaihawt a ni.

‘Lar’ na phenah hian thil tam tak a awm: Mimi Lalzamliani

2010-11-30T23:06:00.001-08:00

A khuh hawnna
Tungchhova kal mihringte zingah mi hriathlawh leh 'lar' nih duh tlat lo hi an awm lo mai thei a, khawvel ram zau zawkah pawh hriathlawh leh lar duh vang-in nunna hial chân ta te pawh tun thleng hian sawi tur an awm. Mizoramah pawh kawng chi hrang hrang hmangin hun leh tha, sum leh pai te senga kan lo bei ve chiam pawh hi thil pangngai tho a ni.
Chutih laiin, Mizo te hi lar zo lo leh lar chhiat pui anga sawi fo thin kan ni thung. A chhan tam takah chuan lar-na hian sum leh pai, ruihtheih thil leh thil tha lo dang te a chhawm tel ve fo thin vang a ni awm e.
Hemi chungchangah hian Icon star, chuan hetiang dinhmun thlen hi thil namai a nih loh thu te, fimkhur reng ngai leh, 'lar' phenah thil tam tak a awm thu nizan dar 7:30 vel khan hetiang hian thalai times a hrilh.
"A châng chuan, tu khaw kha-in min hriat lem loh hun te kha ka ngai vawng vawng thin a, a hminga mi hriat kan hlawh hnu-ah hian thil chi hrang hrang, tam tak tak hi kan nun-ah a thleng a. Inchhir rum rum chângte pawh ka ngah mai.
“Chutih laiin, kawng lehlamah chuan chhungkaw khawsakna leh mimalah te thleng pawhin malsawmna tam tak kan dawng bawk a, lawmna tur tam tak a awm tho. He thil pahnih hi chu sawi fiah thiam harsa tak a tlingin ka hria.
"Lar-na phenah hian thil tam tak a inphumru a, tunhmâ zawng aia kawng engkima inuluk a, inven a, invawn te hi a ngai nasa tawh em em a. Thlemna thlengin tunhmâ zawng aiin a letin a tam tawh bawk. “Ka ngaih ve dan mai maiah chuan, hranghlui te kha chu thuhran ni ta se, tunlai thangthar te hi chuan 'lar' hi an thiam tan viau tawh em aw? ka ti a, hmasawnna chu a awm chho ve zel chuan ka hria," tiin Mimi (Icon) hian a sawi.

A tel lova "Masi" hman hrehawm

2010-11-19T08:38:00.000-08:00

Nikum khan Masi hla thlan hlawh berte zinga mi a ni a, “I tel lova Krismas” tih chu chhan hrang hrang vanga intawng leh inhmu thei lo te inkarah a tla na lehzual a.
Henry Renthlei hian a thlawh fuh bawk si a, mi tam tak rilru a hnem rualin, tam tak tan erawh mittui kothlatu a ni a. Masi ti ‘masi’ lehzualtu tih mai loh chu sawifiah pawh thil harsa
tak a tling reng a ni.

He hla hi Henry-a hla lar tak, “I liam mai tur hi” tih phuahtu, R.Lalduhawm hla siam tho a ni a, a tirah chuan hetiang em ema miin an hlut a ring pha. “Hla kan han zir a, recording kan neih chhoh lai khan a thawnthu-ah ka cheng a, ka rilru zawng zawng-in ka sa a. Sa tha inti lem lo mah ila, min duhsaktute hnen atangin fakna ka dawng ve nual a, a lawmawm ka ti a. Rin phak bak tak takin thlan a hlawh ta mai kha kan lawm em em bawk a ni,” tiin Henry hian a sawi.

Tleirawl chhuah tirh atanga star tu ngah ve thin tak a ni a, Masi a lo thlen dawn hi chuan ngaihzawngte nena hman dun loh maite hi a hlau hle thin a, hmanpui châng a neih rualin, a tel lova hman pawh a nei fo.

Sawi chhunzawmin, “He hla hi chhan hrang hrang vanga Masi hmang dun thei lote tana siam a ni a. Kei pawhin ka hrethiam ve hle chuan ka hria. A chhan chu, hmanpui kum te a awm angin, khawhar tak leh lungleng em em maia hman kumte a awm thin bawk a. Tute emaw tel lova Masi hman hrehawm zia leh retheih thlak zia hi hrechiang ve hlein ka inhria,” a ti bawk.

Kum 2014-ah chuan 'Rap' in Mizoram a hap hneh hle tawh ang: Michael M Sailo

2010-11-19T08:28:00.000-08:00

A fapa, Brooklyn Lalsangkima-a’n a hniak hnung a zui loh paw’n Pathian zarah a seilian chho zel a nih chuan, rimawi lamah a mikhual dawn lo hle niin Michael-a’n a sawi a. A len hunah chuan zai lam ni lova, thil danga a tui a nih pawhin lungsi taka theih tawp chhuahpui an tum tur thu leh, 2014-ah chuan Rap music-in Mizoram hi a hap hneh hle-a a rin thu a sawi.

Danglam lo tur rimawi
“Ka hniak hnung a zui leh zui loh tur emaw, ka music video siam tawhte pawh a la rawn hmu ve ngei ang tih lam chu ka ngaihtuah lem lova, tunah hian a nu, SP-i’n music video a buaipui mek a, chumi zawhah siam ka tum ve a, chutah chuan Brooklyn hi a lang ve ngei dawn a, music video-ah ngei hian a takin a inlan zawk dawn a ni,” tiin Michael- a hian a sawi.

Sawi chhunzawmin, “A nu leh pa hi zaimi an nih vang aia zaimi ni ngei ngei tur chuan kan beisei lem lova. Mahse, rimawi ri reng thin kara seilian a ni a, zing dar 2-3 ahte hian headphone nen hla mawi tak, cool bawk si, ri riai riai hi a ngaithla thin a, rimawi-a a inchiahna a rei tawh a, rimawi nen hian thenhran theih an nih ka ring lova, a chhawm tel zel ang tih hi kan ring tlat,” a ti bawk.

Chhungrilah zawk
Hetih lai hian, album te la buaipui a, state pâwnah te pawh zai tura a la chhuah zak zak avang hian fapa a neih hnu-ah a danglam tehchiam lova sawina erawh thudik lo a nih thu sawiin, “Kawng lehlamah chuan min lo thlir dan leh hriat dan hi a danglam lo thei lova, amaherawhchu keimah- ah chuan a hminga ‘Pa’ han nih tawhah hi chuan Inchhung khurah leh family angahte pawh danglamna a thleng nual a, rilru sukthlek dan te thlengin a danglam nasa hle,” a ti.
Tuna a dinhmun hi US Politics nen a danglamna em em a awm lova, “Obamaa’n ‘Yes We can,’ leh ‘change’ a tih kha a hnu-ah Republicans lamin, ‘change’ hmuh tur a awm tak tak lo an tih ang deuh hi a ni a. Mahse, ‘change’ hi chhungril lam zawk a ni a, thenkhatin ‘change’ hi keimahah an hmu lo mai thei a, chhungrilah chuan, ‘change’ hi a thleng reng a ni,” tiin a tuihnih leh zauh bawk.

2014-ah ‘change’ tak tak
Michael-a chuan tunlai thangthar chu kawng engkimah hmâ an sawn tawh em avang leh music-ah pawh an ‘taste’ a san tawh avangin Mizo nawlpuiin ‘rap/hip hop’ an la pawm theih chiah lohna chu zawi zawiin a insiam rem zel anga, 2014-ah chuan Mizoram pum ang pawhin rap hla te hian a hap hneh hle a rin thu a sawi a, hemi atan hian theih tawp a lo chhuah ve tawhna te pawh a thlawn mai a nih a ring lo a ti.

A hringnun pholanna hla runthlak buaipui!

2010-11-19T08:14:00.000-08:00

A hmel hmuh a nuam a, a nuih tawh phei hi chuan thenkhat la na deuhte lo talbuai hman viau pawh ni se, a awm lo hran lo. Zai mite zinga music video nei hit berte zinga mi, chuan music video-a siam mai theih, hla thulkhung ril tak pahnih a
kawl khiau tawh a. A larpui leh hla thu thenkhat avanga sawi hlawh, “Lo hrethiam hram rawh” ang ni lovin, tun tuma hla tur hi chu ama mimal nun leh thil tawn inzehna te mai bakah, mi tam tak pawhina an nun-a an sengluh theih tur ni ngei
dawna a hriat thu a sawi.

“Sawi kai (controversial) tur buaipui pawh ka ni lova, hetiang lam hawia boruak siam tumna pawh engmah a awm lo. Tunah hian hla pahnih thun thar ka nei a, pakhat phei hi chu kan thian-pa, Isaac Sailo phuah a ni a. A thu a tha a, engemaw
chen kha chu ka nun nen pawh hian a inmil em em a, hla thupui phei chu kan la vuah lova, mahse kan thun fel thlap tawh thung.
“Hmangaihna vanga tawrhna (heart breaking) lam hawi a ni dawn a, Blue Wave Records-a kan siama hi mimal tak pawhin theih tawp ka chhuahna a ni a, ka duhtui em em bawk a, he hla tawp lamah phei chuan lei-ah pawh inhmu tawh lova, Van rama inhmuh leh tawpna tur kha a ni a, he hlaah hian hringnun bung thenkhat a inzep a ni,” tiin Mimi Rethlei hian a sawi.

A hlawk tak tak em?
Zo rimawi khawvela invawrh tumte leh hriathlawh tawhte pawhina loh theih lohva an siam leh thin music video chungchangah tam takin sum leh pai sen thlawnna leh hahthlawnna nia an sawi laiin, tam takin boruak siamnan leh larnan tangkai takin an lo hmang ve mek bawk a, ngaihdan phir tak inkarah hian Mimi chuan a nih theihna chen a awm ve ve a, tun dinhmunah chuan hlawk a ti lem lo.
“Music video siam man te hi thil hautak a ni tawh a, hun leh tha sen chu thuran, sum leh pai sen pawh hi a awlai lo em em a. A thlawna mahni inpholanna remchang (free advertisment) a nih theihna a awm mek lai hian a hlawkna zawng-ah chuan a hlawk hranin ka hre lo.
“Thenkhatin siam leh rawh min ti a, a thenin, siam tawh suh, te min ti a. Mahni tawkah kan lo buai tawh bawk nen, kumin-ah hi chuan siam chu ka beisei khawp mai a, mahse a tak ram kan thlen leh thlen loh turah ka chiang lova, siam theih ngei chu ka tum ve khawp mai,” tiin Mimi Renthei hian a sawi.

Sailova'n Suu Kyi lawmpui, raltlante lainat

2010-11-15T19:07:00.000-08:00

"Burma ram hi tunhma chuan ‘golden city’ tia sawi thin a ni a, ram hausa leh rangkachak khawpui tih hiala hriat lar niin, ramdang mite pawhina an hmuh châk em em thin a ni. Amaherawhchu, Sipai rorelna hnuaiah an tlachhe ta a ni a, chu chu Aung San Suu Kyi hian tundin leh a tum a ni. Hetianga chhuah zalen a ni ta hi thinlung takin ka lawm pui a, Burma mipui zawng zawng, ramchhung leh pâwn-a chhan hrang hrang vanga awm te thlengin ka lawmpui.

“Mahni ramah pawh awm ngam lovin Malaysia leh thenawm ramahte tlanlutin, khawvel ram hrang hrangah himna zawngin an tlanlut mek bawk a. Mimal tak pawhin an dinhmun hi hrechiang ve hle-in ka inhria, Malaysia-a an dinhmun retheihzia te
thlengin mit ngeiin ka hmu a ni. “Malaysia thlen tumin, a rukin bawng phurhna motor-ah te, ran leh thil dang phurhnaah te a theih ang anga inhnawh lutin an han thleng rawih mai a, chutah lawngchawlhna leh hmun dangah te police-in an lo man a, mihring tling lo khawpin an lo sawisa a, an thih hmâ chu rim takin an chhawr mai a ni. Kawng lakah pawh police man hlau reng renga tlan an nih avangin mi tam tak chu motor accident avangin an thi a. Zalenna an zawnna lamah an thih phah nasa em em a ni.

“Sipai rorelna râwng tak hi zo hnahthlak unaute ngei ngei pawhin an tuar nasa em em a, sipai sorkar rorelna khian mipuite thleng phak hmasawnna a pek loh avangin ei tur nei lo leh sipai rikrapna nasa lutuk avanga tlanchhia te an ni hlawm a. Mizoram chhungah ngei pawh tam tak an lo lut a, raltlan an nih avangin hmuhsit an hlawh a, an phâk ang tawk tawk an thawk a, an dinhmun a hniam avangin keini’n kan lo enhniam leh tawh bawk si nen. Mizoram chhunga an thawhna lamah pawh an hnathawhin a tihtlei zawh loh avangin thil pawi tak tak an khawih hnem hle a, an puar khawp an hmu lo lutuk hi an tuar nasa hle-in ka hria.

“Aung San Suu Kyi hi burma ram tiengtu tur a nih ka ring tlat a, burma-in kawng dik a zawh a, a chhunga chengte’n zalenna te, mihring dikna leh chanvo te thlenga an neih theihnan leh ram hausa an nihna hi khawvel hriata a taka pholang leh tur hian amahah pawh rinna ka nghat lian hle a ni. Burma hi Aung San Suu Kyi kaltlanga a insiam rem loh paw’n a thisen tal hi chuan a au harh ngei ngei ang ti ka ring tlat bawk a, amah hi mimal tak pawhin ka tan a, ka ngaisâng a, tawngtainah ah te hial ka dil sak tawh nghe nghe.

“Sawi tawh angin, kan zinna hrang hrangah mahni ramah pawh thlamuang taka awm ngam tawh lova, mi rama raltlana awm hi ka hmu hnem em em a, ka lainat a, ka tawrhpui hle bawk. Aung San Suu Kyi chhuah zalenna hian beiseina thar a pek ka ring tlat a, zalenna duhawm tak an nei leh ngei anga, ‘golden city’ ah a insiam leh ngei bawk anga, ram mipuite pawhin mipui rorelna dik tak hi an neih leh ngei pawh ka beisei pui a, thinlung takin duhsakna ka hlan a ni: Vanlalsailova

2008: In rawk, 2010: In him

2010-11-15T19:03:00.000-08:00

Kum 2008 khan A nu dam lohna avanga Lawngtlaia a haw hlanin Aizawl-a an chenna In chu misualin an lo rawk tawh a. Nimin piah khan Kolkotta pan tur a nau an thlah tumin an chenna In hi kalh lovin darkar 2 chuang zet an tlan san a, thil bo engmah a awm lo hlauh thung!

Tun tumah hian Lengpui atanga a nau thlawhchhuah hun tur hi 12.45 PM tih a ni a, a bi ling a ba langa an tlan thla chung pawhin dar 1:10 PM-ah an thleng thei hram a, nimahsela vanneihthlak takin CM zin tur avangin an lo muang hlauh mai a, official te an han dil ngial hnu-ah an lo remtih sak ta a ni.
Chutah, In an han thleng leh chiah mai chu, kawngkhar a lo inhawng huau mai a, a phu chiang hle. Kum 2008 khan tha tak an kalh chung pawha rukru-in In chhung bungrua a lo lepse vek kha a ni a. Misual hian thawmhnaw a ipte awm zawng zawng chu a enfai vek a, a nau rangkachang thi tih loh chu lakchhuah a awm lo hlauh. TV putchhuah tumna erawh a tlawlh niin a lang a, hmun dangdaihah a lo inhung a, thawmhnaw pawh a darh nuai.

Thil thleng pahnih khaikhinna
“Tun tuma thil thleng hi chu kan lo inring thul a, kan hmanhmawh a ni mai lova, a bi ling a ba langa kan tlanchhuah avang khan a kalh mai turah ka ngai a, ani lahin ka kalh emaw a lo ti bawk a. Ka pa nena In kan han thleng leh chiah mai chu, ka thil hmuh chuan min barakhaih hle a, ka thin hi ‘pu dut pu dut’ a ti a.
“Tun tumah chuan a bo fai vek dawn a nih hi” ka ti a, rang taka lut nghalin, ka’n enkual zung zung a, vanneihthlak takin engmah a lo bo lo. ‘Lalpa, ka lawm lutk’ ka tichhuak hial.
“A hmasa zawk kha chu ka nu dam lohna avanga Lawngtlaia kan haw laiin Kan in min lo rawk sak a. Police- in min rawn phone a, mahse ka rilru-ah chuan, ‘Mi In rawk duhna khawp hial an put chuan keimahni ang thova, kan harsat puite an ni ngei ang,” tiin ka thinlungah hahdamna mak tak mai ka nei tlat pek a, ka rilru a dam thlap.
“Ka lainat zawk ang reng. Sual hrim hrim hi a tha lova, ka hua a, a titu erawh engemaw ti-a lainatna ka nei a, tun hnu-a ka ngaihtuah let leh pawh hian kha tih laia ka rilru put dan kha mak ka ti hle a ni,” tiin Rosy hian a sawi.

Mizoram: Asia-a Setanic ho bu khuarna lian ber 2-na

2010-11-11T21:24:00.000-08:00

Tunlai hian Shillong-ah Rev. Samuela leh a thawhpuite'n setanic ho an hmachhawn mek a, inbeihna pawh a kal vung hle. Chuta lo langchhuakah chuan, Asia khawmualpuiah hian Setanic ho inzarpharhna leh an chet hluar-na hmunah Mizoram chu pahnihna ni, Korea-ah a nasa ber a, pathumnaah Shillong a lang ve bawk.

Pawngsual leh inawhhlum a hluar theihnan beihpui thlak, a hlawhtlinna tur hmanruaah Zawlaidi?

Hemi chungchang hi sawi chiangin Joseph Zaia chuan, "Khawvel hmun hrang hranga awm Setanic te hian dilna urhsun tak an thlen reng a, chutah chuan Mizoramah pawngsual leh inawhhlumna a tam thei ang ber thlen chu an thupui lian ber a ni mek. Tunah pawh hian kan hmachhawn ta zut zut mek a tih theih ang.
"Beidawnna te, hurna leh suahsualna chi hrang hrangte lo intanna chu Zu leh ruihtheih thil te hi a
kaikuang lian ber berte an ni a, hemi hmanrua atan hian Zawlaidi hi a langsar em em a, miin zu a ruih tawh chuan hur herhnaah a tlan chak nghal hle a.
“Pawisak neih lohna leh thil reng reng ngaih pawimawh tawh lohna a thlen a, tunah Zawlaidi ngei pawh hi Setana hian hmanruaah a rawn hman ngei ngei dawn a ni," tiin a sawi.
Heng Setanic ruhkawl tak takte hian Mizorama pawngsual leh inawhhlum a thlen zut zut theihnan ni 80 leh zan 80 te chawnghei tawngtaina an nei thin ni hiala hriat a ni a, mipat hmeichhiatna hmankhaw lohna turah Zu hi hmanraw tangkai ber tluk a ni a, sorkar hian he phalna a siam hi a sut kher Joseph Zaia hian a ring lova, chutih laia kohhranin thawm a nei erawh a tih tur dik tak ti-ah a ngai thung a ni.
Zawlaidi hi mihringah a thawhnat tak em avangin hmun thenkhatah ralpui phiara phiar an awm nghal chat a. Sorkarin zawrhchhuah a phal miau si avang-in a duh lo tan paw'n tihngaihna tak chu a vang hle niin a lang.
Zawlaidi hian a bik takin, Mizo thalaite hi engtin chiahin nge a khawih dawn tih hi hriat a la harsa
a, Masi a lo theng mai dawn bawk si a, kum dang zawng aiin tun tum hi a 'bon ra' dawn tih chu zaithiam hriathlawh, Joseph Zaia ngaihdan a ni nghe nghe.
"Ka ngaihdan dik takah chuan roreltute zingah khan kohhrana inhmang, piangthar tha leh Pathian
tih mi tak tak lo awm ta ang se, Zawlaidi siam leh hralh phalna hi an pawmpui ka ring lo hrim hrim. A nihna takah chuan, kumin krismas lo thleng tur pawh hi a huphurhawm hle dawnin ka hria a, kumin krismas chu a 'bon ra' khawp ang," tiin Joseph Zaia hian a sawi a.
Zawlaidi boruak hi chelh din theih ni chiah lo mahse, thalai pil bo mai tur chhanchhuahna erawh chak takin a thawh theih thung a, he hmalaknaah hian theih ang tawka inhman a tum thu a sawi bawk a ni.

Tuilâi rapa puhna nasa takin phâ!

2010-11-11T21:04:00.000-08:00

A zai dan chungchangah duhthlan tur zawk hre lova puhna chu thu dik lo nia sawiin zai chawlhsan hret hret a, hun duhawm lo thleng tur atan inbuatsaih a duh a ti.

Zo rimawi khawvelah lengzem hla mawi tak tak hmangin dinhmun sâng takah a rawn invawrh chhova, a music video siam te chu a hit pui vek nghe nghe a. Chutih laiin, siam thar lehna a chan tak avang-in Gospel singer a ni chhova, leng zem hla fuh zet mai, 'Beiseina in' tih chu a tichhuak leh ang lawi si a!
Hei taka hi Kristian rama cheng thenkhatin an ngaithiam lova, tui lai rap leh dinhmun chiang lo deuha awm ni hialin an sawi a, he an puhna hi zaithiam duhawm tak, Tetei Ralte chuan pha-in, hetiang hian thil awmdan dik tak sawichhuahna a nei.
"Ka dinhmunah hian ka chiang a, duh hun huna inthlak danglam a, tanhmun sawhsawn ching pawh niin ka inhre lo. Pathianah lawmna changin, 2007 kum tawp lam khan hlimna ka A zai dan chungchangah duhthlan tur zawk hre lova puhna chu thu dik lo nia sawiin zai chawlhsan hret hret a, hun duhawm lo thleng tur atan inbuatsaih a duh a ti.
chharchhuak kha a ni a.
“Ka debut album-a, 'Beiseina in' tih music video pawh kha siam tum ka ni lova, amaherawchu ka thiannu ngawih ngawih, pasal sun tawhin siam ngei tura min ngen nasat em avang leh sponsor hial tur-a a inpekna avangin kan siam kha a ni a, a pasal hriatrengnan a ni.

Nasa taka hnar hnu-ah sachhuak
"Midangte tana ti ka ni bawk a, an ni an lo lawm a nih tho si chuan a tha ka ti mai a. Chutianga tuilai rapa ka awm pawh ka hre lo. Tun tumah pawh hian Kawnpuia mi Lalnunpuia Hrahsel in a hla thar, "Van ruahtui" tih chu siam tura min ngen nasat em avangin kan han tichhuak leh chu a ni a. A tirah
chuan ka hnâr nasa hle a, pasal nei turte ka ni a, chawlh hahdam hrim hrim ka duh a. Mahse, 'Min tih sak hrâm rawh' tia min ngen ngawih ngawih avang chauha music video siam ka ni.

A nun a chep tak zet!
"Mihring ve tho ka ni a, kan lo chetchhiat palhte khan nun hi a chep lutuk a. Tuna ka ngaihdan dik takah chuan gospel a ni emaw lengzem a ni emaw, music lamah hian inhman ka tum rih lo tawp. Local deuha khawsak ka duh a, tunhmâa ka lo tih thin leh phur taka ka thawh thin angte thawh bawrh bawrh a, rimawi atanga tlem tlema inlakhran hret hret rih hi ka duh ngawih ngawih a ni.
"Kohhran leh khawtlanga theih ang anga inhman te, Dawr nghah te, Gas put lehtawp ang chi te kha tuna ka tih tur chu a ni a. Hahdam ve deuha awm tul tihna a lian hle a, zai hi tunah chuan ka thlahdah deuh hrih ang," tiin Tetei Ralte hian a sawi.

PBK-a lemchang awm vangin buai thelh!

2010-11-10T09:24:00.000-08:00

PBK-a a mangang hman hle a, a phâr buai teuh hle tih chu thu dik a ni a, amah pawhin a zep lo. Tunlai Mizo thalaite inkawm hlimna hmun lian ber, Facebook-ah tunge a nih pawh hriat lohvin a password hmanga a lo luh thin avangin harsatna neuh neuh a thleng nual nia hriat a ni a. Hemi avang hian midangte rilru tihnat leh pawi sawina ang chi a awm palh anih chuan ngaihdam a dil tih a sawi nghal bawk.
“Australia lama kan thiante’n min rawn hrilh a, zing dar 4 thleng thlengte i online thin a, an ti a. Mak ka ti a, ka phu nasa hle. Ka luh ve chhunah pawh tha takin ka chhuak (log out) thin kha a ni si a, hetianga titu hi ka thiante an nih tho chu ka ring a.
“Keimah ni si lovin, keimah angin a lo biak kha ka hlauh ber a ni a, a pawi ka ti khawp mai. Hei hi ka hriat veleh a rang a rangin password thar ka nei nghal a, min tiluhai hman hle,” tiin PBK-a hian a sawi.

Buaipui hluaina chi-ah ngai lo
Hetih lai hian, Facebook chu tangkai taka a hman mek lai hian, rilru zawng zawng pekna chi leh buaipui hluaina turah a ngai lova, tul a ti lo hle bawk. “A tak (LIVE)-a inhmuh na awm si lova, han tihkual vela hi kei chuan ka tum ve lem lova, tul pawh ka ti lo. Duhthusam hun leh hmun-ah duhzawngte sawiin, a tak ngeia kan inbia a nih loh chuan chaw tak khuka khuk pui hluaina tur chi-ah ka ngai lo,” a ti bawk.
Midang hminga thil tih ching leh ‘bawl’ thin an awm erawh pawi a ti hle a, mi dawihzep thil tih dik takah ngaiin, “Mi tam tak an lo buai tawh thin a, hetiang hi chu tih zel chi a ni lo khawp mai. Mahni hminga ti ngam lo chu mi dawih an ni mai,” tiin PBK-a hian a sawi a.
Facebook-ah hian biak chu nei ve bawk mahse, zei a inti hran lova, a betute a zira boruak siam erawh aharsat loh thu a sawi thung.

Ram leh hnam tan Gospel leh Love song thliar hrang lo!

2010-11-10T09:01:00.000-08:00

Mizo mipuite tanpuina tur pawimawh tak anih chuan love song sak pawh lo ngai ta se, ka tlanchhe ngai lovang: Rinte-a

Gospel lama a thian thate ngei ngei pawhin ‘an sawisel’ a rinlawk laia, an lo tuipui a, a hmunah te hial love song a sak ngaihthlak an châk thu an hrilh letling zawk chuan a barakhaihlettling zawk.
Mamit & Ngopa chhiat tawkte puala charity concert zan-a kum sawm chuang mipui hmâa inlan tawh lo, a band Albatross nen an han inlan meuh hnu chuan, “Ram leh hnam tan a nih phawt chuan gospel leh love song-ah ka buai lovang” tih chu a thutlukna a ni ta!

Hman thiam a pawimawh ber
“Music hi Pathian siam a ni a, hmangaihna pawh Pathian siam tho a ni a. Hmangaihna pawh duhawmin tha hle mahse, kan hman sual chuan Setan-a’n tangkai takin a hmang thei.
“Chutiang bawkin, engkim hi Ama siam vek a ni a, kan hman sual erawh chuan Setan-a bawk hian a hmang tangkai em em thei a ni,” tiin hun rei tak thawm a neih tawh loh hnu-a boruak rawn nei lian chho mek, Rinte-a chuan a sawi.
Sawi chhunzawmin, “Khatia love song ka sak tak avanga a chhe zawnga ‘comment’ ka dawng miah lo kha ka lawm a. Gospel lama ka thiante pawhin min hlut pui em em a, en an châk zia te an sawi a, an en tak tak nge tih erawh ka hre lo. Lunghlui te pawh a leng a, kum sawm kalta a, band member te nena hlim taka recording kan neih laite kha min hriat-chhuah tir nasa hle.

Tlanchhe ngai lovang
“Concert zan te khan mipuiin min lo hlut der ve a, mipui hmâa kan vawikhat inlannaa kan hla an lo sa thei deuh vek mai te khan rilru a khawih a. Kan lawm tak zet zet a ni.
“Kan Mizo mipuite tanpuina tur pawimawh tak anih chuan love song sak pawh lo ngai ta se, Ka tlanchhe ngai lovang. Chutih rual-in, Pathianin min siam a, Amah faka, theih tawpa inhman chhoh zel erawh ka No. 1 a ni,” tiin Rinte-a hian a sawi.

Sailova’n lecturer hna thar a chelh!

2010-11-08T20:18:00.000-08:00

Sorkar hnathawk tam zawkte hian an hnathawh aiin an hlawhah an tui: Sailova

Sailova chuan Van sorkar (Government of Heaven) hnuaia Jews Carpentry-a lecturer thawk mek a nih thu a sawi rualin, Mizorama sorkar hnathawk tam zawk chu hna aia an hlawh tuipui zawkte an ni a ti.
Tuna a thawhna sorkar nena khaikhin chuan a danglam hle a, kaisan chungchangah pawh 'seniorty' lam ni lovin, inpekna atang zawka teh a ni a, tun dinhmunah chuan sorkar hna a thawh theih loh thu a sawi chiang nghal bawk.

He lei sorkarah maw, ni love!
"Van sorkar hnuaia thawk ve mai ka ni a, he lei sorkara deptt. te an Pathian thu lo ka tihna a ni loh rualin, "Ni e, ka thiante pawh sorkar-ah an lut a, hna tha tak tak an nei tih pawh ka hria. Nimahsela, Tirhkohte thiltih bung 24-a a sawi angin, he hna hi Lal Isua hnen atanga rawngbawlna ka hmuh a ni a. Pathian ropuinan ni sela, minister te pawhin hna tha tak tak min kawhhmuh a, min sâwm fova, mahse sorkar hna hi ka thawk thei lo.
“Hotute khan 'mawl' min ti ngawt ang. Zai mite kan awmhonaah pawh hian tunge hna la hmu lo? tia an sawi rik a, 'Sailova chuan a duh lo' tih hi kan hotute tawngkam a ni thin. A lungawina tawk a hria "Sorkar hna hi ka thawk châk lo a ni reng reng lova, mahse Lalpa hnen atanga rawngbawlna ka hmuhah hian ka lungawi a, ka thiante'n hna an hmu te hi thinlung takin ka lawmpui a ni.
“Jerusalem Ar a khuan khan Peter-a khan a sual a hriat-chhuah phah a, chutih laiin kan zaimi, sorkar-a lut ta te hian kan hnaah hian kan khuang lovin kan tuk mai mai thin niin ka hria a. Kan reh
nghal fo zawka hi, kan fimkhur a ngaih em emna chhan lian tak pawh a ni.
"Zai mite zingah hian gospel leh love song sa thinte thlengin a ni thei anga, a bikin gospel sa thinte ngat phei chu kan hnathawhnaah te hian kan khuang ring leh zual dawn lawm ni?" tiin Sailova hian duhthawh takin a sawi.

Chawimawina kum leh hralhchhuah kum
Kuminah hian khawvel thilahte thleng pawhin chawimawina a dawng zing malh malh hle a, tuna a chhiar theih chin langsar bikah paruk a tling ta hial. Bungzungah rawngbawna an nei zo hlimhlawl a, hemi tum hian MHIP -in Vawk pali an lo talh sak bawk.
Sailova hian thalaite pual bika thuchah tawi sawi nghalin, "Ka thalai pui duh takte u, Lal Isua-ah hian engkim a awm a, thil dang zawng aiin Lal Isua hi thlang hmasa phawt turin ka sâwm duh che u a ni," a ti.

Kâr khat a thupbo, Kâr khatah larpui!

2010-11-08T20:10:00.000-08:00

Tunlaia a hla lar tak, 'Di Lenna' chuan a bik takin, nula leh tlangval thinlung a khawih pha a, hla thu leh thluk mawi zia hi hrilhfak a tling a, model an zei a, Famkim- a'n a sa lungrun bawk si a, a phuahtu Vanlalrema Chhakchhuak hian a ma tawn ngei, Damdawi In-a a mut lai ngei maia a phuahchhuah a ni nghe nghe a.

A bu ang thlapin a kal a, a inchawihmawi vel vek mai te pawh ti ila, a hla chhungril khawih pha si lova, a pâwn lang mai kan cheikual ang tih a hlauhthawn awm zawk hial a ni. A tawna 'chawlhkar' rei ber Tuikual North, D muala a U te bula khawsa mek Famkima hian mite angin a lar pui lovanga, a insit lehna tur mai mai a thlen ang tih a hlauva, vawikhat pian ve mana music video siam chu mihring ve bawk anih avang-in mite'n hre ve se a ti ngawih ngawih a ni.

Mahse, a beisei lo ang tak takin a thleng ta. "Ka huphurh lutuk a, U Zova (Zozam) in uluk taka a siam zawh hnu leh demand channel- a dah tura ka lakchhuah khan dah mai ngam lovin, karkhat zet In-ah ka kawl a. Amaherawhchu, ti ve uk tawh si, dah mai mai kha ni theiin ka hre si lo.
"Chhungte leh thianthate ka'n râwn kual vel a, sponsor tu an lo awm bawk nen, dah tura min ngen avangin insit leh huphurh tak chungin kan han dah ta a ni. Vanneihthlak takin, mite'n an lo hlut a, hla thlan hlawh ber te zinga mi a ni chho nghal ta mai hi mak ka ti em em a ni," tiin Famkima hian a sawi.

A inpek pumhlumna "He hla sa tur hian ka inzir rualin, chutih lutukin ka zir nasa lem lova, rilru-a awm ang angin ka sachhuak a ni. A mood-ah ka cheng a, rilru leh thinlung zawng zawngin ka sa a, he hla-in a tum leh a thlen dan ngaithlatute'n an mitthla thiam ngei theihnan mahni tawkin theihtawp ka chhuah ve a ni.

"Chutih laiin, TV atanga mahni zai en chu a nawm rual crualin, insit a na duh khawp mai. Khawlaiah te min duhsaktute ka tawng thin a, min lo chibai a, duhsakna min hlan tute chung-ah pawh ka lawm. Kan zai te min lo hlut sak zel tur pawhin ka ngen duh a, bul tan ve chauh ka la ni a, hmabak leh tih tur tam tak a la awm a, chumi atan pawh chuan tawngtaipui pawh ka ngai em em a ni,” a ti.

Tunah hian hmun hrang hrangah sawmna a dawng malh malh a, zinchhuahna tur programme pawh a inchher chhuan tan mek. Zo rimawi khawvela zaithiam chhuak thar duhawm leh beisei awm tak ni bawk hian 'Di Lenna' hla hmangin ngaithlatute thinlungah ram a la chak hle a ni.

Mizo zai mite tan kâwl a eng tan ta!

2010-11-08T19:58:00.000-08:00

India hmarchhaka Record label hmasa ber U.M Pro leh Scavenger Records inthlunzawm

Hei le. India hmarchhaka Record label hmasa ber, Unicorns Movement (U.M) Pro Records chuan sumdawnna thilah leh talent nei tha tak takte phochhuahna kawnga hmalak pui leh thawhpui atan Scavenger Records, Mizoram chu a rawn thlang fel ta a, hetianga thawhpui tha tak an nei tur hi an lawm hle tih an sawi bawk.
Hemi chungchang hi sawi chiangin, U.M Pro Records, Managing Director, Mr. Prithish Chakraborty chuan, “Scavenger nena kan inzawm thei ta hi kan tan chuan thil lawmawm tak a tih loh theih lohva, India rama chak zawka hmalakna turah pawh hian records labels pahnihte hian kawng hrang hrangah hlawhtlinna leh hmasawnna an neih chhoh zel kan beisei,” a ti.
U.M Pro Records hian CDs te hralhchhuakin, Scavenger Records tanpuinain Event te an buaipui ang. Hetiang tho hian, Scavenger Records artist te chu U.M Pro Re-cords hian album tihlar leh India ram puma thehdarhnaah theih tawp a chhuah pui bawk ang.

Magdalene guitarist, Victor-a’n engnge a sawi
“Mimal tak pawhin ka lawm a, Mizoram tan paw’n thil tha leh tangkai tak tur nia ka hriat bawk avangin ka lawm lehzual a ni. “Theih tawp chhuah ka tum a, records bikah chuan thawhpui tur atan thu min rawn thlunpui miau avangin Scavenger Records atanga chhuak, Gospel emaw love song emaw pawh ni se, U.M Pro Records hian a tihlar leh thehdarhnaah India ramchhungah chak takin hma an la zui dawn a.
“Mizo thalai, talent nei tha leh promote tu tha awm se, khawvel huap ang pawha zahpui awm lo tur hi an rawn inlar chhuak zel dawn a, a phurawm hle-in ka hria. Internet-ah te intihlar leh inpholan hi a theih teh meuh mai a. Amaherawhchu, dawr-a zawrh chhuah leh phochhuahna tak tak a awm chuan si loh chuan, thlen thui a har a, a hlawhtling mawh hle bawk.
”Chuvang chuan, Scavenger Records atang hian hun remchang a inhawng ta a tihtheih a, Mizoram angah chuan a hmasa ber a ni ang em aw, ka ti a, ka sawi sual te pawh a ni thei thova. Engpawhnise, Mizo artist te promote nan a tha dawn lutuk a, kan hlawkpui ngei pawh a beiseiawm,” tiin nizan dar 7 vel khan Magdalene guitarist leh Scavenger Records neitu ni bawk, Victor-a chuan a sawi.

RC-i Leh Chhas

2010-11-08T19:48:00.000-08:00

Mipa tih hek ka tum lova, an neih ei ka tum lo bawk: Zoramchhani (RC-i)

Zawhna: A te vang vang na a, a zei hmel reuh lutuk an tih che hi?
RC: E... chuti maw, lawm tur nge lawm loh tur ka van hre love. Ih, ka zei vak paw’n ka hre hlei nem, a zahthlak e. Ngaihzawng pakhat mah la neih loh chuan sawi thiam a har a ni, neih ve hunah chuan he zawhna hi sei tawkin chhan ka tum ang.

Zawhna: Chhas i nei hman lo i ti fova?
RC: Ania lawm, tunah chuan ka la nei hman lova, ka nei ngam lova, ka tum rih lo bawk.

Zawhna: I hun ve tawh tho a lawm le...
RC: (A nui hmasa te te a). Keini ang rual lek lekte pawhin an nei tawh a, kan naute anga kan ngaih tak takte pawhin an nei fir fer tawh bawk a. Umm... Ka hre lo le. Tunlai khawvelah chuan a indan theih tak tak lova, neih hunte pawh a la awm ve mahna.

Zawhna: Neih hi i châk vak na nge?
RC: Ka châk hran chuang lo. Châk chuan a neih ve theih reng.

Zawhna: Nei dawn ta la...
RC: Ih... Mifel, ruihtheih thil ti lo leh Pathian tih mi. Chuan, a... a tam lutuk. Enge ni ang aw, eee... Hmeltha leh PA tak, Mipa tak tak hi ka duh.

Zawhna: I thin phu hi a la rang ngai miah lo em ni?
RC: Mipa ka hmuh avang hian ka thin phu a ran lai awm pawh ka hre lo. Mahse, Mizo hi kan changkang zel a, a hmei a pain hmeltha an tam tulh tulh. Mahse chutianga min buairu tu hi ka la tawng lo a niang. Ka la confi tawp.

Zawhna: Chhas neih hun-ah engemaw neuh neuh dil i hrat viau lawng maw?
RC: Teuh lo mai. Ka ngaihdanah chuan Bialpate thil ngen chin thin hi tha ka ti lo. Mipa tih hek ka tum lova, an neih ei ka tum lo bawk

Mamit & Ngopa chhiat tawkte tana inpe Vanapa Hall leng lo thalai rual pungkhawm

2010-11-08T19:43:00.000-08:00

Zep thu a cheng lo. 'Dar 7 a tan tur' tih anih chuan, 'Dar 7:30 emaw dar 8' ah bak an tan tak tak chuang lovang' tih ngaihdan nghet tak awm thina chu Mamit & Ngopa chhiat tawkte puala Tribal Power Foundation bultuma November 5 zana Vanapa Hall-a 'Charity Concert' -ah phehthlak a ni a, a hun takah an tan chat. Midangte tana malsawmna nih tum leh band tha ber berte mikhual tur hian Vanapa Hall a te mah mah a,kumina Zo rimawia tui hal punkhawm hnem ber zan a ni

Album an tihchhuah hnu-a mipui hmâa la inlan miah lo, Albatross band-in kum sawm hnu-a an rawn inlan leh te, Dreamhunter thluak bur la that zia te, Tribal Power huhuang la pui zia te a takin kan hmu a. Rock vahvaihpui ngam F.Sanglura band te, '18 till i die' ti-a mawi tur khawpa Foerve Young la themthiam zia te, Empty Arms ho 'combi' fuh zia te, Kroasia band rimawi inchawih nalh lutuk te bakah, Lushai Brigade ho zahpuiawm loh dan em em te kha sawi hmaih phal chi a ni hauh lo.

Nimahsela...
Charity Concert-ah hian mimal lam atangin Mami Varte, Mimi Renthlei, F.Laldinmawii, Michael M Sailo leh Lungmuana te an chetha hle a. Chutih laiin, Sap hla sa a tam zawk an ni erawh mipui lamin an khawp kham lo deuh niin a lang a, an duhthusam leh tuipui ber chu, Mizo hla bawk a ni tih hi hemi zan hian chiang takin pholan a ni leh a, Mizo hla sa te'n lawm an hlawh lehzual a, boruak an neih len dan atang khan a fiah awm e.
Hetih lai hian, sound checking neih ni tura inlan lo, Hard Ray band-in an tum ram an thleng zo lova, a hmuna chawp chilh taka sound remkhawm chawp an nih avangin tihngaihna a awm ta lova, an zai ngaihthlak châk em em fans te an tibeidawng ta erawh a pawi a, an mahni pawhin hrehawm an ti hle.

La pangngai reng
Zaipu lam atangin Muanpuia (Dreamhunter)-in taksa rihna a neih belh nasa hle tih lovah chuan a che vel leh zai dan velah danglamna hmuh tur a awm lova, a 'fit' em em a, an hla lar, 'Mengmawi' a han thlawh zet chu sak hun a chang lo hial a, tlar hma lama thalai rual hlawm lian tak phei kha chu thunun harsa tak an ni hman hial a nih kha.
A tawp kharnan leh mi tam takin an beisei em em, gospel singer ni si a, midangte tana malsawma nih theihna remchang a awm avanga love song sa tura rawn penchhuak, Rinte-a hming chu dar 10:20 chho vel atangin a riring sawt hle a.
An han zai chiah a, kum 10 kalta atanga mipui hmâa an vawikhat inlanna a nih thu a han sawi te khan mipui a kokhawm hneh hle a, ani pawh hian hla a sa tam thei lova, mipuiin an zawm that em avangin ngaithlatu zawka a tan châng a tam hle.
Musician tam zawkte hi kum lama upa tawhte ni mahse, thangthar te tan zir tur tam tak hemi zan hian an hnutchhiah a, mahni an inenkawl that zia leh discipline an neih that dan te thlengin an lantir a ni.

YMA khawmpui tawp zanah Chairman-in Manuna khâk!

2010-10-23T21:32:00.000-07:00

Lunglei khawpui, Leitlangpui Run-a neih zawh tak, YMA General Conference vawi 65-na hman zawh takah zai mite’n mipui lawm an hlawh hle a.
A bik takin, Hard Ray zaipu Manuna chuan lawm a hlawh zual emaw tih mai tur khawpin a tawp zan hian a chetha hle a, mipui lamin an lawm em avangin boruak a rit hman thelh.
A zai zawh hnu-ah chairman chuan khak zuiin, ‘Concert-na hmun a ni lo’ tih lam hawi zawngin thu a chhakchhuak a, he a thusawi lai taka hi Manuna hian chiang taka a hriat loh laiin, a fans tam takte chuan a thlavang hi an hauhsak nasa nghal hle.
Thiam tak leh boruak fuh zet maia mipui a kohkhawm theih laia, hotu lam atanga thu lo chhuaka hi an laknat pui hle nia hriat a ni a, Manuna ngei pawh hian SMS leh Call a dawng nghal zut zut a, thupuan danin an rilru a tihnat thu an hrilh hlawm a ni.

Engtin ngai ang maw?
Thudawnnain a tarlan danin, Manuna hi a hmâ nia a zai that em avangin a tawp zan hian zai tura sawm nawn leh a ni a, hetianga vawi hnih hla nei thei hi an awm lem lo nia hriat a ni. A tawp zanah Manuna hian a hla lar em em mai, ‘Engtin lo ngai ve ang maw’ tih hla kha a sa a.
A zai tha chu thuhran, stage-a a inlan danin a zir bakah, mipui tiphur zawnga boruak a siam thiam bawk em avangin mipui lam pawhin an zawm tha hle a, zep lovah chuan, concert fuh zet nen danglamna a awm tehchiam lo ti ila, he thil thlen dan hian a hrilhfiah teuh ber ang.

A sawichhuak ve ta!
Hemi chungchang hi sawiin Manuna chuan, “Hotute’n min duhsak em em a, vawi hnih ngawt min zai tir a, ka lawm hle a ni. Amaherawhchu, a tawp zana ka zai dan leh mipui awmdan kha an ei chiah lo nge ni dawn ka hre lova, ka zai zawh hnu khan chairman-in concert na hmun a ni lo tih zawng khan tawngkam a nei nghal a ni.
“Kei tak phei chuan ka lo hrechiang lo lehnghal a, zai mite thutna tur an
siam-ah khan ka thu nghal a. A hnu-ah SMS leh Call ka dawng nghal zut zut a, chairman tawngkam hman dan an duh loh thu leh, an lungawi loh thu min rawn hrilhna vek mai hi a lo ni a. A zia lo khawp mai.
“Tukin zing (Nimin zing a ni a, Aizawl lama lo haw tuma a inbuatsaih lai mek) thlengin mi tam takin ka thlavang hauhna lam an sawi nasa hle a.

Mipui tihhlim No. 1
“Pawi ka ti a, hrehawm pawh ka ti khawp mai. A nihna takah chuan, YMA khawmpui lian leh hun pawimawh tak a ni a, concert tumna leh khatiang lam rilru kha ka pu lo hrim hrim a, hotute’n min duhsak avanga zai thei chauh ka nih avangin a nuam leh hlimawm thei ang bera mipui tihhlim (entertain) bak kha ka rilru-ah engmah a awm lo tak tak.
“Mahse, min lo lawm der ve a, boruak a hot chhoh tak em avang khan ni maiin ka hria a, tu rilru mah tihnat ka tum lova, min lo khakna pawh kha chutiangin ka la thutak hran lem lova, mipui lam kha chuan an hrethiam lo deuh ni ber chuang a lang,” tiin Manuna hian a sawi.

Hla kaltlangin pangkhing zeng nula-in chawpchilhin damna a chang!

2010-10-21T20:41:00.001-07:00

A hla, ‘Kross Thisen’ ngaihthlakna atangin ‘Nerve’ that loh vanga pangkhing che thei tawh lo nula pakhatin chawplehchilhin damna a chang a. Tunhma pawh khan he hla kaltlang hian mi tam takin taksa leh thlarauah damna an lo chang tawh bawk a, mi tam takin an ngaihven nghal hle.

Rosy K Remsangpuii a ni! Ama puala music video a neih pawh sawi tur awm lem lo, debut album pawh la nei miah lo a ni. Heti chung hian Zo rimawi khawvelah hriat a hlawh em em mai a, a bik takin thalai lamah a tla na lehzual. A hmel hmuh a nuam a, a ‘aw’ a tha bawk si a, mi tam takin an ‘star’ rawn pawh hi thil mak a ni hran lo.

A hla lar tak, ‘Kross Thisen’ ngaihthlakna atangin phaia awm nula pakhat chuan hun rei tak atang tawha ‘nerve’ that lohna avanga pangkhing che thei tawh loa chu, he hla a ngaih-thlak atang hian damna a chang nghal a. Tunah hian, thlarau lam damna chan belhin, hlim takin hun a hmang mek.

A bul lo intanna chu...
Hriathlawh tih takah, Rosy hian phone call a dawng hnem thei hle a, a tir lamah chuan call reng reng lak vek a tum thin laiin, mimal thil leh pawimawh chi hrang hrangahte a buai tawh avangin number hriat lem loh chu a la hlei thei tawh meuh lova, he nula pawh hian hun engemaw chen chu a rawn be thin nghe nghe.
“Ka buai laklawh lai leh remchan loh laite a nih avangin ka lo la fuh lo thin a, a hnu lawkah message min rawn thawn a, chutah chuan, ‘Ka bei thei che angem?’ a rawn ti a, A tukah chuan kan inbe ta a ni. Amah hi mi fel leh ‘bright’
tak a ni nghe nghe a, ‘nerve’ that lohna vanga che thei mumal lo ni mahse, a ‘bright’ em vanga hriathlawh tak a
ni nghe nghe a.

Chawpchilh tak meuhin
‘Kross thisen’ a ngaihthlak atangin chawp leh chilhin damna a chang nghal’ tiin min rawn hrilh ta mai chu, ka rilru a khawih em em a, tap lo hram turin ka insum nasa hle.
“Engmah ka ni lo tih ka inhrechiang a, keima tih a ni lova, keima atanga chhuak pakhat mah a awm lo bawk. Tawtawrawt mai ka ni a, Pathianin min ham lo chuan ka ri thei lo hrim hrim. Mahse, ‘Kross thisen’ khan damna dik tak a thlen ta zawk a ni.
“Kan inbiak mek lai hian he hla hi a tam thei ang bera midangte pawh ngaihthlak tir a, thlarau lam damna thlenga an chan theihnana hmalak zui zel a tum thu min hrilh nghal bawk a, ka tap lo chauh a ni.
“Pathian hi a lo va han tha tak em! He hla hmang hian mi tam takin damna an lo chang tawh a, drugs addict leh pitar pakhatin damna an chan dante khan min hneh hle a ni,” tiin zaithiam duhawm tak Rosy hian thil thleng chungchang a sawi.

Kum 10 hnu-a Albatross inlan hmasak berna tur a hnai ta!

2010-10-21T20:32:00.001-07:00

Album tihchhuah hnu-a mipui hmâa kan zaiho hmasak berna tur a ni a, kan phur hlawm hle, phur tak kan ni. Keimahni hla ngei sak kan châk thina pawh kum sawm lai a liam ta a, vawikhatmah kan la sa ho leh miah lova, 'Mamit leh Ngopa-a chhiattawkte tanpuina atan min rawn sâwm ve a,kan ti thei ang em' tiin Rinte-a hi ka va zawt a, a remchan tur thu min lo hrilh a, kan lawm khawp mai: Hmingpuia (Guitarist)

Hei lo liama chanchin lawmawm hi tun dinhmuna Zo rimawi
khawvelah a awm lem chuang lovang. Mizo band tha sawi tawha rilru-a lo lang nghal chat thin, ALBATROSS chuan album hit zet mai an tihchhuah hnu leh an hla te mipui hmâa an la sakchhuah hmâ hauh si a, Rinte-a’n Gospel lama a pen san tak si avangin an zaiho thei tawh lo kha a ni a.

Tribal Power Foundation-ina Mamit leh Ngopa-a chhiattawkte tanpuinana November 5 zana Vanapa Hall-a ‘chartiy Concert’ an neihna turah Rinte leh Albatross te chuan an hla lar te an thlawh thei dawn ta! David-a (drummer) hi rokhawlhna lian tak avangin a tel thei dawn lova, Sangkima (Bad Combination) chuan a hmunruak hi a luah hrih dawn a. Keyboardist hriathlawh, PB-a leh Bassit MS-a bakah, Mizo guitarist zinga kutthlak mawi ber pawla sawi, Hmingpuia te’na a vawikhatnan an hla lar tak takte mipui hmâa an sa tura hi thil nghahhlelhawm lutukchu a ni a, i inpeih tawh em?

A chhan chu hei hi a ni
Rinte-a chuan, “Mamit leh Ngopa tanpuinan leh kan hla te mipui hmaa sakchhuah ve hrim hrim te kha a lo remchang bawk nen, chutianga band-a inrahluh tak takna ni si lovin, ‘charity’ pual liai liau hian kan zai dawn tihna a ni.
“Chutih laiin, min sawisel tâwk an awm anga, engah mah ngai lo te pawh an awm bawk ang. Kan hla te kha chutianga hla thu pawisawi
engmah a awm lova, a him tawk a, kum 10 hnu-a band kan inlan lehna tur hi kan nghak-hlel tlang tawh bawk a, kan phur khawp mai,” a ti.
Fakna hla a sak tâk avanga love song chu sual ta anga a ngaih loh thu pawi sawi lang nghalin, “Love song sa leh bung bung turin ka awmchhunzawm zel ka beisei lem lova, chutih laiin, ka ngaihdan mai maiah chuan, ‘Nun’ uluk hi a pawimawh ber ka ti a, kan hla te mipui
hmâa sakchhuak theih ngei tha kan ti a ni.
“Kan sawi phak rual a ni lo na a, Cliff Richard-a’n India ram a rawn tlawh tum pawh khan, love song sa turin an lo ngen a, a sa ve mai bawk ang deuh kha a ni,” tiin Rinte hian a sawi.
Khai le, midangte tana malsawmna nih theihna hun remchang leh Zo rimawi khawvela band tha rual ho chetna tur hi hmaih phal chi a ni mawlh lo. Hetianga Mizo band tha ber berte intawhkhawmna hun ropui hi a thleng zen zen tawh lo mai thei.

Zaninah FM Zoawi Award hlan dawn

2010-10-21T20:16:00.000-07:00

FM Zoawi Award chu tui let hnu-a a vawikhatna ni turin Zanin October 22 -ah Chanmari YMA Hall, Ai-zawl-ah ropui taka semchhuah a ni dawn ta. Inbuatsaihna pawhin a vawrtawp a thleng ta a, FM Zoawi fans te’na award dawng ngei tura an beisei leh duhsakte hming pawh tarchhuah a ni ta bawk.

FM Zoawi fakna phuah mawi ber thlanna tur hi boruak ti ‘hot’ ber turte zinga mi a tih loh theih lohva, Zofate chenna hmun hrang hrang atangin SMS a lut khawm ruih ruih a, thu phuah leh rem dan a mawiin, a thlangtute pawh an buai phah hle nghe nghe a, thlanchhuah ngei a ngaih bawk si avangin harsa tak chungin Top 10 an thlangchhuak thei ta hram.

FM Zoawi award hi LIVE-a pekchhuah tur a ni a, an ‘aw’ chauh kan hriat, a takah pawh hmeltha leh duhawm tak tak, RJ te inlanna tur hi a theuneu dawn lova, Zo khaw lam unaute pawhin he hun hi hman ngei tumin, an insangmar nasa tawh hle niin thu kan dawng nghe nghe a, programe felfai tak duanna hun hi chhim ngei ngei chi a ni ringawt.

Hunpui pahnih-a then a ni dawn a, a hmasaah hian thusawi tawi a awm anga, Michael leh SP te bakah, tunlaia hriathlawh tak ni mek, PC-a a zai bawk ang. Hun hnihnaah hian award semna leh, award dawngtute hnen atanga zai mawi tak ngaihthlakna neih a ni leh anga, beng leh mit titlai ngei turin organising committee te chuan ruahmanna an siam fel diam tawh nghe nghe.

1 Tunlai Hmeichhe Zaithiam Ber
1) Zoramchhani
2) Bethsy Lalrinsangi
3) Lalrindiki Khiangte
4) F. Laldinmawii

2 Tunlai mipa Zaithiam Ber
1) PBK Liankhuma
2) C. Vanlalsanga
3) Vanlalsailova
4) sumeon Zaithanpuia

3 Hranghlui Hmeichhe Zaithiam Ber
1) Lalhungchhungi Pachuau
2) Vanlalruati
3) Lalramhluni
4) sailothangi sailo

4 Hranghlui mipa Zaithiam Ber
1) Lalnunmawia
2) Lallianmawia Pachuau
3) C. Vansanga
4) Lianthangpuia

5 Hla Hlui Duh Ber
1) nunhlui tahna
2) Di Chhawrthlapui
3) Ka rawn Fang Leh
4) Luah Loh run

6 Tunlai Pathian hla duh ber (FOr COmPOser)
1) siamthar Ka ngai a ni – PBK Liankhuma
2) Ka Duh tumah an awm Lo – Freddy Lalruatsanga
3) nitin Lalpa – Joseph Zaihmingthanga
4) engkim i ropui nan – Bethsy Lalrinsangi

7 Tunlai Lengzem Hla duh ber (For Composer)
1) a mak Ka ti ngei – F. Laldinmawii
2) min Phuar si – B. malsawmtluangi
3) Ka Hmangaih Che – H. Lalmuankimi
4) i sim Loh Chuan – Pensy B. Lalthangliani

8 Khaw khat atanga FM nGaitHLa tam Ber
(Fm CitY aWarD)
1) Khanpui 2) manipur
3) Hnahlan 4)Phuldungsei

9 FM Zoawi ngaithl tam ber top ten
1) Dinga renthlei, ailawng
2) Lalngaihdama (Da Kop Olsen), Khanpui
3) messi, thinghlun
4) Lalngaihdama Khawlhring (LD Khawlhring), Kawnpui
5) Lalnunfela (Fela), tualbung
6) Lalrinnungi (mrs. Kop), Khanpui
7) C. Lalliankimi (Lady Gaga), republic Veng
8) Lalchhanhima (LC Obama), Hortoki
9) engkima, Hortoki
10) K. Lalrinawma (mr. United), Khanpui

10 FM Duhsakna tawngkam mawi ber top ten
1) Partei, Lunglei
2) Ls tochhawng, ramhlun Venglai
3) Zorempuii, Champhai Kahrawt
4) Zt sanga Chhakchhuak, n. Lungleng
5) C. Lalhmangaiha, republic Veng
6) H. Laldinmawia, Central Jail Veng
7) Lalremmawia, Venghlui
8) Clement Z. Hauhnar, Lungtan
9) Helen thangluah, Upper republic
10) Lalsangzuala, Khamrang

Tetei Ralte leh John Sailo inhual fel

2010-10-17T11:14:00.000-07:00

Zaithiam duhawm tak Tetei Ralte leh tuna England-a awm mek, Zirna In lar Coventry zirchhuak ni bawk, John Sailo te chu an inhual fel ta a, a mipa nu leh pate pawh Kawnpuiah zinin, nizan hmasa khan inhualna hi an tifel nghal bawk.
Rokhawlhna dang a awm lem loh chuan kumthar lam khian 'tiam tlat e' an tidawn a ni.

A tirin heti hi a nia...
Tetei Ralte chuan, "Kan intawnna a la rei lem lo. September 3 atanga inhre tan chauh kan ni a, facebook kaltlangin kan inhria a, thupui tak tak kan sawi tanna erawh karkhat hnu vel atangin a ni.
“Amah hi Mizorama awm ngai lo a nih avangin, helama kan zai dan leh a hminga mi min lo hriat dante pawh chuti lutukin a hre lem lova. A hnu-ah erawh ka music video te a lo khawl khawm a, youtube-ah te dahin, hlim takin a lo buaipui ve thin a ni awm e.

Boruak tha tak hnuaiah
“Ka chhungte hnenah ngaihzawng ka neih te ka hrilh thin a, a chang chuan min hnial (object) fo thin. Tun tumah erawh a tluang hle a, harstna engmah a awm lo. Boruak tha tak hnuaiah kan sawifel a, palai te pawh an lo leng a, kan hlim dar dar khawp mai.
"Facebook-ah khan hun engemaw chen chhung chu, ralationship status (kawppui neih leh neih lo din-hmun tarlanna)-ah khan It’s complicated tiin dinhmun chiang lova ka awm thu ka dah mai thin a.
“Ngaihzawng ka neih loh lai tak kha a lo ni bawk a, facebook hi ka khawih ve fo thin a. Zankhat chu mitthi kan nei a, ka tlaivar dawn tin 'wall' ah khan thu ka hnutchhiah a.
"Ani hian a lo comment vat a, a hnu-ah ka online leh si a, "i tlaivar dawn khan i insawi si a' tiin min rawn be leh a. A tirah chuan, chu-tiangin ka be lutuk hran lo, midang biak ang thovin ka be ve mai thin. Tichuan, kan inbe chho zel a, ka zai thin thu te a lo hria a, ka phone number te min rawn dil a.
'Mahse, tunge an nih pawh hriat loh hi phone number ka pe ngai lova, ka fimkhur ve hle thin. Amaherawhchu, kan inbiak ve reng tak si-ah chuan ka pe ta a. Min rawn 'call' chiah mai chu - a duhawm em em mai a, a 'aw' te kha a mawi ka ti lutuk a, Mizo zinga awm ngai lo a nih avangin a tawng a pai deuh hlek a, a duhawm tawp.

Hmaichhanah engtin?
"Hmel pawh la inhmu miah lo kan ni a, amaherawhchu kan inkarah hian hmangaihna thuk tak hi a awm tih kan hai lo ve ve. Chu bakah, ka hun kal tawh chanchin te ka hrilh a, a hrethiam em em a. Tuna ka awm dan, lan dan leh nih dan ang angin min pawm hmiah mai a ni.
"Hmaichhanah chuan 'A zahthlak awm ve’ ka ti a. Chapona tel si lovin, "Ka bula mite hi zahtheihna 'chance' ka pe ngai lo. Ka bula i awm chuan i zak lovang a, i 'conf' tawp ang' tiin min hrilh.

Chhiattawk Mamit mipui tan 'Mission For Mamit'

2010-10-13T20:34:00.000-07:00

Ruahsur leh leikhi nasa avanga Mamit khuaa chhiat tawk, In leh lo châna lungngai taka awm mekte tanpuina leh chhawmdawl nan, ‘MISSION FOR MAMIT’ programme chu Mizo Gospel Singers Fellowship, Mizoram leh ZONET tangkawpin zanin dar 8:00 atanga tanin hman tum a ni a, hetah hian a duh apiang, (sum leh pai)-a tanpuina pe duh tan live-phone-in (helpline) a awm bawk ang.

A hmun tur hi Ignite Studio-in an thawh a, sound system pawh Delta Sound in an rawn thawhchhuahpui dawn bawk. Gospel Band hrang hrangte leh Gospel Top Artist te an zai bawk ang. He programme hi LIVE-a tih chhuah a ni ang. Kan ram chhungah ngei, In leh lo pawh châna chhiatna
rapthlak tak, kan Mizopui ten an tawh mek lai hian an tan malsawmna kan ni thei a. Ramdanga chhiatna tawkte tana neih sum kan thehchhuak phal thin ang khan tunah pawh Mizopuite tanpuina tur hian theih tawp chhuah leh turin kan inngen a ni.

A tlem leh tam lamah buai lovin, remchan ang leh phal ang tawkin tanpui mamawh em em kan unaute tan hian ke i pen chhuak teh ang u khai. He ‘Mission for Mamit’ programme hlawhtlinna hi i kutah a awm ta a, a hlawhtlinna tura i inphal a nih chuan tun atangin ZONET Office-ah Office hun chhungin a thehluh theih reng a ni.

Zaithiamte pawhin nithum chhung Carol- in an vakchhuak tawh a, pawisa fai cheng nuai 1 bawr vel mi inphal te hnen atangin an dawng tawh. Thawhtanni lo awm tur hian Mamit ah zuk hlan tum ani.

He mission atan hian Gospel Singer te pawhin khawlaiah leh Inah carol an tum bawk. Carol tura sawm duh tan pawh sawm theih an ni. I tanpuina, kan Mizo unauten an mamawh e. Hrechiang duh tan Ph No. 9862247264 / 2346000- ah zawh fiah theih a ni. He Mission tih hlawhtlin nana Gospel Singer, che chhuak thei tur apiangte chu heng no. 9862247264 / 9862368012- ah te hian inhriattir turin Mizo Gospel Singers Fellowship, Mizoram chuan a ngen a ni.

Zaninah Manuna (Hardray) album thar tlangzarh dawn

2010-10-13T20:33:00.000-07:00

Band hriathlawh, HARDRAY-a an zaipu Lalnunkenga (Manuna)solo album hmasa ber, ‘Chapter One’ tih chu October 14, Ninga zan dar 7 hian Chanmari YMA Hall-ah Manun-a nu, Pi Rengthanzauvi chuan a duh a piang ngaihthlak theih turin a tlangzarh dawn ta. Solo kawng a zawhnaah hian inthlahrunna em em a neih loh thu leh band member dangte’n thinlung taka an phurpui zawk thu Manuna hian a sawi.

“Solo album ka siamna chhan bera chu, tet te atanga single album neih ve hrim hrim tumna, naupangte ka nih lai atang tawha ka thil tum pakhat a ni ve a. Solo album avang hian band member te nena inkarah buaina engmah a awm lova, a hming ka tum a ni mai a, music hi ka thiante khawih vek a ni. Hemi zan pawh hian band angin kan inlan dawn nghe nghe,” tiin Manuna hian a sawi.

Tunlai angah album tlangzarh thawm hriat tur a awm meuh tawh lova, artist te zingah album tihchhuah tum tawh lo an kat nuk laia, huaisen taka a kalpuina chhan chu thian tha leh duhsaktu an tam em vang a ni a ti.

Duhsaktu te vangin zam lo
“A hlawkna ang zawnga hisap chuan a huphurhawm ve tho mai a. Mahse, thiante leh duhsaktu an tam ve a, ‘ka lo lei sak ve ngei ang che’ titute vang liau liaua kalpui thei ka ni a. Min duhsak tute zarah kan tipuitling ve thei dawn ni berin ka hria,” a ti. Album tlangzarhnaah hian a hmuna kalzawng zawngte chu khuallian an ni nghal mai dawn a, mi zawng zawng a sawm nghe nghe. He hun hi LPS-a ‘Chibai Mizoram’ puang thin, Zikpuiin a kaihruai ang.

Album preview hi David Z. Hmar (Dream Hunter) in a nei ang a. Lallawmzuali Khiangte leh Lungmuana te an zai anga, hriathlawh chhoh mek St. Paul zirlai leh lamthiam rual ni bawk, ‘RETROZ’ te an inlan dawn a ni. Manuna hian a music video thar, ‘Min tihlimtu’ tih chu demand channel-ah a dah tawh nghe nghe a, he album-a hla 8 vel hi amah phuah liau liau a ni bawk. ‘Engtin lo ngai ang maw’ hla hit tak phuahtu album tlangzarh tur hi mi tam takin an ngaihven hle tawh a ni.

KHUALLIAN BULA HMEICHHE DIN HI A TUL BER EM?

2010-10-13T20:25:00.001-07:00

A tulna ka hre lem lo khawp mai. mizo hi chu hnam phungthlu tih
takah kan phungthluk vang mai mai niin ka hria. mahse, eng open
air, dawhsan velah ni sa char/ruah sur etc. karah hulhliap awm si
lo se, nihliapte an lo ken sak anih chuan thuhran. a bak chu a
tulna ka hre lo. Kan “PHunGTHluK” vang mai mai ni berin ka hria
: C SANGA

A tulna ka hre lo. Kan ram sumpai dinhmun chhiat zia atangin
eng-kim kan teh tur a ni a. michhe lutuk inla ‘high’ ve ringawt te
kan ngaihdan atangin a nuihzatthlak! Ding tura tih hmeichhiate
tih-hniamna hi a tha lo lai ber a ni: RUATFELA NU

Thil pawi em em leh thil tha lo taka sawi tur chu niin ka ngai
lova. amaherawhchu, thil tul tak pawh ni lemin a lang lova. Fashion
show leh entertainment ngau ngau function-ah te hi chuan
model te leh hmeichhe hmelthate’n designer te nen inkaia an lo
chhuak hi chu kan hmu teh meuh mai.
Tin, entertainment leh commercial advertisement function
(product launch, film release etc.) angahte chuan a changtu milar
leh star te chu an tilartu atan an tel ngei ngei a tihtheih ang.
Hotel changkang, five star hotel-ah te chuan mikhual tha lawm
nan a thawktu hmeltha deuhte’n parthi nen mikhual an lawm chawk
bawk. Tin, khawchhak lam- indonesia, Thailand etc. hian engemaw
nikhuaa hmeichhe hmeltha tarlan hi an uar em em a tih theih a.
engpawhnise, entertainment khawvelah chuan awmviau
zelah ngai ta ila, mi mit la leh hip thei ang bera thil huaihawt kha
an tum ber a ni miau a, world news enthin chuan lo chik ta ila,
sorkar thil pawimawhah khualliante hmeichhe hmeltha lo tarlan
ve hrim hrimna hi chu a vâng hlein ka hria.
Tin, thil pakhat an tarlang tel bawkin ka hria. mizo te hian a
hun leh hmun thlira thil tih awm leh awm loh hriatna kawngah
hmasawnna tur kan la ngah tih hi.
Hetianga khuallian dinnaa nula kan lo tarlang ve fo mai hian
kan khuallian te a tizahawm lo mah mah emaw a tihtheih a ni
: LALNGENGPUII TOCHHAWNG

He chin dan hi khawvel hmun dangah an ching uar em ka hre
em em lova. mi in an duh tlat anih chuan ka sawisel lova, mahse
thusawitu dinpuitu nih hi ka peih loh tur tak thil a nia. nisa hnuaia
an han ding reng mai phei hi chu ka lo khawngaih thin.
Tu han chin chhuah nge maw ni reng reng. Khuallian khan
dawhsana zamna (stage fright) a nei tlat a, an awm ve reng tul a ti
anih chuan thudang ni se. Khawng taka sipai ang maia an lo din ve
reng hi tul ka ti lova, dawhsana an va hruai, khuallian kha a thusawina
hmun tur a thlen tawh chuan, an ni kha chu kir leh mai se.
Duh leh khuallian thusawi, tih tur a tih zawhah han hruai leh
mai se, tih hi ka ngaihdan a ni e: REBECCA SAIMAWII

Tul ka ti lo lutuk, khatianga hmeichhiate an dintir kha, an
khawngaih thlak ka ti tak zet zet. mi ramah khawiah mah an ti
ngai lova, kan ramah chiah kan ti thin ni maiin ka hria. Hetiang thil
hi tu tihchhuah nge ni a, tute chinchhuah nge maw ni dawn, a
mak ka ti a, ching tawh suh se.
Hmeichhiate an tizahawm lo zawk ka ti a, he thil hian kan society-
ah pawh nghawng tha lo deuh chu a la pawchhuak ngei ngei
ang. Ka ngaihdan dik tak ka’n sawi anga, engemaw funciton i lo
vela, thusawitu bula lo din ve hian ka nuih a za tlat a, thil
phuahchawp leh intih ropui tumna a ni. Thu an sawi rei leh an
ding rei a ni mai a, he ngaihdan thlawptu pawh hi an tam khawp
mai. an sawi rik hi ka hre fo ani.
engvanga hmeichhe din tir nge an nih a, engnge a tulna chhan?
Hetiang hian ngenna ka siam duh a, thil tul lo leh hmeichhe zahawmna
thlenga tihbawrban theihna hi tihtawp ni thei se ka ti a,
hmeichhiate pawhin hetianga sawmna leh ngenna an dawn pawhin
hnar ngam tawh se, ka ti khawp mai: NGURTHANGVELA

A chang chang chuan a tha ve tho a lawm ka ti a, a zawng a za
erawh chuan mite hian mizo hmeichiate hi hman lutuk leh pawn
lama inhmang tam lutukah min ngai ang tih ka hlauva.
Hnam thil bik angah te chuan nalh tak taka kan nulate an han
inchei a, an inlan te hi hmuhnawm ka ti a, a zawng a za a, engemaw
function awm deuh hleka an han inphochhuak nghal erawh
hi chu a hmanthlak lutuk em aw ka ti.
Ti ve khang lang ila, kan hun lai kha chuan hetianga thusawitu
bula hmeichhia ding thina hi an awm ngai lova, engtik hun lai atanga
an chin chhuah nge pawh ka hre chiah lo. Thusawitu bulah hian
hmeichhia ni lo, mipate pawh hi ding ta se, a zahawm zawk mai thei.
Ka hlauhthawn bera chu, hnam dangte hian hman min ti lutuk
ang tih hi a ni a, thusawitu bula kan hmeichhiate an ding thin hi a
nihna takah chuan ka rilru a kamna hi a rei tawh a ni: VANHLUPUII

Mipui hmaah kan ding ve ta fova, chuta ka lo tawnhriat
tawhna atang chuan mipui boruak zawh loh leh zam chang hi ka
nei ve fova. Chutih laia, dinpui an awm hi chuan tlem chuan a
nuam ve khawp mai. ni e, nuam ka ti a, mahni inrintawk pawh a
awl khawp mai.
a tul lo zawng pawhin a sawi theih thova, thil tul lo lutuk kan
ti te pawh a ang ve thei thova, sawisel dawnin sawisel tur em em
ka hriat hran loh laiin, an tel lo pawhin a tihtheih tho ka ti.
He thil hi chu a nihna takah chuan, a buatsaihtute khan tul-a
an hriat chuan sawiselna em em ka hre lova, lehlamah chuan inchawimawina
te pawh a ni ve thei thova, a tihropui theihna lai te
pawh awm ve tho chuan ka hria. Thil tul berah chuan ka ngai hran
chuang lo: MALI (LPS)

CWG-A MIZO NULA CHETSUALNA DEM CHI AH NGAI LO

2010-10-13T20:20:00.000-07:00

Zo rimawi khawvela gospel singer lawmhlawh berte zinga mi a ni a, leitlangpui nula duhawm tak ni bawk, Pensy hian a tet te atanga Mizo lam a zir thin thu leh hnam lam te hi a thiam deuh vek thu a sawi a. Tunhnaia Common Wealth Games (CWG) hawnnaa cheraw kan zinga tel kan nula pakhat chetsualna chu thil thleng thei reng a nih thu leh, demna tur engmah a hriat loh thu a sawi bawk.

"Ti ve khang lang ila, kan naupan ve lai chuan kan Inah hian YMA hruaitute'n min kawikhawm peih bawk a, lam chi hrang hrang kan zir a, naupangte ka nih lai atang tawhin Mizo lam chi hrang hrang hi ka thiam deuh vek a. “Amaherawhchu, Cheraw tak hi chu Nagpur-a kan lâm tih loh kha chu Mizoramah hian ka la lâm miah lova, hun remchang a awm thin loh vang a ni ber.
"Class X ka nihin hostelah ka awm a, 11 leh 12 hi Shillong-ah ka zir leh a. BA atang khan rawngbawlna hrang hrangah kan fehchhuah bawk avangin hun remchang a awm thei meuh lova, Cheraw kan ngat phei chu remchang a awm phawt
chuan ka kan châk khawp mai," tiin nizan khan Pensy hian a sawi.

Dem tur a ni reng reng lo
"CWG hawnnaa thil thleng kha a pawi hle-in ka hria a. Ka bula sawichhe bawng bawng leh demna te pawh ka hria a, sawiseltu an awm laiin, lainattu leh khawngaihtu pawh an awm tho.
“Kei pawhin khawngaihthlak ka ti a, engangpawhin inpuahchahna tha mahse, tihsual changte hi chu ka nei ve thin thova,
keini pawh kan lam thin a, tha deuha kan inpuahchah emaw kan tihte kha, a hunah chuan tihsual palh te a awm lo thei lo. Kha kha chu vanduaileh vannei inkar a ni ve mai a, ka dem hran lova, inpuahchahna that tawk loh vangah pawh ka ngai lo."

Hawh u, i zir ang u
"Puantah thiamte hi a tha em em a, chutih laiin tunlai hunah chuan zir dawn ta ila, harsatna te pawh a awm thei a, thiam vek theih pawh ani lo mai thei bawk. Chutih laiin, hnam lam te hi chu kan thiam thei a, a tam thei ang berin thiam tum bawk ila tha ka ti.
“Kan hnam thil a ni a, Mizo kan nihna anga kan hnam thil pholanna pawimawh takah hian lam hi a tel miau avangin hunawl leh remchang a awm chuan lam hi zir ngei ngei ila.
“Thiam tum bawk ila, ram leh hnam hmangaihna pawh a nasa zual sawt ang tih ka ring tlat a ni," tiin Mizo zai mite zinga hnam lam thiam hnem ber pawla sawi Pensy hian a sawi

FM Zoawi Award a hnai ta!

2010-10-10T01:29:00.000-07:00

All India Radio FM Zoawi chuan a vawi-khatna atan FM Zoawi Award, 2010 chu October 22 zan hian Chanmari YMA Hall-ah ropui takin a sem dawn ta.
He award hian trophy, Certificate leh sumfai a keng tel dawn a. Zoram dung leh vang fanchhuak thei, FM Zoawi hian SMS hmanga vote hawn hun an siam, September 13 atanga October 1 thleng khan SMS 87,172 a lut a, chanchin buat-saih lai hian nuai a hawlh thuak nghe nghe.
Kum hnih liam ta, August 15, 2008 khan FM Zoawi hi hawn tan a ni a, a tir phat atangin ngaihven a hlawh mai ni lovin, hlut a hlawh nghal hle a, hei vang hian nikum October 9 atang khan chhun lam programe hial siam belh a ni. Tuna a lan danah phei chuan ni-khatah SMS hi sangruk chuangte an dawng thin.
Award semna tur atan hian organising committee pawh an inbuatsaih chho mup mup tawh a, trophy phei chu an chah fel thlap tawh a, RJ duhawm leh zei tak takte pawh an insangmar tan ta. Hemi zan hian 'aw' chauh hriat theih a, an hmel hmuh theih bawk si lo te chu, a takin an inlar dawn a, hmaih phal chi a ni lova, kal loh phahnana hman tur chhuanlam siam phei chu, sawi thui lo mai ang. A hmunah inhmu-khawm tak tak teh ang u.
Tin, tuna FM RJ-te zinga mahni duh ber leh duh chhan thawn theih reng a ni bawk e. FM Zoawi award hi SMS hmanga thawn tur a ni a, a thawntu te'n a tirah FM Award tih chhu hmasain, mahni hming leh address chiang taka chhut lan bawk tur a ni.
SMS thawntheihna no. chu 9539011424 niin, October 15 thleng hawn a ni.

FM Zoawi Award-a category awm te
Hranghlui mipa zaithiam tih ber
Hrangthlui Hmeichhe zaithiam tih ber
Tunlai mipa zaithiam tih ber
(Hei hian Pathian hla leh Lengzem hla a huam ve ve a ni)
Tunlai Hmeichhe zaithiam tih ber
(Hei hian Pathian hla leh Lengzem hla a huam ve ve a ni)
Hla hlui duh ber (for Composer)
Tunlai Lengzem hla duh ber (for Composer)
Tunlai Pathian hla duh ber (for Composer)
FM Zoawi programe ngaithla tam ber (Top Ten)
FM Zoawi City Award
(Khawkhat atanga FM Zoawi programe ngaithla tam ber award a ni a, Mobile no. hrang hang SMS thawn hnem ber atanga thlan tur a ni ang)
FM Zoawi duhsakna tawngkam mawi ber award (Top Ten)
(He duhsakna tawngkam hi mahni irawm chhuak ngei a ni tur a ni)
Khawkhat atanga FM Zoawi Award semna a rawn tel hnem ber Award

Ngopa & Mamit-a chhiat tawkte tanpuina tur Tribal Power Foundation Charity Concert

2010-10-07T00:09:00.003-07:00

Tribal Power Foundation chuan tunhnaia Ngopa leh Mamit-a leimin/khi vanga chhungkaw tam takin harsatna na men lo an tawhna hrereng chungin, chhawmdawlna leh tanpuina an dawn belh zel theihnan tiin, November 5, zan dar 7 hian Vanapa Hall-ah hemi pual hian charity concert neih an tum.

Ngopa leimin/khi avang hian chhungkaw tam tak chu an rum tak meuh meuhva, Mamit ah phei chuan chhungkaw 56 vel zette chuan In leh lo chânin, chenna tur mumal pawh nei lovin remchan dan ang angin, mi In luah leh chhungkhat laina te belin an awm a. Chhungkaw tam zawk chu Hall -ah te, relief camp- ahte an khawsa naw naw a, an dinhmun a tha lova, hmun hrang hranga awm Mizo mipuite hian an lainat a, chhiat an tawhnaah hian thinlung takin an tawrhpui em em bawk.

Mizo te hi thisen zawmpui ni lem lo, Haiti leh Tsunami tuarte tan pawha mi inphal tak kan ni a, hetih laia Mizo mipuite tawrhna phei hi chu Hnam-a kan chian leh chian lohna a taka entirna tur hun pawimawh tak anih tih hriain, Tribal Power Foundation chuan hetiang hian charity concert hi huaihawt a tum ta a ni.

He hunah hian band hriathlawh tak tak- Dream Hunter, Tribal Power & Bad Combination, Hard Ray, Forever Young, Er. F.Sanglura Band, Lushai Brigade leh Albatross te an inlan dawn a. Mimal angin- Mami Varte, Mimi Renthlei, F.Laldinmawii, Michael M Sailo, C.Sanga leh Lungmuana te an inlan bawl ang.

Charity concert ticket man hi R 500-100-50 te a ni dawn a, ticket hralhna pawisa lut zawng zawng hi a bo a bang awm lova Mamit leh Ngopa leimin/khi tuarte tanpuinan hlan vek a ni dawn a ni.
Zoram mipuite'n a hmuna kal kher lova kan tanpui ve theihna hun remchang a ni tih hria a, ticket hi tlawmngaia lei theuh tur leh concert hi chhim ve ngei turin Organiser te chuan thinlung takin ngenna an siam.

Mathleng-a a Accident, kutzungtang pahnih tliak!

2010-10-06T23:50:00.000-07:00

Accident a tawh avanga taksa ‘fitness' lama dinhmun ngai la awh chiah lo Mathlenga chuan thianleh ian an insu dawn tih hrereng chung-in an kaltlangpui lui ta thova, thian leh thian infiamnaah chuan a na khawp mai a ti a, a kutzungtng pahnih a tliak a ni.

Thil thlen dan sawichiangin Mathlenga chuan, "October 2, Zirtawp zan khan a ni a, a la tlai lem lova, dar 7-8 vel ni ta-in ka hria. Ka haw lam chu scooty nena rawn tlan nen kan insu bur mai a. Ka kutzungtng pahnih a tliak a, ani erawh a beng a thler a, a khabe a kak bawk. Ngaihtuah awm chu a ni lem lo.

Kawng chhia hel-na lam-a insu kan ni a, kawngchhia a rawn hel a, kei lah kawng ta chuh ve tho kha ka lo ni bawk si a, kan ri ta bur a ni. A zia lo khawp mai a, vanneihthlak takin kan hliam na lo hlauhva, tu emaw tihnak a laia ka tian-pa a lo ni lehzel chu mak ka ti khawp mai," a ti.

Hetih lai hian, a nupui nena hun hlimawm tak an hmang mek a ti bawk a, a chunga a thatna leh a enkawl danah vuina tur reng reng a hmu lo nia sawiin, "Kan nu hi a fel em em a, min dawm a thiam hle bawk. Mahni nupuite thu chu kan zawm lo thei lova, kan chungah an that em em hi chuan sual reng kha a theih miah lova, a zahawm a nih chu!," a ti bawk.

Comedian Search 2010 atan C.Lalduhawma

2010-10-05T00:11:00.001-07:00

Beisei lawk ang ngeiin 'Comedian Search-2010' chuan Zoram dung leh vang a tuam hneh hle a. October ni 2 zana final intihsiakna pui takah C.Lalduhawma, Durtlang Mel-5 chuan, 'ber' nihna a hauh ta.
‘Thangkura pu’ tia hriatlar, C.Vanlallawma inhnuhdawknaah thilah khan judge pakhatin an chhungkaw chungchang a kah vang ni awma sawi erawh thubelh-chian dawl lo a nih thu chief organiser, Mapui-a'n a sawi.

Heti zawk hi a ni
"Khatiang lam zawnga sawi awm leh thu vawrh-darhna thleng kha pawi kan ti a, Pu Lawmtea khan thangthar zawkte ken a tul nia a hriat vanga rilru pui-tling taka inhnukdawk mai kha a ni a. Judge-ina comment a pek emaw infiam sual vanga thleng nia sawi hi thu dik lo a ni a, amah Pu Lawmte ngei pawhin min hlut pui hle a, final zan thleng pawh khan min tawiawm a ni," a ti.
Tun tum hi 'Comedian Serach' vawi thum an huaihawtna a ni ta a, chutih laiin a hmasa ber boruak kha a pui ber nia sawi a ni. A Vawikhatna a nih avang-te, a tel-a te kha an hraw bakah, originality an nei tha deuh vek a, an tawnhriat atanga sawi thei deuh vek leh sawi tur ngah em emte kha an ni hlawm.

Hei lo liama hmasawnna
Nikum khan an tha hle a, kuminah erawh fiamthu te a lo changkang chho telh telh a, mipui pawhin an hlut telh telh bawk. Tunhmaa fiamthu thiamte kan hmuh dan leh en dan pawh nasa takin, 'Comedian Search' hian a tihdang-lam phah a, Mizo mipuite pawhin hmasawnna lamtluang kan zawh chho pawh ti ila, a sual lovang.
Comedian Search-a an puipa pakhat chuan, "Fiamthu-ah kan sâng telh telh a, mipui pawhin kan hlut mai piah lamah thil pek, pek a, lawmpuina changte kan hre zel a. Fiamthu thiam-te pawh kan dah sâng tih a lang chiang hle-in ka hria,' a ti ve bawk.

Hei erawh a pawi...
Chutih laiin, thil lawm-awm lo leh a buatsaihtute rilru tihnual nghal rawih rawih thei thilte pawh a inzep nual nia hriat a ni a.
Chutah chuan, 'Thurawn inpek theih' tih a nih laia, mimal inhuatna leh inbeih-na ang chi lo lut hnem em em thin chu a buaipuitute hian zia lo an ti a, 'Chumi kha mi sawiah, in nui ring bik' tih ringawt pawh tam tham tak an dawng.
Hemi chungchangah hian an puipa pakhat chuan, "Thenkhatin thurawn tha tak tak min pek laiin, thenkhat erawh a mimal thil ngawih ngawih a, hlawkpuina tur engmah awm lo te a ni a, keini thlengin kan rilru a nawm loh chang a tam mai a, hei hian min tihah deuh," a ti.
Rokhawlhna dang a awm loh chuan nakumah ‘Comedian Search’ hi neih chhunzawm tum a ni.

Comedian Search 2010, C.Lalduhawma kawmna
Pakhatna nih i inbeisei reng em?
Intihsiakna neih tan tirhah kha chuan ka beisei lo na a, final zanah kher kha chuan ka 'confi' khawp mai. Zoram-a din hnu-ah ka inlan kha a ni a, Zorama nena inkhing deuh ber kha kan ni bawk a, pakhatna nih ngei kha ka lo inbeisei daih tawh a ni.

Tlak hlauhawm deuhah te i ding em?
Top 10 atanga Top 5 an thlan dawn khan, ka hlauhthawng ru ang reng khawp mai a. Mi thenkhatte chuan 'I ti tha lutuk' an ti na a, keimah khan tichhe tlata inhriatna ka neih avangin kaisan ka inring lo.

Engtinnge i fiamthu te hi i remkhawm thin?
Hetia ka'n lenkual velnaa mi thusawi ka hriat te, rilru-a lo lang leh nawlh thin angte, party leh milar thil tihna thlengin ka ngaihtuah ve nasa thei hle a. Chungte chu ka'n cheimawi a. Tuna ka fiamthu thawh 30% vel hi midang hnen atanga ka lakchhawn a ni a, a bak 70% vel hi chu 'original idea' te pawh ti ila, ka sawi sual lem lovang.

Eng lamah nge chetha ber nia i inhriat?
'One liner' lampang hi ka chetthatna niin ka inhria.

Khawtlang mipui lo dawnsawn dan che?
Pui tak a ni. Result an puan hma atang tawh khan Zarkawt kawn chu an khat ti tih tawh mai a. Lirthei awm ang zawng zawng nen kan ri chho mup mup. LPS office atang ka chhuak phei kha lei pawh ka rap mumal hman lova, min koki chhuan nghal tawh mai a ni. In-ah zing dar 3 vel thleng chu kan la khat tha hle a, min duhsaktute chungah ka lawm em em a ni.

A lawmawm em mai a, sum leh pai i dawn dan te sawi a rem em?
Rem teh reng mai. Min duhsaktute a zarah (nimin chawhnu) pawisa faia kan dawn hi pakhatna lawmman nen belhkhawmin cheng singriat chuang a ni a. Bungrua (material) dang nena chhut phei chuan nuai 2 a kai hial kan ring.

Pakhatna ni ta lo la, tunge pakhatna ni ngei tura i rin?
C. Lalrinawma kha ka ring ber a, mahse SMS a hmuchhe deuh niin an sawi a, pawi ka ti khawp mai.

Pakhatna ni tlakah i inngai em? Engvanga pakhatna ni thei nge nia i inhriat?
Keima tawka ka lo inbuatsaih ve-na atang chuan inngai ve deuh tho e. Pakhatna ka nihna chhanah hian Pathian malsawmna te a nih rualin, inpuahchahna ka nei \ha em em kha niin ka inhria. Ni leng lengin dar-thlalang hmaah ka zir tak tak thin a, ka fiamthu te pawh hi ka ning hlui tak tak hman a, mahse chu chu ka hlawkpui em em bawk si a ni.

Tel tum chiah lo, tel leh thut kha niin kan lo hria che a...
Ni e, a nihna takah chuan, nikum hmasa atang tawh khan tel ve ngei tum thin kha ni a, mahse ka tel ngam \hin lova, tun tumah pawh hian min duhsaktute'n min tur deuh vang chauha tel ka ni.

Tel chak, tel ngam lo tam tak an awm bawk si a, 'hope' awm i ti em?
Ti teh reng mai. Tel chak tak tak hi an tam a, mahse an tel ngam si lova. Tel ve tawp hi a fuh berin ka hria. Eizawnna bul tanna pawh a tha dawn hle-a hriatna ka nei bawk. Midangte pawh ka fuih duh a, i tel ang u. Kumthar lamah an buaipui leh turah ngai ila, Mizo mipuite pawhin fiamthu thiamte kan hmuh dan a in-thlak danglam nasat tawh em avangin tel a manhla tawh a, keinin kan hlawkpui a, mipuiin an hlimpui bawk si a, chu chu a tha em em tawhin ka hria.

Nancy leh A AW B.... Z

2010-10-05T00:09:00.000-07:00

Amah (Pathian) faka zai hi ka ning ngai lo
Awmawl lutuk hi thatchhiatna bul tantu a ni
Buaina ka thaw chang hian ka tawngtai tam phah thin
Chhungte hauh ngaia awm loh hram ka tum thin
Duhthu sam kual vel mai mai hi nuam ka tih zawng tak a ni
Engpawh ti dawn ila, Pathian kan rawn hmasak thin pawht chuan hlawhtlinna kan hmu ang
Football hi sport-ah chuan ka ngainat leh thlir nasat pawl tak a ni
Ngaihzawng neih hi sualah ka ngai lo. Amaherawhchu, ngaihzawng neih vanga tih loh tur tih erawh sualah ka ngai thung
Hlim taka awm hi nuam ka ti a, chuvangin hlim reng mai hi ka duh thin
"I awm dan tur chu Lalpa chungah nghat la, amah chu ringla aman a ti vek ang" tih hi ka Bible chang duh em em leh ka innghahna a ni
JESUS CHRIST tih hi, hming a zawnga hming thiltithei ber a ni a, Isua hming lamrik anih chuan ramhuai te pawh an tlanchhe thin
Kristian nih hi thil zahthlak lo leh inchhirna thlen lo ber niin ka hria
'Love' tih hi Pathian meuh pawhin a ngai hlu hle a. Bible-ah pawh kan hmuh angin, 'Hmangaihna chauh lo chu tuma engmah ba suh u," min tih kha.
Mi care thei takte bula awm hi chu a nuam ngawt mai
Nancy tih hming hi US President hlui Ronald Reagan-a, ka chhungte'n an ngaihsan em avanga a nupui Nancy hming chawiin ka hming atan an phuah a ni
Octopus hi khawvelin a hre lar hle mai a. A sa ka ei ve tawh ngat a sin!
Pasal neih hi ka rilru-ah a la lang lian vak lo. Duhzawng ka la hmuh loh vangte pawh a ni mai thei.
Ring taka zai vak vak hi nuam ka tiin, ka hrat hle
Sunday Sikul zirtirtu ka ni a, naupangte'n Pathian an hnaih leh zualna turin theihtawpin thu tha ka hrilh thin
Taimakna hi hlawhtlinna bul ani tih hriain, thil ka tih reng rengah taima takin ka thawk thin
Tawngtai tam hi a inchhir awm loh zia ka hriat chian avangin engpawh ti dawn ila, ka tawngtai hmasa ziah thin
Uangthuang lehlutuk mihring hi chu ka ngainat zawng an ni ngai lo
Virginity hi tute tan pawh a hlu a. Kei pawh virgin ngeia pasal neih ka tum
Zai hi nuam ka ti a, Pathian faka zai theia ka awm ringawt pawh hi ka lawm tawk a tling.

A pasal MS-a chungchang a vawikhatnan sawi chhuak!

2010-10-05T00:07:00.000-07:00

Mi tam takin amahah beiseina an la nei a, an nghat reng bawk a, Pathian chakna hmachhuan chung leh amah duhsaktute tana theih tawp chhuah a tumnaah hian zam miah lovin a theihna zawng zawng nena amah hual hualveltu boruak chi hrang hrang tawn tlang a tum thute hetiang hian a sawi.

Mipui an thuhmun lo
"Tun thleng pawh hian mak ka la ti em em a, khatia harsatna ka tawh atang khan mi pahnih thum velin tawng-kam hmanga diriam taka min rel tih bak kha chu min tuar-puina leh min lainatna lam hawi deuh vek a ni.
“Nikum May thla vel atang khan Aizawlah kan inbengbel tan a, In-ah hian ka awm tam zawkna chungin khawi iloa kal chhuah chang pawh ka ngah ve thova, a tirah kha chuan min melh hrek hrek ang chite chu ka tawng ve deuh reng a, mahse huaisen takin ka pal-tlang a, hrehawm tihchang chu nei ve bawk thin mahila, ka tihtur tih loh phahnan leh thulh phahnan ka hmang ngai lo.

Hmalam pan zel dawn
"Mihring chu awm ngaia kan awm reng chuan kan tlahniam tihna a ni a, hmalam pan tum lova, ngai-awh reng pawh hi hma-sawnna a ni chuang lova, tlakhniam lam panna tho a ni. Ka chunga thil lo thleng avang khan indawmkun reng ka tum bik lova.
“Thil ka ti sual a, tuar chhuah hrim hrim ka tum a, hmalam pan zel ka tum a ni. Nun insiamthat zel a ngai a, engkim hi siam that leh theih vek a ni.
A tir leh a tawp dang zar
"Camp ka lut ve a, a tirah chuan hrehawm ka ti ngawih ngawih a, min en hrek hrek hlawm a, min en duh ang reng khawp mai. 'A van zak thei love,' tihte, 'Zahna châng pawh a hre lo em ni' tihte leh tawngkam dengkhawng tak tak pawh ka hre nual a, harsatna leh hrehawmna nasa tak ka paltlang thin a ni.
“Mahse, ni hnih bak min kap zui lo. Camp a tawp dawn meuh chuan engmah chu ni lo mahila, 'A huaisen hle mai,' 'A fakawm hle mai' tihte chu ka thu hriat leh-chhawn te an ni a, rilru hreh-awmna leh mualphona te kha mihring mihrinna atang chuan phurh zawh rual loh nimahse, min delh bet tlat tu atan chuan ka remti lo.

Inawhhlum a tum ngai lo
"Khatia chetsualna a thlen hnu-a thuthang mak tak tak maiin min umzui mek laia Zoram pum ang pawha sawi hlawh tak, 'MS-i a inawkhlum' tih kha a hun lai pawh khan ka hre ve vek a. Mahse, kha thil avang khan inawhhlum ka tum ngai lo hrim hrim a, a thuhrimah mahnia inawh-hlum hi ka tum ngai lova, ngaihtuah pawh ka la ka ngaihtuah chhin ngai loh a ni.
“Ka thil tawn avang khan nun beidawn vanga thih ka tum lo hrim hrim. Tuna ka thil tawn hi ka tan chuan inzirna tha tak, mimal ang pawha ka harhchhuahna a ni a, rilru puitlinna min petu a ni bawk. Lungngaih-na tur ang chi leh a thim zawng hlira thlir dawn chuan ka dinhmun tur chu ngaihtuah ngam chi pawh a ni lo. Mahse, ka ngaihdanah chuan keima tana tha tur vekah ka ngaia, tawrhna phena malsawmnaah ka chhiar lo thei lo.

Heti zawk hi a lo ni e
"Mi tam tak ngaihdanah chuan mi awmherh, tenawm leh sex lama uchuak takah an ngai ang. A lo nih loh zia erawh hun a lo rei a, ka hmu chho tial tial thung. Inngaih-zawng mai mai kan ni lo. Keimah bik angah phei chuan Icon hma khan 'star' te chu nei ve thin mahila, ngaihzawng bul fuk tak tak han tih tur ang chi ka nei ngai lo. Kan pa chungchang kha sawi leh ta ila, amah hi a lo tawng duh ve a, a fel em em a, ruihtheih thil reng reng a ti lo.
“A ha a fai var thin a, a ka chhungte hi a fai em em mai a, kei ai paw'n a fai daih zawk. A thuhrimah ruihtheih thil reng reng ti lo hi ka mi ngaihsan leh ka duhzawng a ni a, tun hnu hian kuhva te hi a ei ve a ni mai a, kan inngaihzawn lai khan zial leh kuhva tak ngial pawh a khawih lo. Kohhranah te pawh a phak ang tawk tawka inhmang tak a ni a, an phuar dawn pawh khan Kohhran upate paw'n hrehawm an tih thu leh pawi an tih zia an sawi chhuak hial a ni.

Ama chungchang a sawi chhuak ve ta!
(Hetah hian a chetsual hnu lawkah tunhma pawha 'ler' leh 'awm tha duh lo' anga puhna hrang hrang a awm a, hetiang hian a chhang zui nghal) Ler turin ka awm hman lo hrim hrim. Ka mizia hi a zawi a, ka awm ve naw naw a ni ringawt a, ka nu phei chuan, 'A a chi i ni' te min ti hial thin a, 'mawl' nih pawh ka hlawh fo. Kha thil thlen hnu lawk khan school ka kal laia kan zirtirtute pawh lo kalin, mittui tla zawih zawih chung-in an rawn tap a.
“Middle school-a kan zirtirtunu phei chuan, 'Kan pa (High school-a MS-i zirtirutu ni bawk) in mak a ti a, zirlai zingah pawh 'ze' tha ber pawl leh 'over' ngai lo leh zakzum thei em em mai hetianga i awm ta mai hi mak a ti hle a ni' a ti a. Chhungkua angah pawh unau zinga mize tha ber, midang zawng hi an ler ka tihna ni miah lovin, min rin ber ka ni a, hei vangte hian a lawm, tun thlenga ka chhungte rilru na pawh a reh tak tak theih loh!
“A hnu lama min beih zuinaah hian mahni intihnat lehzual ka tum lova, ka thin a rim lova, engtin paw'n min sawi rawh se, beih let emaw chhan let reng reng ka tum lo. Thudik chu nakinah a lang leh mai ang.

Congress chak tur NGTV-a'n mumangah hmulawk

2010-10-04T23:51:00.000-07:00

Ngurthangvela (NGTv) a ni. Mi tam takin an hlimpui laiin tam takin an nuih sawh a, mahse tumahin an hmusit zui ngai lova, an ngam bawk hek lo. Famkim lo mihring ve bawk a nihna laiah mumang lama hriattirna leh hmuh tirna a dawn thin pawh a sawi chhuah ngam tak tak loh chang a tam a, Mizoram damna tur leh dinchhuah lehna tur atana chung lam atanga hriattirna a dawn te bakah kohhran leh khawtlang thilah te, ama irawm chhuak ni lova, thlaraua pawlna a dawn vang zawka thu tha tak tak a dawng thin a, mak takin a takin a lo thleng zui leh mai thin.
'Ngurthangvela' tih aiah 'Mang neia' tia an koh tum pawh hi a chhiar seng tawh bik lo. 1988 khan Mizoramah hurna hri leh mipat hmeichhiatna chung-changa thil duhawm lo tak tak lo thleng turte hmuh tirin a awm tawh a, UPC inthen darh tur pawh hi August 25, 1990 zan khan chiang taka hriattir a lo ni tawh bawk. Chutiang zelin, Pu Lalthanhawla kaihhruai Congress-in hneh takin rorelna fawng an vuan leh dawn tih pawh hmuh tir a ni.
A bak sawi tur pawh a nei nual a, mahse tun atan chuan sawi chhuah vek tul a la ti hrih lem lo te pawh a ni ang, tun tumah hian CM Hawl-a chunga thil lo thleng tur mumang lama hriattir a lo nih dan chu rei tak a ngawih bo pui hnuin a pholang ta hlawl mai.

Congress an tling leh dawn tih hi eng hun lai khan nge hriattira i awm?
January ni 30, 2007 khan. Tun hma pawhin vawi hnih ka lo hmu tawh a, hemi zan hian tihchian lehzual a ni ta a ni.

Mang lamah khan i hmu a, tunge i sawipui hmasak ber?
Khami zan khan mumang mak tak mai ka nei a, kei pawhin mak ka ti a. A hnu deuh mai khan John Rotluangliana, Deputy Speaker nupuia nu Pi Ropuii bulah ka sawi chhuak nghe nghe a, mahse ani pawh khan a awih lutuk chuang lova, a hun lai boruak nena thlir kha chuan awih harsa anih theihna lai te pawh a awm te pawh a ni ang. Kei chuan, "Pu Hawl-a a lal leh dawn" tih chiang takin ka hrilh a, mahse ani chuan, 'Ani dawn emaw ni le, MNF an la chak em a," tiin a rin chiah loh thuin min chhang a, mahse hmuh tir leh hriattirin ka awm tlat mai bawk si a, midang phei chu ka sawipui lem lova, keimahin ka vei tlut tlut thung a, ka rilru-ah pawh a khat liam ve thin khawp mai.

Engtin chiahin nge i hmuh?
Mipui sang tam takin Pu Hawl-a hi an lo zui luih luih mai a, a mak a maka tam hian Lammual-ah an lo zui lut hum hum a, an au nasa hle bawk a, an ri hum hum ni berin ka hria. Chumi tum chuan, 'Mi zawng zawng nen inremin lo awm rawh u tih leh ‘Inti thianghlim rawh u' tihte'n kan au a, 'Mizoram Pa i ni leh dawn, dikna laltiang keng ang che, thil tha lo titu zawng zawng chu timualpho ang che' tiin kan aurual bawk. Pu Hawl-a chuan amah zuitute leh amah hmuh tuma lo kal mi sang tam takte chu tha taka lo dawng sawngin riltam leh eitur nei lote chu an ei leh in tur te a lo pe a. Chutiang zelin, hmun hrang hrangah an zui a, "Dam reng rawh se" tih leh thupui dang dang an siam te chu an auchhuah pui nasa hle a ni.

Pu Hawl-a chuan sawi a nei em?
Aw nei e, thu tam chu a sawi lem lo nain, "Pathianin nasa takin Mizoram hi mal a sawm dawn a, chumi atan chuan kan inpeih a ngai" a ti a, ring tak taka mipuite au turin a sawm bawk a. Ka bula lo ding ve mipakhat chuan, "Lalna leh thuneihna hi pek ani dawn a, chu chu an lo puang lawk a nih hi," a ti a. Inthlanpui lo awm turah hian hneh taka thlantlin a ni dawn a ni a ti bawk.

Vaukhanna thu sawi te a nei em?
Aw. Chuta ka thil hriat pakhat, tun thlenga ka theihnghilh theih loh chu - Congress sorkar hi hneh taka thlan tlin a ni anga, Pu Hawl-a hian a kaihruai dawn a, amaherawh-chu 'Pathian leh mipuite rawng bawl lova a chapo anih chuan a chapo ni la lain paihthlak in a awm nghal ang' tih hi a ni. Pathian hian mi chapo hi a haw hle si a, engtiang khawpa thleng sâng leh ropui pawh ni se, mi chapo te hi paihthlak in an awm leh thin.

He thil hi engvanga sawi chhuak lova rei tak i thup?
Ni e, khatianga mumang ka neih hnu khan ka up char char a, ka ngawihbo pui char char a, amak ka tih em vang khan a ni a. Chu bakah khatih lai chho vel khan Congress chhungkua pawh kha an buai deuh lai a lo ni zel bawk nen, ka sawi chhuak nghal mai bik lova, midang pawh ka hrilh lem lo bawk.

Engtinnge Pu Hawla te'n an lo hriat?
Ka hre bik mai lo, mahse Pi Ropuite hnen atang khan engtin tin emawin an lo hria ni mai turah ka ngai a, kum khat dawn a liam hnu - 2008 kumtir lam bawk kha niin ka hria, a hun leh ni tak erawh ka sawi chiang thei tawh lo. Pu Hawla nupui Pi Ri-i hian min rawn phone a, thil awmdan te kan sawi dun hnuin, "Engtinnge ni ang, tawngtai-puina te kan mamawh a, kan inah nge tha anga, in in lamah kan lo kal zawk dawn?" a ti a, kei chuan "E... kan inah chuan ni love, nangmahni in ngeiah ka lo kal zawk ang," ka ti a. Mahse, chuti maiin ka hman remchang ta si lova, Pi Ri-i hian vawi thum min rawn bia a, hun remchang hmasa berah, zing dar 5 velah an inah ka han kal ta a ni.

Eng thil nge thleng?
An lo inpeih thlap tawh a, tam tak tan chuan ka thlen hun hi a la hmâ ang reng mai thei a, mahse an nupa hian mawi takin an lo inchei diam tawh a ni. Tichuan, an lu chungah kut nghatin ka tawngtai a, eng thil nge ka sawi chhuah a, ka chham chhuah tih pawh kha a rei leh ta deuh a, tunah mai chuan ka sawi chhuak thei ta bik lo. Pu Hawla te nupa pawh an mittui te a tla a, an tap a ni. An lu chunga kut nghata tawngtai kha a nuam em em a, an inpe pumhlum tih kha chiang takin a hriat theih a, a lang chiang hle bawk.

Chu chu, engtia sawi thei nge i nih?
Thenkhatte hi chu han tawngtai sak thin pawh ni ila, an mahni rilru-ah helna leh inpumpek tak tak lohna a awm thin avangin a tawngtaitu tan paw'n thil harsa tak a ni a, hei hi chu awlsamte a hriat theih a ni. Pu Hawla te nupa kha chu an inpumpek tak tak a, Pathianah intulut a, Thlarauah baptisma an chang tih kha a chiang em em a, ka tawngtai sak lai la la pawh khan keimahah chiang taka hriatna ka nei a ni.

Eng thil te nge in sawi dun?
Chutiangin, thu tam kan sawi lem lova, mumang ka neih chungchang leh hun tha an tan a lo inherchhuak leh dawn tihte ka sawi a, thingpuite kan inho hnu-in rei pawh thu lovin ka chhuak leh nghal a ni.

Congress an chak chiang hle a, Pu Hawl-a pawh CM a ni ta bawk a?
Ni e, mumang a takin a thleng tih chu hairual a ni lova, chung lam atanga hriattirna ka dawn pawh kha dawt a ni lova, hrilhlawkna tak tak a nih zia a rawn nemnghet ni-ah ka ngai bawk.

Inthlan zawh hnu-ah CM te nupa nen in inhmu leh tawh em?
Aw hmu e, inthlan result an puan ni khan, 'Khaw'nge an unau hnihin an tling bawk si a, ka va lawmpui teh ang' tiin ka va kal a, mahse mi an lo tam nasa mai si a, inbiak leh inkawmna hun tak tak pawh a awm thei ta lo a ni. A nau, Pu Zara ka chibai hmasa a, a hnu-ah an nupain ka chibai.

Engnge i sawi a, sawi te an nei ve em?
'I chapo vaih chuan i chapo ni la la-in paihthlak i ni ang' tiin ka hrilh a, Pu Hawl-a hi a nui deuh suk a, tawngkama min chhan erawh a nei lem lova, a bula awm a nupui Pi Ri-i chuan, "Kan hria a lawm" tiin nui deuh sang chungin min lo chhawn bawk a. Kha bak kha chu tun thleng hian hmai chhanah kan inhmu leh tawh lova, inbiakna pawh a awm lo.

Mumang a taka thleng chungchangah khan hriattpuitu che an awm em?
Aw, awm teh reng mai. Pu VZ Kaia (Editor, Aizawl Thupuan) pawh kha a awm ve a, kan inbiak dan leh kawm dan zawng zawng hrechiang tu a ni. Inthlan result an puang a, KS Thanga a tling tih hriat anih hnu lawk khan Pu Kaia hian phone-in min rawn bia a, "I tawngtai thu leh i mumang kha a takin a thleng dik chiah e," tiin min rawn hrilh a ni.

Gospel sa thin RP-i’n Love song sak tifuh-ah inngai

2010-10-02T12:29:00.000-07:00

Mihring ve tho ka ni a, hlawkna ka duh a, ka inchhir hran lo: RP-i

Zaithiam hriathlawh Lalropuii Pachuau (RP-i) chuan Mizo mipuite’na kan hriat lem loh, a nuna thil thleng sawi chhuahna a nei nghal a. Zai a tuipui chhoh lai chuan fakna hla a sak thin thu leh a chhungte bakah thiantha te’na lengzem lama inlet tura an ngen nasat em vanga lengzem huanga a inleh tak thute a sawi a ni. Chutih laiin, lengzem-a a luhnaah hian pawi tihna leh inchhirna em em a neih loh thu a sawi nghal bawk.

RP-i chuan, “Zai hi ka tui ve hrim hrim a, a tirah chuan fakna hla sa thin ka ni. Chutianga hriathlawh pawh ni lo mah ila, fakna hla sa-a sawi thin ka ni. Zostar 2008, Lungleia an buatsaih pawh khan fakna hla sak tum tho ka ni a. Mahse, min duhsaktute’n lengzem sa zawk tura min ngen nasat em avang leh ka pa ngei pawhina min duhsak bawk avangin ka inngaihtuah ve nasa a, thutlukna siam tura min ngen bawk avangin lengzem sa turin ka lut ve ta rawih a ni.

“Kawng lehlamah chuan rawngbawlnaah ka inhmang reng thei lova, inhlan pumhlum leh inpekna tak tak a nih lem loh chuan mihring kan ni a, sum leh paiahte pawh hlawkna duh tho kan ni a, lengzemah ka kal ta a, a tirah chuan hreh ve hle mahila, ka lut ve tawp mai a. Tifuh ka inti a, ka inchhir hran lo,” tiin a sawi.

Hetih lai hian, a hminga mi hriat hlawh chu nuam ti ve bawk mahse, ama chungchanga thu belhchian dawl lo leh sawichhiatna chi hrang hrang awm thina chu buaithlak a ti ve thei hle. Nimahsela, RP-i hian chhan let a tum ngai lova, “Ka chhan let chuan an mahni ang kha ka ni dawn tihna a ni a, ka tum ngai lova, ka duh lo bawk,” a ti.

Engtinnge ni zel dawn, Steward?

2010-10-02T12:00:00.000-07:00

Keimahni inkar thil hrim hrima ka rilru tina bera chu- Band puitling emaw ka inti a, chutah mumal lo taka ka chhuah ngaia kha a ni: Steward (Ex-Vocalist, MAGDALENE)

Mi tam tak zawhna, “Steward-a kha engtinnge a kal zel dawn?” tih chu a rik zin tak em avang leh mimal tak pawha amah tan em emtute hnen atanga zawhna a lo luh zut zut tak reng siah chuan khunkhan taka kawm a ni. Chutah chuan thil kal tawh te a ngaihtuah kir leh a, a rilru tina em emtute thlengin hetiang hian sawichhuahna a nei.

Hei erawh a chiang...
“Band-ah ka awm emaw awm lo emaw, chhungkua pawha rimawi ngaina leh tuichilh tak kan nih avangin thisen-ah pawh kan thanhnan a ni a, mimal ang pawhin ka zai dawn hrim hrim a, ka tuina anih miau avangin zai thei leh rimawi siam theia ka awm chhung hi chuan rimawi hi chawlhsan ka tum lo.
“Band-a kan awm ve lai pawh khan rawngbawlnaah ngaiin theih ang tawkin kan phusa ve thin a, a chang phei chuan chhungkaw thil pawimawh tak takah pawh band nena kalchhuahna zawk hi ka thlang fo a ni.
“Ka nu leh pate hi kum 70 an chuang tawh a, an anniversary ngei ngei-ah pawh band zuiin ka chhuak a, mi tam takin min dem ngei pawh ka ring.
“Amaherawhchu rimawi ah na na na hi chuan ka chhungte leh ka nupui (R.Lallawmzuali) pawh hian min thlawp em em a, harsatna min
siam sak ngai lo hrim hrim.

A nupuiin hrelawk
“Kan nu nen hian band din hmâ atang daih tawha inngaizawng kan ni a, band chungchangah pawh ani tluka hrechiang hi an awm kher lo mai thei. Tuna kan dinhmun chungchangah pawh hian Pathian remruatah a ngai a. “A hma atang tawhin he thil hi thleng thei ani tih a lo ring lawk tawh a, a barakhaih hran lo. Kei pawhin ka chunga thil thleng hi ka tana tha tur zawk a ni lovang tih ka sawi thei lo,” a ti.

A rilru a tina thar leh thin!
“Band atanga chhuah tir ka nih khan hrethiam lo hle mahila, hun a rei telh telh a, ka rilru pawh hi a dam ve tawh. Keimahni inkar thil hrim hrima ka rilru tina bera chu- Band puitling emaw ka inti a, chutah mumal lo taka ka chhuah ngaia kha hrehawm ka ti ber.
“Band member tam zawk an la awm a, an tawngkam ka hriat hnuhnung ber, ‘Keh darh vek ila ani mai a lawm’ tih bak kha chu engmah an hnen atanga hriat ka nei tawh lo. A nihna takah chuan, inkawmngeih em em, chhungte pawh kan in ‘close’ lutuk vek a, kan inkalsan dan mumal lo lutuk hian rilru chu a tina ang reng khawp mai,” tiin Steward hian a sawi.

Manuna duhsakna & khuahkhirhna

2010-10-02T11:17:00.001-07:00

Solo anga a kal anih chuan band hla a sa thei lovang: Mawitea (Hardray)

Mahni tawka an buai theuh tawh avangin band lar, HARDRAY tan hmalak tak tak a harsa a, an zaipu ber, Manun-'an ama puala album siam a, amaha kal hrih a tumna chu band hian inhawng takin an remtih sak. Chutih laiin, solo anga a kal dawn anih chuan band
anga an hla sak leh neih te hi a sak chhuah a remchang dawn lo thung a, hei hi chiang taka hrilh a ni nghe nghe.

Hardray band khaipa ber,Mawitea chuan, "Kan zaipu Manuna hian ama pualin album a buaipui mek a, kawng lehlamah chuan band anga zaina tak tak a awm chuang lova, a hrang a kal remtih sak loh ngawt se, mi eizawnna kan tihchhiat sak tihna a ni dawn a. “Chutih laiin, band angin min sawm reng thei bawk si lova, kan vaia sum hmuh loh ngawt ai chuan mi pakhat tal pawhina a lo tangkai pui theihna tur kha kan duhsak
em em a, ama pual bika siam hla a sa mai anga, band hla erawh a sa thei dawn lo thung,” a ti.

Music group/band an din chhuah tak tak theih lohna chhan nia a hriat pawh sawi nghalin Mawitea chuan, "Tun dinhmunah chuan rock band ngaisâng hi an tam tawh lo. Thalaite'n sum kan thawk chhuak tawk bawk si lova. Sapramah te chuan thalaite'n
hna an thawk nasa a, sum pawh an thawk chhuak hnem a, concert en leh Cassette
lei tur pawhin an intodelh. Keini chu top-up man tur tak ngial pawh chhungte kan la dil chawp a, chuvang chuan zaia eizawn hi tun dinhmunah chuan a hlawhtlin theih loh," a ti bawk.

Tualchhung bikah ngat phei chuan band hawh tur leh sawmn hi a namai lo hle a, sum leh pai, tha leh zung tam tak sen a ngai a. Chutah, band memberte'n hlawh chhuah a
lawi an nei ngai meuh bawk si lova, album leh video an siam lahin mi thehdarh tur mai mai an siam sak tihna a ni leh ang lawi a, rilru beidawnna nen kan zaimite hi an che chhuak tak tak thei tawh lova, an dinhmun hi a khirh em em mai a, harsatna lian tak an hmachhawn mek a ni.

"Hengte avang hian a ni ang chu, Hardray band hian kumin hi chawlh-ah kan puang," tiin Mawitea hian a sawi.

'Depression' vangin Tetei Ralte vawi thum intihhlum tum tawh

2010-10-02T11:17:00.000-07:00

A inbunruak ta a...
“Ka tawnhriat leh hetiang lama harsatna tawkte ka kawmna atanga ‘depression’ lo awmna chhan lian berte zingah chuan, hmangaihna
chungchang (love line) hi a langsar hlein ka hria. Khawvel hi a tawp tawh lutuk a, mi pa ni reng si a, tlangval anga insawi a, mi ngaihzawng chingte an awm a, ‘pa’ a nih thu an han hriat meuh chuan an lo lut thuk tawh bawk si a ni.
“Hmangaihte inkarah hian a nasa berin ka hria a, keimah ngei pawhin ka lo tawng tawh a, inngaihzawnna vangin thikthu a chhe thei em em a, tawngkam chhe tak tak emaw, kut inthlakna hialte a thlen phei chuan ‘depression’ hi hnai teah a awm tawh tihna a ni.
“Thenkhatah chuan fate laka nu leh pate’n beiseina kan neih san lutuk vangte hi a ni thin a, hei hi ka bula lo kalte pawhin an harsatna lian bera an sawi fo a ni. ‘Ka nu leh pate’n ka lakah beiseina an nei sâng em em a, tihlawm ka duhluatna lamah mipat hmeichhiatnaa inhman duhna te hial ka nei thin,’ min hrilhtu pawh hi an tlem hauh lo.

Hlauhawm a hnai tak zet!
“Kan tarlan takte hi a langsar zual te chu an ni a. Engpawhnise, hengte hi kan nuna a thlen tawh chuan ‘depression’ hian nasa takin bu a lo khuar tawh tih hriat a tha. In tawngtai sak te hi a that tho rualin, a rang thei ang bera mithiam te pan a, enkawlna lak vat vat hi kei chuan ka ngai pawimawh khawp mai.
“Mi hlim intawngtai tir tawp ang chi te, ‘Ramhuaiin a tibuai che a’ tih nghal ringawtte hi a him ber lova, min rawn tawngtai saktu ai chuan chhungril kan phawrhchhuah theihna turte hi an pawimawh zawk.
“Ni e, inngaihzawn chungchang bikah pawh khan a ni thova, thil dangahte pawh mualphona thlen thei tura invauna ang chiah te hian rilru hi a buai duh hle. Mualpho ai chuan khawvel chhuahsan mai te hi a lang nghal rum rum thin. Depression avang hian kei ngei pawhin vawi thum ngawt intihhlum ka lo tum tawh a, Pathian zarah chhanchhuah ka ni.

I fate hrechiang rawh
“He thilah hian a bik takin, Nute an pawimawh em em a, Fate intlukluhna leh engkim an sawi ngamna an nih avangin inhawng taka fate lo dawnsawn hi a tha. Kei pawh ka nu hi ka thian tha ber a ni a, engkim kan inhrilh tawn a, min chhâwk nasa khawp mai. “Nu te pawh hian fate
mizia leh awmdan hi chik thin ila, thil danglam leh hriat (hmuh) ngai loh a thleng a nih chuan inpawh taka sawipui tur a ni. An harsatna lai mu hi hriatchhuah ngei tum a, an mahni nena inhnaih thei ang ber awm hi invenna pawimawh tak a ni.”

Magdalene-in an vocalist ban!

2010-09-30T22:17:00.000-07:00

(He chanchin hi The Zozam Times, September 10, Zirtawpni chhuakah 'Exclusive'-a tihchhuah a ni tawh a, a hmu ve lo te tan tihchhuah nawn leh a ni)

Zo rimawi khawvel tan chanchin lawmawm a ni lova, kha leh chen hun harsaleh khirh tak karah pawhtalchhuak a, an rimawi hmanga Zoram dung leh vang tuamchhuak a, hma an lak tawh thinna chu chawlhsan tum lo mahse, Original line up an kim tawh dawn lova, Steward-a thusawi hi an laknat em avangin a aiawh tur Vocalist dang an la nghal a ni.

Hemi chungchangah hian band member te chuan hmanhmawh takin committee an nei nghal a, an thutlukna sawiin, “Magdalene hi chawlh kan tum lova, chawlh kan sawi ngai lo hrim hrim a, Amah berin, “Ka thei dawn lo” a tih avangin vocalist dang kan la ta mai a ni. “A chawlh thu pawh mimal takin kan la hriattir lova, mipuite hian thu dik hria se kan ti a ni. Anihna takah chuan khatianga a sawi ta mai kha kan lungawi lo hle a, hrehawm ti tak chungin a chawlh a ngai dawn ta a ni,” tiin band member te hian an sawi.

THIL AWMDAN SAWICHIANG
Hetianga an hmalaknaah hian mimal inhuatna leh intihthiam lohna engmah a awm loh thu sawiin, “Steward hi pa tha tak a ni a, engtik lai mai pawha hlim thei reng a ni. A thinrim lai hmel kan hmu ngai lova, thawhpui nuam tak a ni bawk. Tunah pawh hian thawhpui kan châk em em a, a thutlukna siam pawh hi mimal thutlukna niin committee
chuan a ring lova, amah hnehtu (influence) a awm a ni zawk emaw chu aw kan ti hial.
“Magdalene hi amah nena bul tan kan ni a, amah berin a theih tak si lovah chuan, a chawlh a ngai dawn a, kan ngai dawn khawp mai. Kan inkarah inhmelmakna leh intihthiam lohna emaw, inhmuhthiam lohna engmah a awm lova, keimahni lam atangin, ‘Chawl rawh’ kan ti lo hrim hrim,” an ti a ni.

MI PAKHAT VANGIN KAL LO
Vocalist hriathlawh tak a awm tawh si lovah chuan band-in a tuar ang em? tia zawhna chu, “Magdalene hi Patea (drummer) vanga kal a ni lova, PB-a (Bassist) vanga kal a ni hek lo. Steward- a emaw Victor-a awm vanga kal a ni bawk lova, mimal hlawk tumna, mimal hamthat duhna leh lar tumna ang chi-in band hi a kal ngai lo.
“Magdalene hi band pakhat a ni a, steward-a a tel dawn tak loh avangin kan show-ah mi an lo kal loh phah kan ring lova, kan tlakchhiat phah kan ring lo bawk. Kan rawngbawlna a ni a, theih tawp chhuahin kan kal chho zel ang,” tiin an sawi a ni.

--------------------------------
VOCALIST BAN TAK STEWARD-A THUKHAWCHANG

“Tukin zing (nimin) khan vocalist thar an nei tih ka hre ve chauhva, band puitling tak kan niin ka lo hre thin a, mahse ka hriatpui miah lova thil an lo ti a, official takainbiakna leh chawl tura inhrilh hriatna pawh awm si lova band-a awm ve reng nia ka inngaih laia hetianga an che ta mai hi hriatthiam har ka ti a, min kham tawh a, min lo hne tawh hle a nih hi ka ti.

ENGNGE A CHHAN NI TA ANG?
“Band-a ka awm ve chhung zawng khan vawikhat chu chhungkaw thilte a nih bawk avangin ka phâ a, an hriatthiamnate pawh ka dil a. chuta kan thian pakhat min chhanna chu, “Kehdarh vek i la a ni mai a lawm” tih a ni.
“Ka hrethiam lo hle a, kan nu te pawh kha ka dem hial a, mahse tunah chuan kan nu kha demna tur engmah a lo awm lo zawk a nih hi tih ka chiang ta a ni. Pakhat phei chuan kan nu hnenah, “I pasal avang hian sum engzat nge kan chan (hloh) tawh i hria em?” te a ti hial a, vawikhat vel emaw ka phat tak avanga hetia an ti ta mai hi chu a mak a ni!

BAND KHAIKHAWM TUM HRAM HRAM THIN?
“Band-a harsatna emaw remchan lohna a awm te hian theih tawp chhuahin ka thiante
pawh ka huikhawm ve thin a. An Inah te luhchilhin, zai tur leh hla zirturte’n ka sâwm chhuak lawp lawp thin. Hei hi an mahni pawhin an hrechiang ber a, thu dik pawh a ni. dik tak chuan, ka thiante pahnih hian side band an nei ve ve a, mahse vawikhatmah ka sawisel ngai lova, tawngkam leh chezia pawhin ka lantir ngai lo.
“Kan thian pakhat phei chuan, ‘Magdalene band hi keh darh ila, band dang siam ang u’ te a ti fo thin a, hengte pawh hre lo ka ni bik lo. Vawikhatmah band kehdarh leh band atanga chhuah hi chhungte bulah ngei pawh ka sawi ngai lo.

A HLA LARTE LAK LET LEH VEK HREH Lo!
“Tha te te-a inbiakna awm miah lova, hetianga hma an lak tâkah chuan kei pawh ka rilruchu a na lutuk lo na a, hriatthiam har chu ka ti ve khawp mai. Heti hi anih chuan a thu leh a thluk ka siam, ‘Life Beyond death,’ ‘Save Me,’ ‘open Your Heart’, ‘ This world will Never Ever Stop Me’ tihte leh tuna kan hla thar, ‘Place of Angtel’ te hi band-a ka kenluh anih ang bawkin, an sak ve zel hi ka remti thei lovang.

ENGTINNGE NI ZEL DAWN?
“An kal dan danin an kal a ni tawh ang chu. Rimawi hi ka la chawlhsan dawn lova, fapa ka nei a, ka fapa te nen hian heng hlate hi new version te paw’n kan la siam ang chu! Ka thiante hian min hmangaih tak tak chu ni se, ka hriatpuinangeiin ka banna thu hi kan tifel ang.

Naktukah F-a leh Jojo Inkutsuih Dawn

2010-09-30T21:43:00.000-07:00

Keimah ang ni lova Biak In hawng ngeia nupui/pasal nei turin ka thalai puite ka ngen a ni: Jojo

Naktuk chawhnu dar 1 hian Icon star duhawm tak, Josephine (Jojo) leh F.Lalrinmawia (F-a) te chu Model veng Kohhran Hall-ah an inkutsuih dawn ta. Jojo leh F-a te hian fapa duhawm tak, Simon F. Lalremruata an nei a, an fapa piancham pha phakah, ‘Big day’ hi an hmang dawn a ni.

Hetih lai hian Jojo-i chuan an inkutsuihna tur hi a mumang a taka chantirna a ni a tih laiin, Biak In pui hawnga inneihna an kalpui thei ta lo
erawh pawi a ti ngawih ngawih a, amah ang ni lova thianghlim taka Pathian leh kohhran hriatpuina ngeia pumkhata insiam ngei turin ngenna leh sawmna khunkhan tak a siam bawk.

“Dan khatna tluk a awm lova, a ropui bik em a, a thianghlim bik ka ti bawk. Biak In hawng lova inneih hi a mawi lova, innei lehzel turte pawhin ngaihtuahna fim tak hmanga thianghlim taka innei theuh turin ka duhsak em em a, ka ngen duh bawk a ni,” tiin nizan dar 7:40 khan Jojo hian thinlung tak leh inhawng takin a sawichhuak.

Biak In pui hawnga innei an nih lohna laiah inthla-hrunna tur pawh tam
tak a awm thu sawi nghalin, “Tun tumah hian ka pa (F-a pa) hi a dam loh avangin phaiah te kan kal zak zak a, kan inkutsuihna turah pawh senso tlem thei ang bera kalpui kan tum a, kan fapa piancham ni lo phei selang
chuan duh angin kan kalpui lo mai thei. “Dan khatna ang te kha chu ni se, mokawr leh thil dang-ah te pawh tun aia tha zawk leh pui zawka kalpui theih dante a awm dawn a, tun dinhmunah hi chuan inthlahrunna a awm lo thei lo,” tiin Jojo-i hian a sawi bawk.

Inkutsuih zawhah hiannaute piancham pha phak lawmna neih a ni nghal ang a. Hetah hian Icon star te an kim hle dawn a, zaithiam dangte pawh an inlan dawn bawk nia hriat a ni a, an phur tawh hle nghe nghe.

25 Facts of Mimi Renthlei

2010-09-30T12:57:00.000-07:00

1. Nail polish ka hnawih ve ngai lo
2. Ka zin dawn reng reng hian 'Mango
pants' hi ka keng tel ngei ngei thin
3. Color-ah chuan 'Red' hi ka duh ber
4. Zan-a Aizawl khawpui eng uar mai
thlir hi nuam ka ti
5. Ka beng khawih hi ka sim thei lo
6. Thurawn ka la dawn that ber chu, ka Ni hnen atangin a ni a. "Nu leh pa thu chu mittui tla zawih zawih paw'n awih tur"
7. Tarmit vuah lo chuan lehkha chhiar har ka ti
8. Lirthei dah phal lohna hmuna ka dah vangin traffic police-in min man tawh
9. Ramhuai chanchin sawi hian ka dawihzep hle a, ngaithla châk ber ber e, ti lo
khan ka ngaithla zo ngam ngai lo
10. Ka haihawt lutuk a, mobile phone, ATM card leh thil dang dang tihbo leh awmna chin hriat tawh loh ka ngah mai
11. Inngaihzawnnaah hian 'dawt sawi'hi thil tha lo ber a ni a, rinawmna erawh chu tawrh lo ngai pawh ni se, chhel taka min tawrhtirtu a ni thung
12. Ka pa hi ka 'hero' a ni a, ka nu hi ka chakna hnâr a ni
13.Tunlaia zawhna ka dawn thin, min tihrehawm deuh chu, 'I va cher ve, Ngatinge?"
14. Hmeichhe thian aiin mipa thian ka ngah zawk
15.Mi hi ka ring hmâ thei em em a, ramri an pel erawh chuan ka ti thei thak tawh lo
16. Footballer ka duh ber chu, Rio Ferdinand a ni a, Manchester Fans ka ni.
17. Nitina lawmthu ka hrilh awmchhun chu Pathian a ni
18. Pangparah chuan 'Rose' hi ka duh ber
19. Thil pek ka dawn tawha ka la hlut ber chu Graduation lawmpuinana ka pa'n 'Sana' min pek kha a ni. Chuta thuziak chu a hlu lehzual, 'Hun ngaipawimawh la, vawng dik rawh'.
20. Zawhte leh Ar hi ka ngaina vak lo. Ka naupan laiin Ar-in min lim hrep tawh a!
21. Boyband lar lai khan Backstreet Boys fans ka ni a. Nick Carter-a nupui duh tak ni
turin ka lo insuangtuah ve nasa thei hle thin
22. Thei-ah chuan 'Serthlum' hi ka duh ber
23.Fashion-ah hian Jeans an lo siam chhuak hi a la fuh berin ka hria a, a tam thei ang bera neih ka duh. Min lei sak duh an awm phei chuan engtik lai paw'n 'Welcome'!
24. Naupangte ka nih lai chuan ka pa thiante hian 'Vivica' tiin hminglem min
phuah sak thin
25. Ka ke atanga ka chhip thleng enfiahin, mark pek ni ta se, 10-ah pathum (3) hmuh ka inring

Ka chetchhiatna langsar zualte - C.Sanga

2010-09-30T12:43:00.000-07:00

(Mizo mipa zaithiamte zinga Aw 'Pa' ber ni hiala sawi thin C.Sanga chuan he khawvel eng a hmuh phat atanga a thil tawnte zinga a chet chhiatna langsar deuhte bun chhuahna a nei a, a ngaihnawm dangdai hle a, hlimpuina tham hlir a ni. Vitamin hlang min khilai a ni ber. Ama kutchhuak a ni a, thu leh hla lamah pawh intat lut se, tlar hma lam la changpha turte zingah a langsar viau ta ve ang.)

Nikhua ka la hre meuhlo; Ka pute inah kanleng a, chutah tam mangkheng hian chhuatahchuan ka “THEH” ta luarh mai a, chutah, ka u hichu zah hre rual a ni ve tawh a, “Engah nge mi inahi êk?” tiin min “BONUS” hrep!!!

Tum khat chu sawrkar thil pawimawhahchhim lamah sawn kan zin a, programme- duanlawk sa ang chuan zai tur chuan min rawn ko ta a. Mahse, CD Player kan lo ken theihnghilh!!! Lungleia let leh tur chuan hun a awm si lo, soundtrack lah chu CD bakin ka nei der bawk si lo, tingtang hawh tur kan zawn lai tak chuan vanneihthlak takin ti tawh mai ang, kan thiannu pakhat chuan ka Audio Cassette pakhat a lo keng hlauh mai a, portable tape-ah kan playback ta a, duh duh select theih si loh... a indawtin ka sa thla zel a, an hla hriat zawng tak a rawn thleng meuh chu an phur ngiang a ni ang chu, tualah an rawn khat hmur mai a.. Chutah, an phur tawh lutuk chuan ka mike cable an rawn vai thlawn ta, a zai lah chu a la tha rap! Mahse, vanneihthlak takin an hre lo nge ni an lam nasa mai a, an lamna
karah chuan ka cable tla chu ka zuk hmu fuh a, rang lutukin ka zuk char a, ka vuah lehnghal a. Hnar chu a “ISKUT” duh vung vung khawp mai, mahse, zai tha tak chu ka ni.

December, 2005 kha ni tain ka hria, Goa-ah hun engemaw chen thangin kan zin a. Tumkhat chu kan perform-na hmun kha open air a ni a, mipui pawh an tam ber tum a ni. Sap hla vek kan inring a, tuman mizo hla keng kan awm lo. Mahse, rin loh takin an hotute leh mipui lam atang khan “Mizo hla hot deuh kan ngaithla duh” an ti ta tlat mai a, tihngaihna a awm ta lo bur. Tingtang hawhna hman a awm tawh si lo, ka mangang tawh lutuk chuan ka track ken zawng zawng chu ka hai ta vak mai a. Chutah le... vanneihthlak tak maiin hmana ka hla hlui “Future a va bright lo em” (EE..OO..EE..OO) tih track kha ka hmu ta hlauh mai a, kan hotu te nen pawh kan lawm tlang kher mai. A music a hot-in a rock thak thak bawk a, mipui
pawh an bu suau suau ta mai, mahse, problem dang ka nei ta tlat..!! Ka sak khat lutuk tawh vang a ni ang chu a chang 3-na ka theihnghilh... tih ngaihna awm tawh si lo, ngawih vung vung ai chuan tiin “HIGH RISK”-in ka’n phuahchawp tak tak mai a, “Heng vai dum chhe tê tê hi an thawveng phian lehnghal a..” tih vel mai mai hian ka’n chham tak tak mai a, anni lah chu an phur tual tual emaw tih mai turin ring fahran hian “ E..00..EE..00..” an lo ti dual dual! Programme a zawhah te chuan thla min lakpui ve laih laih. Mizo tawng thiam an lo awm palh ang tih te chu ka hlau ve hnuhnawh khawp mai, tihngaihna dang awm hek lo le.

Kan nu nena kan inneih hma deuh hian kan thianpa pakhat (Hmingthup.. in hre riau riau palh ang) hian “GO” tawkin zing dar 2 rik dawn hnaih tawh lamah kan nu te a lo han kaitho pek... rinloh deuh zawk a piin kawng a lo hawng, “Tun ang hunah engnge i duh?” “C. Sanga a rawn kal em?” “Kal lo” a chhang tawi mai mai, kawng a khar nghal hmak... Ka mark score sa zawng zawng a rawn dek “ZERO” tep mawle..Recover leh a huphurhawm duh khawp mai, a hlimchhawn khan a pi te khan engtin nge min ngaih ang aw???

Hmanni lawk khan recording kan ti zo, ruah a rawn sur nasa bawk nen, kan thianpa P.B. Lianhminga - te inah chawl turin kan lut a, an lo lenchhuah
dawn avang chuan an nu chuan an thawmhnaw hak tur chu chhuatah chuan istiri-a nawh tur hian a lo chhawp a, kei lah pek chuan enchiang mang hlei lovin pawnchhia emaw tiin ka’n rap ngawt... an nu chuan, “Kha i rap a nia” a rawn ti... chutah, inti polite takin ka chapal berh chu an thawmhnaw nawh turah chuan ka’n tât fai tak tak maiah. Inthlahrun awm tak a ni, rei pawh kan awm lo, chhuah pahin ka kan hup chho nghal char
char.

Manipur kan zin tumin zankhat thilthu-ah ka aw a phui thut mai a, ka zai thei ta mang si lova. Mahse, thianpa Sanglura (H.C) a awm chu ka chhawr khawp mai, hla thu ka chham a, ani ka zaitir hmiah!!! Khami tum kha chu a hah ngawt ang, in duh leh amah zawh mai tur.

Kan thianpa Lalhmaa Tribute Concert-ah khan mawle... A lungpuam zawng khan kan awm deuh vek mai ti ila ka sawi sual tam ka ring lo. Kan hotute
pawh khan, “Tlema zangkhai deuh zawngin ti hram hram rawh u” an ti ve a. Chu chu changchawiin intihphur luih ka tum...Ka’n hlim lui vel... in hriat vek tho kha...ha..ha.. Nih loh anga Ian tum phêt chu chi loh tuah tuah... Naupang te ka la nih lai hian ka pi hian arbawm kan mamawh thu a sawi a ni awm e. Kei pek lah chuan inti bengvar faharan hian mi arbawm ka
pu haw hluai pek a ni awm e!!

Hman kum deuh tawhah khan Tribal Power Band - te nen Lunglei-ah concert kan nei a, chumi tum chuan kan hlawh tur aia tam mah emaw ni, Pu Para (of Delta Sound) Speaker lian fahran kan hawlh puak pek!!! Hlawk lo ve tak chu a ni.

Zawlnuamin Y.M.A General Conference an thlen tum khan ka mit a na nasa mai a. Mahse, programme duan lawk sa reng reng last minute-a thulh leh thut duh lo mi ka ni si a. Miin hmarcha thlawr a tha an tih kha ka awih ta tak tak a ni ang chu, ka râwt teuh mai a, a tui chu thirfiantêah lapua hian ka filter a, ka mit chu ka keu a, ka thlawr ta chiam mai a, ka beng a kiu vawng vawng, hnap tui nen mittui nen. Dam chu “KA HA SE”, ka mit chu thisen hlang a ni mai, var lai a awm lo, ramhuai ka ang lutuk, khua a sik nghal hluah hluah. Ka zai hun a lo thleng, zan zanah sun glass tê nen ka zaihluai mai mawle!!!

PBK-a hla leh tihdamna

2010-09-30T12:32:00.000-07:00

Zaimi duhawm taktakte zingah ngaithlatute taksa leh thlarau fanchhuak thei an sawite zinga langsar ber pawl ni mek, PBK Liankhuma chuan “Keimahatang chuan tihdam rawngbawlna hi a chhuakin ka hre lova, ka neih awm pawh kahre lo bawk. Mahse, Pathian zarah thlarau pawlna changa kan zai an lo ngaihthlak hnu-ah taksa leh thlarau damna chang hi an awm ve reng thin a, phone call pawh ka dawng fo thin.
“Amaherawhchu, sawinuam chiah lovin ka hre thin
a, midangte’n an hlawkpuina tur anih erawh chuan. Ni e, Cancer vei mi pahnih thumvelin damna an changte kha aropui hlein ka hria. “Tin, nupa inthen leh inuire san te pawh an tam em em a, a tlangpuiin thalaite zingah hetiang harsatna hi a lo tam hle ni ngei tur a ni. Kan zai an ngaihthlak atanga Pathian thiltihtheihnaan chunga lo thlen dante ka dawng leh fo thin.
“Siam thar lehna anchanna hla an sawi deuh bera chu- ‘Nun Thuruk’, ‘Awma ka ta’ leh, ‘ A kiang Thin’ tih kha a ni a, thalaibikah chuan, ‘Siamthar ka ngai’ tih kha a tla na hle bawk niin an sawi.
“Keini a karah kan hlate an lo hlawkpui hi Pathian ropuina zawk a ni a, a lawmawm lehzualin ka hria,” tiin PBK-a hian a sawi.
Sawi chhunzawmin, “Phone call ka dawn a rilru khawih leh hneh ber chu, tlangval pakhat inawhhlum tum uai uai tawhina ka zai thawm a hriat tak vanga a thulh lehnghal kha a ni a. A chhungte pawh an lawm hle a, tawngtai nen tha takin kan inthlah a, rilru a khawih duh khawp mai.
“Tin, Zu hmuna awm mi pakhatin zai a ngaihthlak fuh vanga zu hmun tlanchhuah san nghal a, piantharna a chang ta kha a ni a, Pathian atanga chhuakina nun thar a rawn thlenna niinka hria,” tiin a sawi bawk.

Sailova’n mal ngawih ngawiha inhriatna nei thar!

2010-09-30T01:15:00.000-07:00

Rawngbawlna atanga han haw te hian, min lo hmuak a, min lo bawihsawmtu turte hi thinlung hian a zawng ruai ruai a, hetianga khawhar rukna hi ka nei a ni: Sailova

A hminga tlangval ni ve ta fam chuan duhzawng leh melh ruk ve deuhte pawh a nei lo thei lova, rawngbawla a fehchhuahnaah pawh hian a mit a len ve reng thin. A changin, khawhar rukna te leh kim lo riaua inhriatna te'n an rawn bawh leh huk thin a, chu chu tawrh har a ti a, mal riaua inhriatna chuan a nun a rawn sawiharh leh thin. Tunlai tak phei chu, hetiang lama khawhar ruknain zaithiam lar leh thuhriltu hriatlar tak ni mek, Sailova nun hi kawng leh lam atangin a su-nghing ve lawih lawih a ni.

Rawngbawlna lamah
"Crusade leh camping-in kumin hi a 'full' thak dawn a, eizawnna tak tak pawh kawngleh lamah chuan ngaihtuah hleih theih pawh a ni lo. Tirhkoh Paul-a'n 'Chanchintha hi eizawnnan hmang rawh u' a lo tih ang khan Pathian hian kan nghei hi a phal bik lova, rawngbawlna hi eizawnna atan ka thlang tihna erawh a ni lo. Ka luhchilhna lam anih avangin a ram leh felna zawng hmasa tura min tih angin chu chu tunah hian theih ang tawk tawkin kan hlen chhuak mek.
"Rawngbawla ka awm loh hian ka ngaih a tha tawh lo zawk a, kohhran huang chhung bik chauhah leh eizawnna nena ka kawp chuan thlarau khamkhawp ka hmu tawh lo. Tuna Pathianin min dahna hmun, rawngbawlnaah tih loh chuan keimah leh thlarau tana kham khawp tur hi chu a vâng tawh a ni. Ka pianthar tirh atang khan Pathianin 'first choice' ah min dahin, ka tih tur leh hmalakna turte hi min thlan sak a, khawvel lamah engmah ni lo mah ila, ka duh-thlan-na leh thutlukna ka siamah hian vawikhatmah ka inchhir ngai lova, tuna ka awm dan ang hian ka awm lo mai ang tihte kha ka hlau leh hnuhnawk zawk," tiin Sailova hian duhthlanna dik a thlang thei chu lawmawm a tih thu a sawi.

A mamawh berte zingah 'Kawppui' tur pawh!
"A hmasa berah Isua hi ka mamawh a, a pahnihnaah chuan 'Mamawh tawk chiah hi ka mamawh' a ni. Rawngbawlna chu thudang lo ni ta se, tunlai tak hian kawp-pui tur chungchangah 'mal' nia inhriatna ka nei nasa hle a, kan kalchhuahna hrang hrangahte pawh ka mit leh thinlung hian a zawng vel ruai ruai a, kan kumte'n a lo zir ve tawh a, hemi khawhar rukna hi ka nei a ni.
"Kawppui tur zawn chungchangah hian 'Hmanhmawh bawk si lo, lungleng ve bawk si' in ka awm a, a buaithlak khawp mai. Lal Isua nena lendun hi chuan nun hi a ruak lova, mahse "Mipa amah chauha a awm hi a tha love” tih hi Pathian thu ani bawk si a, kawppui mamawhna hian min \hing tawh a ni. Rawngbawlna atanga han haw te hian, min lo hmuak a, min lo bawihsawmtu turte hi thinlung hian a zawng ruai ruai a, hetianga khawhar rukna hi ka nei a ni.
“2007 atang khan tawngtainaahte thlenin, 2008-a nupui neihte kha kan lo tum ve thin kha a ni a, mahse chung lam remruatna hi hriatthiam chi rual a ni lova, a la hun chiah lo te pawh a ni thei ang chu," tiin a nakruh bo zawn chungchanga tunlaia a dinhmun sawi chhuahna a nei.

A hlim thin a, a lawm hliah hliah bawk
"Sual nia inhriatna nei a, Lalpa zah pui lova, lamtuala an han phar lawp lawp mai han hmuh te hian ka nun hi a hlim ngawih ngawih a, Pathian pawh hi a thaw ve huai nia hriatna te hial ka nei ve thin. Ka sulhnu pawr tak takte hi zai chauhin chul mam theih a ni lova, gospel sak ringawt pawhin thlarau bo lakkir leh theih a ni bik lova, thusawina hmangte'na Pathianin min han hmang ve te hi a ropui ka ti. Mittui tla zawih zawih chunga, 'Amen' thinte ka hmuhte hian ka thaw a veng huai a, ka hlim a ni. Mihring invuiliamna a lo lang a, Krista tana mualpho ngamte nun ka hmuh hian min tihlim em em thin a ni," tiin Sailova hian rawngbawlna an neihnaa amah tihlim thin thil thlengte a sawi bawk.

Mapuii’n chhungte hmaah chhiar hreh nei!

2010-09-30T00:57:00.000-07:00

A chhin hawnna
Hla lar tak, 'Trinity' leh 'I hming a chuang tawh em?' a sakna te pawh a rei leh ang reng hle tawh a, kum 6 hmel a hmu ta reng mai. Khawvel taka thlir chuan kawppui zawn hun a pel ti ti tawh a, mahse a la hmanhmawh lo nasa mai bawk si.
Chutih laiin, nui deuh ar ar chungin, "Kuminah te pawh a ni mai thei a sin, tunge sawi thei?" a ti a, kan zawt thui ta lem lo.Mapuii chuan, "Keini ai naupangte te te pawhin an nei sup sup tawh a, hun chungchangah chuan 'hun' ve tawh e. Mahse, pasal nei tura inpeih tak tak erawh hi chu a awm thei tak tak dawn em ni?
“Puitlin te hi a har a, Nu leh pate lahin fate hi puitling angin min la hmu hlei thei bawk si lova, chu bakah ka rin dan chuan puitling lo min la ti a ni anga, hetiang lam hi min la sawi pui ngai meuh lo," a ti.
Heti chung hian, a hminga nula ni ve ta na fam chuan pasal chhe te neih hun pawh a la tawng ve anga, chumi atana inpuahchahna em em erawh tun dinhmunah chuan a la nei lem lo.

Eng chu maw ni a?
Kawppui chungchang ziahna leh hetiang lam hawi thu leh hla te hi chhiar ve zauh zauh thin mahse, a chhungte hmuh leh hriatah erawh a chhiar lem lo. "In-ah chuan ka chhiar ngai lo. Chhungte hmaa chhiar a chi vak lova," tih chu a thu min hnutchhiah a ni mai si a, khawiah nge a chhiar thin tih chu ngaihtuah zui peihte tan a ni e.
Bialpa te pawh a nei ve tawh thin a, famkim lohna khawvel a la ni miau a, a tluang reng bik lo. Hrehawm tih leh buaithlak tihchang a ngah ve thin. Chutih laiin, karlam hlat vanga inthen leh inphatsan tih vel erawh inhmangaih tak tak loh vang niah a ngai hmiah. "An inhmangaih tak tak a nihte chuan an rinawm a, an innghak tur a ni, engtia rei pawh ni se.
“An inthen emaw an inphatsan anih te chuan an inhmangaih tak tak lo tihna a ni mai a lawm," tiin Mapuii hian hmangaihna hi hmuh phak lovah pawh awm se, bul hnaia awm reng nena danglamna a awm loh thu leh rinawmna a tel phawt chuan harsatna lian tham a awm a rin loh thu a sawi.

Internet-ah RC-i leh Mimi (Icon) lemchang awm!

2010-09-30T00:50:00.000-07:00

Nikum khan zaithiam duhawm tak, Bethsy-i hming hmangin a hriatpui loh leh remtihna pawh awm lovin misual tu emawin Orkut-ah site a lo siam a, fan tam takin amah tak tak emaw tiin an lut nghal sup sup a, mahse inbumna mai mai a lo nih bakah a siamtu hian tawngkam mawi lo leh lerh tak takin a lo chhawn chhaih a ni. Mi tam tak a tibeidawng a, Bethsy-i'n hetianga a chhan an ring ngam si lova, fan te buai bawk, amah Bethsy leh a chhungte thinrim bawk nen, thil tih chi lo tak a ni.

Ngai teh, thuthar a awm!
Thawm a reh deuh dawn emaw tih laiin, Mimi Lal-zamliani leh Zoram-chhani(RC-i) hming a lang leh nghal a, heng site-ah te hian an thlalak panih thum vel an dah bak chu chhiar tur leh hriattur a awm lo. |hian list-ah hian mi tam tak an awm thung a, sangkhat an kai lo chauh!
Hetih lai vek hian Mimi (Icon) chuan, "Internet hi ka khawih vak lova, tutu te emaw hian min hrilh leh zauh thin. Mahse, tihngaih-na vak ka hre lo. ‘Keimah ka ni lo' ka ti thin a, a thenin 'Ka awih lo' te an ti a, a chang chuan a buaithlak thin khawp mai. Internet khawih vel hrim hrim hi ka peih lova, Orkut-a mi pawh hi ka ni lova, ka siam lo bawk a, engmah ka hriatpui lo.
"Han inzawn chhuah a, thubuai siam theih pawh a ni lova, ka thinrim em em loh laiin, thil lawmawm tak chu ani lo. A khat tawk hian, "I va induh ve, kan rawn bia che a, min chhang duh ngai si lo," tihte hi ka dawng ve deuh reng. Ka ngaih ve dan chuan, hetiang thil buaipui lutuk hi tha-in ka hre lo.
“A tam zawk hi chu hna dang pawh thawk hman lovin kan buaipui nasa hle a, hun a uiawm ka ti a, a tang-kaina tak tak tura hmang hi kan tam loh avangin ngaihpawimawh lutuk chi-ah ka ngai lo," tiin Mimi hian a sawi a, Orkut-a a chanchin leh thlalak tarlanna hi a rang thei ang bera lo paih (delete) turin a siamtute hi a hriattir a, a ngen nghal bawk.

Hetiang tihching ho hi an ngeiawm ka ti: Bethsy
"Phai lama ka u thiante'n an lo hmu a, 'Orkut-ah i awm thin em ni?" an rawn ti a, min zawt thin bawk a. Hetiang lampang hi engmah ka ti ngai lova, ka khawih ngai lova, ka buaipui ngai lo hrim hrim.
“Ka hminga lo siamtu hi an be thin a, mahse a tih-dan leh chhan danah khan rinhlelhna deuh chu an nei a, 'ler' hmel deuh nite'n an sawi. Mipa ngei ni awmin an hre bawk a, mahse tunge a ni tih hriat theih tak tak a ni bawk si lo.
"Kan theih ang angin kan han chhui ve a, mahse tih vak ngaihna a awm lo. Chanchinbu kaltlanga thuchhuahte kan han siam hnu kha chuan a reh ve leh mai a. An sawi dan chuan, Ka thlalak bakah, Sarah (Icon) nena kan lakdunna te pawh a awm a, min hrechiang tu deuh emaw ka ti.

A pawina leh that lohna
"Keimahni anga an lo inchan khan, ni lo deuh deuhin, huaisen tak takin eng engemaw an lo sawi thei a. Mizia ni lo pui puite an sawi thei bawk a, a lo hretu tan, 'A van ho reuh' tihte a awm thei. A nih loh vek paw'n 'A van hrât reuh' te pawh an ti thei ang. A chhan chu, keima lema changtu hi zing lam dar 2 thleng thlengte a awm (online) thin a, midangin engtinnge min ngaih ang?
"Hetiang ho hi chu an ngeiawm ka ti tawp. An changkan loh zia leh an 'cheap' zia an pholang ni maiah ka ngai. Mi tam tak hmalam hun tur an tichhe vek thei a, an hlawhtlinna leh hnathawhna tur thleng-in an tibuai vek thei bawk. Mi tam zawk hi chu engemaw deuh hlekah 'ring' leh 'awih' nghal mai thin te kan nih avangin fimkhur a ngai hle a ni," a ti.

Inngaihzawn lai chuan Hmeichhia hi thu zawk se: Zomuanpuii

2010-09-29T03:00:00.000-07:00

Mi hriat hlawh i ni a, mahse hei hian nangmah beisei deuh tute a hnar phah a, khawhar riau chang i nei thin lo maw?
Nei teh reng mai. Engtinnge miin min hmuh dan hi ka hre lova, mahse a hminga mite hriathlawh nih takah chuan mi pangai chung hreta min 'treat' te an tum nite'n ka hre thin a, indah sâng vak tur leh changkang deuh turahte hian min ngai ni te hian ka hria, puitling deuh turah te hian min ngai a, kei lahin puitlin lam ka la hnaih lo nasa bawk si a.

Icon hnu khan ngaihzawng i nei tawh em?
Ka la nei lo, tun thleng hian ngaihzawng han tih tak tak tur ka la nei lova, an la awm miah lo. Inlengte hi ka nei ngai lo. Star leh duhzawngte hi chu an awm ve a lawm.

Eng ang mi nge i duh?
Fiamthu duh deuh mai ni se, tawng duh deuh. Mahse, ka bulah chiah tawng duh se. Inti pa deuh ang chi chu ka duh lo. Hmeichhe bula inti pa kung kung lova, hmeichhe thusawi ngai pawimawh tak, tah a hun pawha tap ve mai thei tur. Kawng engkima min ngaihsak tu tur hi ka duh. In 'care' ah hian chintawk a ni lem lova, min care 'over' mah se pawi ka ti lo.

Beisei tu che an kat nuk lo maw?
(A nui hmasa phawt a) Awm ve tho mai. Mahse, message leh call atangte'n a nia, an hmel pawh ka la hmu si lova, chutiangin ka ngaihsak zui lem lo. In-a rawn leng ang chite hi chu a dan a dang deuh.

Ngaihzawng neih chung-changah i chhungte an khirh em?
Chutianga khirh bur chu an ni lova, nei leh nei lo turin min ti ngai lo. Mahse, ka chhungte hi chuan ngaihzawng neih hi an la ti vak lova, a la hun lo an ti a, fimkhur turin min duh a, chu bakah keimah hrim hrim pawh hi ka la a bawk si a!

Pasal neiha chhungkaw din hun turte i suangtuah lawk thin em?
Suangtuah lawk thin e. Inngaihzawn lai hi chuan hmeichhia hi kan thu zawk tur a ni ka ti ve tlat. A chhan chu, inneih tawh chuan hmeichhiain a thu thu-a mipa a dah kha a rem tawh lova, kan pasalte hi kan zah thiam a ngai a, an rawng kan bawl sak turah ka ngai bawk. Mahse, sawi tawh ang khan, inngaihzawn lai chuan hmeichhia hi thu zawk se.

Thil zawh chi loa sawi thin, mahse hriat châkawm si...
'Kum' a ni chiang mai. Tunah hian kum 20 ka ni tawh a, zan khat thil thu-a borual chu kan ni ve tawh!

Rs 700,000 chuang lalut tawh TBC-a’n chhas tan cheng khat mah la seng lo!

2010-09-29T02:55:00.000-07:00

Mizoram-a ‘Reality show' atanga sum hailut hnem ber tihngam hial a ni tawh a, lenglawng hla a sak bakah fakna hlate nen lam mite rilru chhungril thleng phak thei khawpa a vawrh luh theih avanga lawm hlawh a ni mek bawk.

TBC Zaithanpuia chuan Pathian leh mite duhsakna a zarah a phu loh sum leh pai a dawn thu a sawi rualin, bialnu tak tak a la neih miau loh avangin thianthate tih lohah chuan hmeichhe present pek leh thil leisak tumah a la nei lo a ti bur mai a, a tlem berah cheng nuai sarih chuang laluttu hian chhas chungchangah kher chuan thuthar a nei thei meuh lo.

TBC-a chuan, "A hminga mite min hriat hnu chu sawi loh min hriat hma hrim hrim pawh khan ngaih-zawng han tih tur hi ka nei lo ti ila a dik ber ang. Engemaw hun bika thianthate present pek leh thil lei sak tih lohvah chuan a bik takin hmeichhia thil lei sak leh present pek hi ka la nei lo hrim hrim.

“Ka zep lo, a nihna ang tak taka sawi dawn chuan a hminga sum leh pai lo lut atang hian bialnu ka nei bawk si lova, chhungte mamawh leh keima mahmawh lei nan tih lohah chuan hmeichhe tan 'special' taka sum ka hman awm hi ka la hre ngai lo," a ti.

TBC chuan sum leh pai a hman danah a lungawi hle tih sawi nghalin, "Entirnan, Tun hnuaah hian pawisa nei lovin awm ta ang ila, "Aw... khatih lai khan khatiang khan lo hmang ta ila, hmang lo ta zawk ila," tih tur hi Pathian zarah ka neih ka ring lo.

“Harsate kan ni a, ka chhungte enkawl thei tura Pathianin malsawmna min pe hi a ropui ka ti a, mite'n min khawngaiha, an duhsakna te dawngin tun dinhmun hi kan thleng chu ani a, a lawmawm hlein ka hria. Keimah bikah chuan a hminga zaimi nihnaah thawmhnaw te a lo ngai a, mahse thawmhnaw hi ka uar lo. Sum leh pai ka hmannaah hian inchhirna engmah ka la nei lo," a ti.

A nu duhthusam hlawhtlin loh vangin Rosy rilru nâ

2010-09-29T02:34:00.000-07:00

Langsar lo takin gospel artiste te zingah a rawn inlan a, mahse a vawikhat inlanna music video atangin Zo rimawi khawvelin an hmelhriat nghal a, a lakah beiseina sâng tak nei zuiin a hmel leh pianin a lo zir bawk nen ngaihven a hlawh zui nghal hle.
Chutih laiin, Rosy hian a pualin tun thleng hian album a la nei lova, a aw leh hmel te hria-in hmu fo mahila, a hla sak hlang awmna album ngaihthlak tur la awm tlat lo mai hian a fans te a tibeidawng lek lek thin a, amah pawhin hrehawm a ti a, hetiang hian a buaipui theih lohna chhan lian tak chu a vawikhatnan a sawi.
"Mi tam takin min zawt thin a, 'Engvanga album hi la siam lo nge i nih?' min ti fo. Thawkkhat lai khan hla te khawnkhawmin ka han khawrpum ve deuh dawn a, mahse a nghakhlel ber kha a awm tawh bawk si lo. Music video leh album nghakhlel em em thintu ka nu-in min boral sak tak avang khan ka beidawng tawp chu a ni lo na a, ka phurna zawng zawng a bo vek vang a ni," tiin Rosy hian a sawi.
"Ka nute hi Lawngtlaiah an awm a, Aizawl-ah tak hi chuan kum 10 chuang ka awm tawh a. Min ngai thei em em a, ka hla a ngaihthlak a, TV-a ka zai a hmuhte hian a tap thin. Ka zai dawn apiangin ka lu chungah kut nghatin a tawngtai thin a, nitin vawi 4-5 te hi ka tan min tawngtai sak thin. Khatia natna khirh takin a tlak buak a, amaha zun leh ek pawh thiar thei tawh lova a awm hnu pawh khan 'Music video siam rawh' tiin min ngen a, kalsan ka hreh ngawih ngawih a, mahse a nghakhlel bawk si.
"Tichuan, Aizawl lamah ka lo phei ta a, ka nat zui leh tak bawk si avangin engmah ka buaipui leh thei ta lova, ka hlawhtlinna hmu hmasa lova ka nu-in min boral san si kha ka hnual nghal rawih rawih a, nghakhleltu ber a awm tawh loh avangin album siam leh buaipui châkna kha a awm lo a ni.
“Tunah pawh hian ka phur hluai chuang lova, hmalam hun sawi theih a nih loh rual rualin Pathianin rem a tih chuan tihchhuah ve theih hunte pawh a lo inher chhuah ngei ka beisei," tiin aw 'key' hniam reih rawih takin Rosy hian a sawi.

Mimi Renthleii’n chanchinbu thuchhuak dik lo chhâng let

2010-09-29T01:35:00.000-07:00

Zaithiam duhawm tak, Mimi Renthlei chuan Lelte chan-chinbu, Vol XXVII, No. 13, 17-23 September, 2010 chhuaka a chanchin dik lo taka tarlan anih chung-changa a lungawi loh thu nizan dar 6:10 khan a sawi.
He chanchinbu-a ‘An chanchin tawi’ tih huanga a lan dan an ziahna chuan a rilru a tihnat thu leh a chhungte bakah thil thlen-na hmun nia sawi, Mizofed-a thawktute ngei pawhin an thinrimpui hle tih a sawi bawk a ni.
Mimi Renthlei chuan, "A thupuiah, 'Mimi Sexy tawk-in' tih a awm kalh mai a, chutah chuan, kekawr bul chhing tak ha-in, t-shirt nghawng zau tawk, boot chawn puar khuh, sun-glass dum nen, Scorpio atangin a rawn chhuk thla a.
“Music ring tawkin a play a, petrol la tura a kal chu line-a lo awm te pawhin an lo kian suau suau a' tih lam hawi tarlan a ni a, hei hi thil thleng tak tak ni lo, suangtuahna leh zeldin thu atanga ziah a ni.
"A tirah tak chuan, he thuchuah hi engvakah mah ka ngai lem lova, keimahah khan a ni lo lutuk tih ka chiang a, dawt a nih avangin chaw tak khuka khuk pui chi a ni lo ka ti a.
“Amaherawhchu, ka nu leh pate ngaihdan anih loh deuh avangin chanchinbu editor ngei pawh biain, thil awmdan a sawi pui hnu-ah editor hian ‘a tihdikna kan lo ziak ang' a tih hnu-a chhuak hmasa berah tih-dikna leh pawi tihna ang chi a lan chuan loh avangin kan ngaihdan a ni lo lutuk a.
"Zo khaw lam atangte'n zawhna kan dawng reng a, tam takin a tak tak emaw te an ti a, mahse he thil hi dawt dik tak a ni. Hetiang hian ka inchei ngai lova, Scorpio chu ka khalh thin ngei a, mahse chanchinbu-a an tarlan ang hi chuan ka inchei ngai lo.
“Editor pawh hi ka bia a, mahse awmzia a awm tâk loh avangin thil awmdan dik tak leh thudik zawka hi sawichhuah ngai niin kan hre ta a ni.
"Mizofed-ah hian petrol ka la thin ngei bawk a, a hmuna thawktute leh petrol min petu ngei pawhin hemi chungchang hi a lo chhiar a ti a, 'Hau rawh' tih hial-in min hrilh a.
“Keimahni lam atang chuan thudik lo an tarlanna avanga thudik zawk tarlang turin kan ngen mai a ni a, mahse awmzia a awm tak si loh avangin chanchinbu kaltlangin thudik zawk hi tarlan tulin kan hre ta ani," tiin Mimi Renthlei hian a sawi.

December 18 zanah ‘In Rock We Trust’

2009-11-27T00:11:00.000-08:00

Andy-a'n "Sweet Child O Mine" sa ta sela i ngaithla peih ang em? He hla i ngaihthlak lohna a rei tawh tiraw? Mr. Big an lo thleng thei bawk si lova, 'Freddie's Nightmare' hovin “To Be With You” te sa ta bawk sela. Hardray in “Bed of Roses” in rawn dawm sela, RK-a Bawihtlunga’n Metallica “Enter Sandman”. duhthusam a nih chu! Mahse a takin a thleng dawn.
December 18, 2009 hian AR Lammual -ah Hard Rock Night hman tum a ni a, hla rock hlang a ni mai. Concert i en a, i hla sak thiam loh emaw i hla hriat miah loh an rawn sa a, a nuam miah lo.
A karah i hla hriat an rawn thlawh zauh a i thutna atanga dingin i thlawk chhuak ta nghal a. Hard Rock Night in a tum ber chu rock hla lar hlir zan khata entute zawng zawng deuh thawin an hriat a, an zawm dual dual theih tur hlui a ni. I en a nih ngai chuan chu pawh...a.. chu pawh.. i ti dawn tihna a nih chu.
Buatsaihtute chuan mi ngaihdan lakhawmin then-khat chu tleirawl, mipa mid 30's, musician leh hmeichhia kum 20-30 inkarah ngaihdan an la a, chumi atang chuan hla short list lehin tunah hian a lar lar an thlang chhuak vek tawh a, zai turte pawh an zir bur bur tawh a ni. Duh duh a sak ngawt thiang lo. Track music tel lo live music chauh a ni ang.
Guns n Roses, Queen, Bon Jovi, Ozzy Ozzbourne, Judas Priest, Aerosmith, Nazareth, Metallica, Deep Purple, White Lion, Iron Maiden, Poison, Ugly Kid Joe, Def Leppard, Mr Big, Van Halen, CCR leh White Snake te atanga hla hit thlan khawm chauh sak a ni dawn a. Jess Beyond (Andy n band) Saga (RK-a Bawi-tlung band), Hardray leh Freddie's Nightmare te an che ang a. Intihhlimna hun leh inelna hun chi hran hran hman a ni bawk ang.
Sound system pawh DAS Aero 50 Line Array ngat hman a ni dawn a, North East a sound nei tha ber Active Sound in a neih thar chu an chhawp chhuak dawn a ni. Hard Rock Night hi Active Sound, Event Solutions leh Assam Rifles te huaihawt a ni a Vivel sponsor a ni bawk.

Ka lo kir leh ta e

2009-11-27T00:06:00.000-08:00

Column dang chan avanga thla sarih dawn blog buaipui chhunzawm theih a nih tawh loh hnuin Pathian zarah hun remchang a lo inher chhuak leh a, Pathian zarah tun atang chuan pangngai taka kalchhoh leh beisei ila, chhiartute'n min fin chhuah pui zel turin thinlung takin ka sawm a che u. Ka lawm e.

The Scavenger Project atangin Michael M Sailo a bâng

2009-03-26T01:56:00.000-07:00

Vai ramah pawh mikhual lo- Mizo band beiseiawm berte zinga mi, The Scavenger Project band atangin rapper Michael M. Sailo-a a bang. A banna chhan nia hriat dan chuan, hman deuh atanga ringtone sum-dawnna a kalpuinaah hian a hun leh tha zawng zawng a sen avangin band hmalaknaah leh hla zirnaahte a tel tha thum thei tawh lova, hei vang hian a hmalama lo inthiar fihlim mai hi tha zawkah ngaiin a bang ta a ni.
Hemi chungchangah hian band founder Victor-a hi biakpawh kan tumna a, a tlang theih tlat loh avangin an kal zel dan tur hi hriat theih a la ni lo. Second volacalist leh arrangement lama an khaipa ber ni bawk Michael-a tel lo hian engtinnge hma an lak dawn tih hi hriat châkawm tak a ni na a, tun maiah chuan chanchin thar hriattur a awm lova, Michael-a aiawh tur hian 'Run Away' music video-a zaitu pa ber LR-a kha an dahnghet nia hriat a ni.
Amah Michael-a pawh hian a band mate hlui te number pakhat mah a kawl tawh lova, an inmamawh vak lem lo nge ni a, kha leh chen an lo inkawp hnu pawha a thiante number engmah a chhawm zui ta lo hian ngaihtuahna a ti thui hle a. Chutih laiin, an inkarah inhmuhthiam lohna emaw harsatna engmah a awm loh thu leh ama mimal thil vanga tel zawm thei tawh lo a nih thu a sawi.
The Scavenger Project band hi 'Mag-dalene' guitarist hlui Victor-a din a ni a, a tir phat atang khan an music kalpui danah ngaihven a hlawh nghal hle a. Mizoramah thawm lian tham an neih loh laiin, Vai ram pur lamah an tla na hle thung a ni.
August 2, 2008 zan khan National Independence Rock Contest-a India ram Zone li-a thenah East India Zone thlannaah pakhatna niin, August 28 zana Mumbai khawpuia final-ah an tling lo hlauh.
Heti chung hian hnam dang zinga an hla chuam 'Signs' an thlawh erawh kha chu a fuh tawp tawp tih mai loh chu sawi tur dang a awm lo. A hmuna entute leh TV atanga thlirtute pawh khan a nalh zia an sawi bang lo a ni ber.

Mike, Well Done!
Michael-a hi tunlaia digital media player hmanraw pawimawh tak, msuic leh video file Inpui an tih mai 'iTunes'-a Mizo zai mite zinga hla dahlut hmasa ber a ni a. Heng a hlate hi a thianpa Malsawma (Delhi) in lo buaipuiin, internet kal-tlanga lei theih turin a pho chhuak sak a ni. Ringtone an siamte pawh hi www.karaoke-version.com ah en theih a ni tawh bawk a, hengte hi a bik takin Africa ramah a tla na hle.

Ellis Saidenga Tribute Concert a hlawhtling

2009-03-23T01:17:00.001-07:00

March ni 20 zan khan zaithiam mai bak ah hla phuah thiam, Leitlang Awitu ti hiala hriat Prominent Journalist ni bawk, Ellis Saidenga Tribute Concert chu Vanapa hall ah neih a ni. Ellis Saidenga Attribute Concert ah hian he hun hluttu mi thahnem tak an kal.
Organising comittee lam atangin Pu H.zosangliana’n thu hma a sawi a, Pi Buangi sailo, Pu Robert Lalchhuana prominent Journalist, MJA, Pu KL Rochama Ex MLA, Flam leh Dr Laltluangliana Khiangte Jt Secy MAL ten thutawi an sawi bawk.
He hun ah hian Ellis saidenga hlimthla thlir hona hun hmana nih hnu ah chhungte hnen ah Ralna tangka cheng nuai khat chu Pu LR Sailo director Information and public relation dept. chuan a hlan a, hemi hnu hianzaithiam tak tak ten kalkhawmte zaiin an awi a ni. ‘Leitlang Awitu’ ti hiala hriat Prominent Journalist a ni bawk.
Ellis Saidenga hi Pu ZD chhawnbuanga leh Pi Saichhingpuii Sailo te fa 6 zinga a naupang ber niin kum 1940 April ni 28 khan Christian Hospital Serkawn ah a piang a, kum 1961 ah Matrict zir zovin kum 1964 ah D.Pharm Diploma course a zo leh a, Kum 1972 atangin Journalism lam luhchilhin nitin chanchinbu Zoen a ti chhuak tana Mizoram Journalist Assn chuan kum 60 chin chunglam kum 30 meimit lova chanchinbu lo enkawl tawh te tana Chawimawina a buatsaih Prominent Journalist Award chu a dawng nghe nghe.
Politics lam ah pawh Ellis Saidenga hi a mikhual lo hle a, kum 1979 khan Hnahthial bial ah MLA atan thlanlin a ni bawk. A zaithiam mai bak ah thu leh hla lama mi ril a nihna hian mi te hriat a hlawhtir zawk mah a, kum 15 mi a nih atangin hla a phuah tana, hla 30 chuang a phuah a.
Heng zinga a tam zawk chu Lengzem niin All India radio ah hla 80 vel a khunga B.high grade artist niin kum 1998 khan outstanding Artise chawimawina AIR chuan a lo hlan tawh nghe nghe a, Rimawi khawvel leh thu leh hla lama chawimawina hi chi 7 lai a dawng tawh a, Cancer natna avangin kum kalta 2008 september ni 29 khan Aizawl Civil Hospital-ah Chatuan ram a pan a ni.

Aizawl khawpui sawinghing turin T-Melody inpeih ta

2009-03-23T01:12:00.000-07:00

Ngan takin Lungleiah show an nei a, hlawhtling taka hun an hman hnu-in dam takin Aizawl an lo thleng leh ta. T-Melody chuan Aizawl khawpui sawi-nghing tak tak turin ruahmanna an siam mek a, nizana kan biakpawh lai hian sawihona an lo nei mek nghe nghe. 2006 kuma 'thil mak' an thlen tir aia ropui zawk chhawp chhuah an tum a ni. An nep lovang.
Chawimawina hlan
Hetih lai hian, Lunglei MZI te'na Zohnahthlak insuihkhawm lehna tur atana zai leh rimawi hmanga an hmalakna chu chhuanawm tiin chawimawina hun an lo hmanpui a, an lawm hle. "Kan phu loh zet chawimawina kan dawng hi a ropui kan ti a, kan lawm tak tak a ni.
“Lunglei mipuite kan chungah an tha em em a, min lo dawnsawnna kawng hrang hrangah sawisel tur engmah a awm lo. Media lam pawhin theih tawp min chhuah pui a, an chungah kan lawm hle bawk," tiin drummer Tluanga'n a sawi.
Sawi chhunzawmin, “Sound system a tha chiah lo tih loah chuan harsatna kan tawk lem lova, current a awm that mumal loh avangin show neih laia han buai deuh chang a awm thin a. Mipui an tam a, open air a nih avangin chhimtu pawh an thahnem hle. Hetianga mipui hlut hlawh ‘show’ hi Lungleiah a la awm ngai lo an ti hial,” a ti bawk.
Pawl hrang hrangin sawm
T-Melody te hian sawmtu an ngah hle a, an sawmna hi zahawm an tih em avangin a theih ang anga tihhlawhtlin an tum. An rate erawh sawi thiam a har hle a, an sawm dan a zirin a danglam lo thei lo tia sawiin, "Engemaw harsa tak taka insawm-na te a awm a, chutih laiin sumdawnna lam hawi pawh a awm bawk a, chuvang chuan rate dik tak a neih theih lo.
“Kan thiante hi khi lamah pawh hna nei, nupui fanau chawm te an ni a, hei vang hian hriatthiam an ngai hle bawk si a, a tlangpuiin inbiakremna ang chuan kan la kal hrih," tiin an kalphung a sawi lang nghal bawk
Aizawl leh a chhehvel
Tunah hian Aizawl khawpui an sawinghin hun tur taka hi la sawi thei lo mahse, April chawlhkar hnihnaah hi chuan inlan theih ngei an inbeisei a, tunah pawh hian an inpeihfel der tawh a ni. Hunpui an hman hma hian Aizawl pawn lama sawmna an dawn neuh neuhte an tihlawhtling hmasa phawt ang.
Vanapa Hall hian a zawh meuh loh avangin tun tumah hian Lammual tinzawn a ni a, sound system pawh a tha thei ang ber chhawp chhuah a ni bawk dawn a ni.
Tute hming nge lang?
An mahni samwtute zingah hian LPS leh Delta hming pawh a lang nawk tawh a, tin, pawl anga sawmtu pawh an thahnem hle a, hengte hi engtinnge an tih dawn hriat a ni lova, chutih laiin, vawi khat na na na chu Lammual hi lamtual atan min hmanpui ngei dawn tih erawh an sawi chiang tawh a. A hun leh ni chiahina dang tawh. Nghak phawt ang.

‘Chhas’ chungchanga Zomuanpuii inpuanna

2009-03-22T00:24:00.000-07:00

A zin renga, a zai reng a. A nakruh bo melh hun pawh a nei lova, ngaihzawng han tih tur tak ngial pawh a la vai tluang zel. Mihring a nihnaah thinphu han ti rang em emtu te hi tawn a châk a, a thlahlel ve a, mahse tuna a dinhmun ang hi chuan a remchang si lo a ni.
Hnahthial YMA Conference chhim mek Zomuanpuii chuan nizan khan, "Dik tak chuan ngaihzawng hi ka buaipui hman lo. Luck loh vangte pawh a ni thei a. Tin, tun thleng hian ngaihzawng tak tak hi ka la nei lova, star te chu nei ve bawk mahila, amahin min duh a. Kei pawhina ka duh a, ‘inngaizawng’ an tih ang chi ka la tawng lo, ka vanduai nge ka vannei pawh ka hre tawh bik lo," tiin a sawi.
Zomuanpuii hian a rilru dik tak phawrh chhuakin, "Tunah hrih chuan ka la buai ve deuh bawk si a, ngaihzawng hi chu neih loh hrih pawh pawi ka ti lo," a ti. Tarlan tawh angin tunah hian music video collection a buaipui mek a ni.
Tun thla chhung ngeia tihchhuah hman a tum laiin editing lamah harsatna a awm avangin hla thum vel chu Lungleiah shooting neih that leh a ni a, hei vang hian thla thar lam khi an tinzawn lo thei ta lova, music video siama a buai hle laiin hmun hrang hrang atangin sawmna a dawng reng bawk si a. Tu emaw tan bika 'inpek' hi chu thil harsa tak a ni a, amah pawhin a zep lo.
Hun leh ni a her liam zel anga, duhzawng leh hmangaihte pawh a la tawng ve ngei ang. Chutah chuan, "Hmel tha te chu an hlu a, mahse a pawimawh ber nia ka hriat zawka chu- 'min care em emtu tur' a ni.
“Hmeichhiate hian care tu kan mamawh zual bik a, a takin la tawng ve lo mah ila, thiante'na an sawi leh ka hmuh chinah hi chuan 'mi duat thiam em em mipate' hi an pawimawh a, an hlu berin ka hria," tiin zanriah ei kham hlim hlawl Zo-muanpuii hian a sawi.
Hetih lai hian, Sihphir atanga Aizawl-a insuan luh an tumna erawh hmanhmawh thut thut theih a nih loh avangin music video tihchhuah hnu-ah thuchiang an nei thei dawn chauh a ni.

Daduhi sex video nia sawi chungchangah FIR thehlut

2009-03-19T03:16:00.000-07:00

Chanchin sawi
nuam loh zetin
Zoram dung leh vang a tuam chhuah mek laiin, tunah hian intih-hmingchhiatna thil duhawm lo zet mai a lo inlar leh ta a. Zaithiam lar Daduhi video tiin tunah hian computer-ah a awm leh fur tawh.
Mahse, hei hi chiang taka en chuan amah a ni lo tih a hriat ngawih ngawih a. Daduhi leh a chhungte pawh an lawm lo hle. Mipui pawhin thudik zawk hi hria se an tih avangin chak takin hma an la mek.
Hemi chungchangah hian March 17, Thawhlehni khan Dr. Lalrinsanga Khiangte chuan Police-ah FIR a thehlut nghal a. He thil hi ngawihbo pui chi-ah an ngaih loh avangin London khawpui atang-in Daduhite nupa chuan hmanhmawh ang reng takin thuchhuah an siam nghal bawk.
Video-ah hian background music-ah 'Ka chhai lai D' tih hla play a ni a, a file hmingah 'Daduhi' tih a ni bawk. A changtu erawh amah ni lovin midang daih a ni thung. En thuak chuan ‘A ni mai awm mange’ tih mai pawh a awl a, mahse hnai deuh set sawta a hmeichhe hmel a lo lan dawn hian mak takin a in cut daih thin.
Tin, a hmeichhe vun rawng pawh hi Daduhi tawngkam takah 'A ngo' zawk a, han en thuak chuan an hmel te pawh inanna lai an nei na a, chiang taka en erawh chuan danglamna hmuh tur a awm thung.
Chanchin buatsaih lai hian police an la che chhuak lo nia hriat a ni a. Police station atanga thudawn danin, confidential a la nih avangin an la chhuizui mai hrih lo tih a ni a. Hetiang lam hawi case hi an dawng thin tawh na-in, man erawh an la nei lo bawk.
Heng thil hi ram thangmek a nihna laiah hmeh mih hmak theih chu ni lem lo mahse, case 4-5 vela thubuai siam anih chuan zawi zawia a reh mai a rin thu officer pakhat chuan a sawi.

(Pi Tluangi (Daduhi nu): "March 8, Pathianni khan ‘Ka nu, chu-tiang khatiang thil a awm niin an sawi a, lo ngaihven deuh te u' tiin a sex video nia sawi a darh mek thu min rawn hrilh a.
Keini chuan a hriat pawh kan la hre reng reng lova. Tichuan, kan han ngaihven ta a. A tawpah chuan min hrilh thei tute an lo awm a, Daduhi pawhin a thiante hnen atanga a copy a hmuh tawh thu min rawn hrilh lehnghal bawk a.
A nih loh zia kan chiang a, hetianga titute hi kan dem tak zet zet bawk a, kan rilru a na a, hrehawm kan ti hle a ni.
"Kei chuan ka la en lova, mahse ka fapate'n an en tawh a, a entawh te pawhin a nih loh zia an sawi vek. Pawi ka tih em ema chu - Record-ah hmuh theihin a awm a, hming a inziak a, hla pawh play a ni bawk a. Na-kinah an fanu Malsawmzuali hian lo hre ta se a pawi dawn lutuk a ni.
A pasal Hruaitea pawh hi computer expert a ni a, a nih loh zia a hmu chiang tawh a ni. Nupa inkara inhmuh thiam lohna leh inrin-hlelhna thlen thei a nih avang hian tha lo ka ti a, ka thinur khawp mai. Setan-a hnathawh rap-thlak tak a ni.
"Tunhnai deuhah hetiang lam hi sawi a awm tawh a, a lo ni tak tak an ti bawk si a.
Hei hian Daduhi nia an sawi pawh hi ni tak takah tam tak chuan an lo ngai hman a, hei hi a pawi khawpin ka hria. Ka fanu hi lovesong sak vanga zuam ngawt chi a ni lo. Mi piangthar a ni a, lovesong a sa a, love song hi sualah a ngai lo a ni mai,")

TAHAN returns PBK-a Biangbiakna

2009-03-19T03:00:00.000-07:00

Burma-a Zofate khawpui Tahan leh a chhehvela zaia rawngbawlna thlakhat dawn a neih hnu-in gospel singer lar tak PBK Liankhuma chuan dam takin Aizawl a lo thleng leh ta. A zinna report hi a ngaihnawm hle a, amah pawhin nuam a ti a. Tahan leh a chhehvela mipuite thatna leh felna chu hahip tak meuha a sawi laiin Khampat Bungpui, tui lianin a lak mai tur a sawi bawk chuan ngaihtuahna a tithui hle.
"Heti lam atanga kan ngaih ang ngawt a ni lo. Han thleng chiah ila, khi lama kan unaute fel zia leh that zia hi a taka hmuh theih a ni. Helaia kan buaipui hi chu tawng mawi lo ni suhse, khi lamah pawh hnawksak an tihte an ni zel a. Mikhual chhawnchhaih leh ngaihsak dan an thiam a, an sakhaw mi em em bawk. Thlakhat chuang zet ka châm a, an mizia hi hrechiang thawkhat hlein ka inhria," tiin nizan khan a sawi.
"Khampat Bungpui kan han hmu bawk a, a lunglen thlak khawp mai. Amaherawhchu, a bul lawka lui lianin a la mek a, tunah hian mietre 5 vel lekin tuiin a la chim lo han hmuh phei chuan lung a chhe thei hial. Hetiang zel anih chuan kum 4-5 ah Mizote min ti Mizotu 'KHAMPAT BUNGPUI' hi kan chân dawn tihna a ni," a ti.

May-ah ‘Miss Mizoram’ thlang dawn!

2009-03-17T01:38:00.000-07:00

Kum 2008 tawp lama mi tlawmngai leh thahnemngai tak takte'na an din, 'The Grand Society of Mizoram' chuan March 12, Ningani zan khan I&PR Auditorium-ah hlawhtling takin ‘Pre-Chapchar Kut Show' an buatsaih a. Sawmbik te puala neih he program-me-ah hian an hmalakna tur hrang hrangte an puang a, Mizo thalaite tana an ruahman leh thil tum an sawite chu a bengvar thlak hle bawk.
Heng zingah hian May thla chhung ngeia buatsaih an tum, 'Miss Mizoram' thlanna chuan ngaihven a hlawh ngei dawn niin a lang a. A chhan tam tak zingah- Miss Mizoram thlannaah hian neuh neuh leh a behbawm a awm thin a, hengte hi mak tak takin a ri chhuak nasa thei hle bawk a. Lungawilo leh lawm chiah lote'n thawm an chhuah nasat theih bawk avangin miss thlanna tur pawh hian engemaw boruak chu a keng tel ngei dawn niin a lang.
Kum 2000 khan 'Miss Millennium' thlan a lo ni tawh a, 2002 khan 'Miss Mizoram' thlanna neih a ni a. Boruak ri laih a awm nghe nghe a, 2005 a lo thlen meuh chuan media kaltlanga lung-awilohna authawm chu ring tak a ni tawh.
Hemi kuma 'Miss Mizoram' atana thlan chuan ram pawna zin theihna a neih chung-changah a kal thei ta mai lo leh organiser lam ina an sawi hmuh anga thil a awm lo nia lo langa chu sawi chhuah niin, a vui vai thu pawh media-ah tarlan a ni nghe nghe a, chanchinbu lam pawhin an chhuah nasa hle.
Hetih lai hian, Organiser te chuan a tir lamah tlema thil kal fuh lo awm mahse, a tawp lama form fill up turah Miss Mizoram hian a kalpui duh tawh lo angin an sawi a, a lehlam lehlamin an inpuh tawn nasa hle a ni.
Hemi chungchangah hian Mizo pa lar berte zinga mi Lelte Editor C.Dinthanga chuan, "Travel Agent te nena an inkar a ni a, keini lamin engmah kan hriatpui tawh lova. Miss Mizo-ram pawh khan a buaipui zui duh tawh bawk si lova, media-ahte ziah lan ani chiam mai kha pawi ka ti a, vawikhat phei chu ka va chhuah chhal nghe nghe a ni," a ti.
Khatianga thawm duhawm lo tak a awm chunga Miss Mizoram thlanna neih leh tura chu a huphurhawm viau lawng maw tih zawhna chu, "Keini lam chuan harsatna kan nei lo. Miss Mizoram hi Lelte thlan tur a ni tawh lova, The Grand Society of Mizoram thlan tur a ni a. Kan sawi duha chu - tumah kan fel fai lova, keipawh ka fel fai bik lova. Hemi vang mai maia thlan loh leh tihtawp ang chi chu kan duh hauh lova, May thla khian kalpui ngei kan tum a ni," tiin a sawi.
Pu C.Dina hian sawi chhunzawmin, "Vui vai tawk hi chu an awm reng a, an awm zel bawk ang. A tling lo hlei hlei hi an âng ring lehnghal a. Thawkkhat lai phei kha chuan tlin loh vanga Court-a kal tumte hial an awm hman a, a zia lo khawp mai. Tun tumah pawh hian mi zawng zawng tihlungawi theih a nih dawn loh laiin, a fel fai thei ang ber leh a dik thei ang bera kalpui kan tum a ni," a ti.

MS-i, "Youth Icon" a nihna hlih sak

2009-03-16T04:48:00.000-07:00

Mipui thlan 'Youth Icon' nihna hi a hlu a, hei hian mawhphurhna tam tak a keng tel bawk a. A zahawmna leh a hlutna hi vawn zel a ngaih avangin Mal-sawmtluangi Fanai chu Youth Icon a nihna atangin Inrinni khan chawlhtir a ni.
Hemi chungchangah hian March 8, Pathianni khan LPS puipa ber Pu Sawma chuan, "MS-i chungchang hi tunkar chhung hian kan tifel anga, a lo ni ngei anih chuan 'Youth Icon' a nihna hi hlih sak a ni ang," tiin a lo sawi tawh a. A sawi chhunzawm zelnaah pawh, " A tir atang khan kan sawi chiang sa vek tawh a. Youth Icon hi mipuiin an thlan, mipui entawn tlak nun neih a ngai a, fimkhur leh uluk taka nun hman a pawi-mawh thute nen lam kan hrilh vek a ni," a ti tawh a.
Sawi chhunzawmin, “Hotu lam pawhin engemaw chetsualna emaw hmingchhiatna a awm chuan a nihna hi hlih sak theih a ni ang tihin inkaihhruaina dan a awm vek tawh a. Tun tuma thil thleng chungchangah pawh hian amah kan hmu phawt anga, kan sawi ho hnu-a tihchian (confirm) anih veleh a tul angin action lak nghal a ni ang. Mipui thlan an ni a, mipui duhdan leh lawmzawnga an awm loh chuan mipui pawh hian 'icon' atan an duh bik lovang," tiin a lo sawi tawh bawk.
Hemi bawhzui hian March 14, Inrinni khan Youth Icon thlangtute leh puipate chu inhmu-khawmin amah MS-i pawhina 'Icon' a nihna hlih sak tura a ngenna chu sawi ho a nih hnu-ah Youth Icon 2007 a nihna chu hlih sak a ni.
Heti hi a lo nih takah chuan Youth Icon 2006 Zoramchhani (RC-i) hian 'Youth Icon' nihna a chelh chhunzawm nghal. He nihna hi a rochun a ni lova, Mipuiin an ni pahnih hi Icon atan an thlang tawh a. MS-i’n a theih tak si loh avang leh pahnihna leh pathumna te hi Icon atana mipui thlan an nih bawk loh avangin RC-i hian Youth Icon nihna hi a chelh tlang dawn tihna a ni.

Chapchar kut-ah T Melody inlan dawn

2009-03-12T02:00:00.000-07:00

Mizoram history-a chuang hlen tawh turin, 'Unplugged show' nei hmasa ber an ni a. Kum 2006-a Mizoram an rawm tuam dan ropui lutuk tak mai kha Zo rimawi khawvelah hian hriatreng a ni tawh ang.
Mizo band- khatiang em ema ngaihhlut kha a la awm ngai lova, a awm zen zen tawh lo mai thei bawk. A pui a nawiin kan hlim pui a, kan lam pui. Vanapa Hall chhung mai ni lo, pawn lam pawh khan a dawl zo lo.
Khai le, Tahan chhul chhuak, T Melody band chuan Chapchar Kut-ah min awi dawn ta e. Tunah hian Yatri Niwas, Luangmual-ah inkulh mekin hla an zir tluk tluk tawh a, an phur tawh hle. Tun tumah hian member an kim thap laiin, an zaipui hmeichhe pathumte erawh ro-khawlhna lian tak vangin an lo tel thei hrih lova, mahse a hnu lama an rawn zawm thuai erawh an beisei hle.
An zaipu Lalnun-sanga chuan, "A tirah tak chuan 'Lindo te Unau' tih leh 'Rock Thul' sa ila kan ti zet na a, hotu lam atangin hla hot deuh leh mipui chawk phur thei ang chi ni thei se a va duhawm ve an tih leh tak avangin ‘Rock n' roll’ emaw ‘Rock thul’ emaw kha kan sa mai thei a, thutlukna chiang tak kan la siam lova, kan zir vel mek," tiin nimin chawhnu dar 2 vel khan a sawi.
An zaipui hmeichhe pathum an lo tel theih mai lohna chhan pawh sawi tel nghalin, "An mahni tawkah an tul hlawm em em a, Dubai-a 7 star-a thawkte an awm a, Bible School leh Fahrah chawmnaa thawkte an nih hlawm avangin hun an nei lo hle a. Daisy phei chu tunhnai lawk khan a pa-in a boral san bawk nen.
“Kim taka lo kal kan tum na a, tum angin thil a kal ta lo a ni. Pante-i pawh hi Bible School-a naupang zirtirtu a ni a, hun a nei lo khawp mai a. Kan cham rei theite a nih chuan min rawn zawm theih chu kan beisei khawp mai," a ti.

March 19-20 ah Lunglei
Ruahman anga an awm theih chuan Lunglei khawpui sawinghing turin tunthla ni 16 hian an phei dawn a, Vulmawi Chanchinbu bultumin ni 19-20 zan hian show ngan tak an nei ang. Aizawl khawpuia an inlan hun tur chiah erawh sawi chian theih a la ni lova. YMA hming angin veng pahnihin an dawr mek a, chutih laiin an mahni dawr hmasaber tu hi zaithiam Elizabeth Zodinpuiite an ni thung.
"Kan la sawi thei mai lo. Eli-i pasal hi a zin a lo la hawng lo a ni awm a, inbiakna kan neih theih thuai kan beisei a. Tin, midang min rawn betute hi YMA hmingin veng pahnihin min rawn be bawk a, inbiakna hi kal lai mek a ni vangin thuchiang sawi theih kan la nei mai lo. A pathum-a tihhlawhtlin hram chu kan duh khawp mai," tiin Sanga hian a sawi.
T Melody hi an phur hle a, Zofate khawpui AIZAWL ah hian mi-khual nih an tum hauh lo. Kumin Chapchar Kut zet zawng a fuh dawn e.

MS-i hnena Tetei Ralte thurawn

2009-03-10T22:16:00.000-07:00

Mihring dikna leh chanvo hi mipui rorelna hmunah pawh palzut fo a ni a, a bik takin hmeichhe chungchangah phei chuan a nasa lehzual a tihtheih. Tunhnaia thil thlengah pawh hian tam tak chuan dem tur leh tur lo an hre lo.
Khawvel changkanna-in a ken tel mobile phone te an han dem thul. A mipa dem tawk an tlem lova, a hmeichhia zawk sawisel pawh tam tak an ni. Heta thil pakhat lo langa chu - hetianga hmingchhiatna a awm rau rau a nih chuan Court-a kal a, thubuai thlen mai hi a tha ber niin Tetei Ralte chuan a sawi.
" Court-a thlen theih - case lian tak tak hi ka nei tawh a. Mahse, mualpho ka hlauh em vangin engmah ka ti lo. Ka nunah hian thubuai siam theih tur hi ka tawng ve tawh a ni. Khawvel milar Chris Brown leh Rihanna chungchang kha ka chhiar a, "Ka van lo hre har tak em" ka ti! Chris-a thiltih vang khan Rihanna chuan court-ah a zualko mai a. Mahse, keini erawh chu mualpho kan hlau tlat. An ni phei chu khawvel hriat lar an ni lehnghal.
“Milar pawh kan ni lo. Vairengte pel chiah ila tu mahin 'Tunge kan nih' an hre tawh lo. India-ah phei chuan kan lang lo hrim hrim. Rihanna-i'n court-a a thlen ngam chuan engatinge kan thlen ngam loh bik ang? Sorkar pawh hian dan hmangin hrem ngei sela, tin, hremna hi phuba lakna a ni lo tih pawh hi mipuite hian i hre tawh ang u.
"Khawvel thiamna hi dem chi a ni lo. Tun tuma MS-i chungchangah pawh hian a ni tak tak a nih chuan tawmin mai lovin, FIR thehlutin, Court-a hmala hmasa bertu ni sela, he vanduaina hi hmangtangkai hlauh zawk se ka duhsak khawp mai. Hei hi fight se ka ti a ni," tiin nizan khan a sawi.

Australia returns Mimi Biangbiakna

2009-03-10T00:48:00.000-07:00

Dam takin a pianna Mizoram leilung a rawn rap leh ta a, zaithiam duhawm tak, Australia returns- Mimi Lalzamliani chuan an chenna-In ah hahdam takin Zo thlifim a dawng leh ta.Chin Human Rights Organisation (CHRO)bultuma Australia khawpui hrang hrangah Burma rama kan unau, tam tuar mekte tanpuina tur atana concert neih chu a hlawhtling hle.
Mimi pawh hian nuam a tihzia hahip tak meuhin a sawi a, a zinnaa nasa taka an lo lawm leh a phuloh chawimawina an lo pek chu lawmawm a tiin, Chin unaute that zia a sawi bang lo a ni ber.
"CHRO hruaitute an fel em em a, keimah chauha kal ka nih avangin min ngaihtuah lutuk a, an te lo hian khawiah mah ka kal an phal lo.
“Min lo hmuah dan leh enkawl danah ka lawm em em a, ka chunga an thatna kha ka rul seng lovang," tiin Mimi hian a sawi. Khawpui hrang hrang a tlawhnaah hian chet thatna a neih ang bawkin chet chhiatna pawh a nei a. Chung zinga langsar tak mai, tun thlenga a ruk taka a la zah em em na pakhat chu hetiang hian a sawi chhuak.
"Biak In-ah sacrament (Lalpa zanriah) kan ei a. A rual-a ei tur a nih laiin Pastor thusawi kha ka lo hresual pek a, chhang leh wine kha eirual tur emaw ka ti a, min pek veleh a rual khan ka tlak tawp mai a. Midang tuma'n an la tlak der si lo.
“Ka zak lutuk chu, ka khur nghal chur chur a, tlar hmasa bera thu ka ni leh zel bawk nen, ka hawi lo hrim hrim," tiin nimin piah tlai khan Mimi hian nui deuh var var chungin a sawi a, kha thil thleng kha ngaihtuah nawn leh pawh a ngamawm loh tih sawiin, a hmai pawh a sen awn awn nghal a ti.
Australia ram leh a chhunga chengte a hmuh dan pawh sawi nghalin, "An ram hi a nuam tih chu sawi ngai lo turah ngai ila. A chhunga cheng mihringte hi an taima hlawm hle a, hna an thawk nasa a, sikul an kal loh chuan hna an thawk a ni mai. Tin, fashion-ah an sâng lem lova, slipper te nen pawh an kal mai a, tuma'n an enzui lo.
“Thawhchhuah nei lem lo leh chhungte chawm hlawm tam takte'n Aizawl khaw-puia fashion- a kan intlansiak nen hi chuan lei leh van ang deuh a ni. An polite em ema kha mak ka ti khawp mai. Bus atanga an chhuk te hian driver hnenah "Ka lawm e" an ti deuh zel a, tawngkaa an tih loh paw'n zaizirin an lantir thin. Simple taka nun an hmangte kha kei chuan awhawm ka ti.
"Tin, an sorkar mawlh mai kha fakawm ka ti a. Sorkarin mipui a enkawl dan kha a tha em em a. Entirnan - piangsual leh fahrahte, tar upa te a ngaipawimawh em em. Piangsual fa neite pawh sorkar chuan a en-kawlna tur a pek sak a, a enkawltu pawh kha hlawh a pe bawk a, chutiang vel chu a ni," tiin Mimi hian an ram inrelbawl dan a sawi.
Mimi hian sawi chhunzawmin, "Aizawl kan lo chhuah hma zan khan ka mumangah thlawhna kan lo chuang a, kan lo accident lehnghal a, tuiah te ka tla a. Ka thangharh chiah mai chu ka hlauthawng nghal hle a.
“Thlawhnaah khan ka mu reng reng lova, ka meng tluan zak. Lengpui Airport-a kan thleng chiah mai chu ka tap lek lek a, ka awmdan dik tak pawh kha sawi thiam a har khawp mai," a ti.

MS-i- Youth Icon a nihna hlih sak dawn?

2009-03-09T00:34:00.000-07:00

MS-i chungchang hi tun kar chhung hian kan tifel anga, a lo ni ngei anih chuan 'Youth Icon' a nihna hi hlih sak a ni ang: Pu Sawma (LPS)

LPS-i’n thawm nei ta!
'Youth Icon' nihna hi a hlu a, hei hian mawhphurhna tam tak a keng tel bawk a. A zahawmna leh a hlutna hi vawn zel a ngaih avangin MS-i pawh hian a tuhrah chu a seng ngei dawn niin a lang a. Mahse, Youth Icon buatsaihtu LPS lamin tunah mai chuan thutlukna engmah an la siam lova, tunkar chhung ngei hian amah nena inbiak a, chumi atang chuan kal zel dan tur an rel dawn a ni.
Hemi chungchang hi sawiin LPS puipa ber Pu Sawma chuan, "He thil thleng hian min barakhaih tak zet zet a, hrehawm kan ti a, pawi kan ti hle bawk. Miin an sawi a, an hmu vek tawh a lawm tih vang maia Youth Icon a nihna hlih sak hi a dik ber lo kan tih avangin MS-i chung-chang hi tunkar chhung hian kan tifel anga, a lo ni ngei anih chuan 'Youth Icon' a nihna hi hlih sak a ni ang," a ti.

An hre sa vek
Youth Icon intihsiaka telte hnenah pawh chiang taka an hriattir vek thu pawh sawi nghalin, "A tir atang khan kan sawi chiang sa vek tawh a. Youth Icon hi mipuiin an thlan, mipui entawn tlak nun neih a ngai a, fimkhur leh uluk taka nun hman a pawimawh thute nen lam kan hrilh vek tawh a ni.
“Tin, hotu lam pawhin engemaw chetsualna emaw hmingchhiatna a awm chuan a nihna hi hlih sak theih a ni ang tihin inkaihhruaina dan a awm vek tawh a. Tun tuma thil thleng chungchangah pawh hian amah kan hmu phawt anga, kan sawi ho hnu-a tihchian (confirm) anih veleh a tul angin action lak nghal a ni ang. Mipui thlan an ni a, mipui duhdan leh lawmzawnga an awm loh chuan mipui pawh hian 'icon' atan an duh bik lovang," tiin a sawi

Nghawng a nei ang em?
He thil thleng hian Youth Icon thlan lehna turah nghawng a nei ang em? tih zawhna chu Pu Sawma vek hian, "A nei thei mai thei. Khalai boruak taka kha chu ka hrethiam chiah lo. MS-i hi 'Angel' a ni lova, zaithiam a ni a. Tute tan pawha chetsual palh theihna a ni. Youth Icon hi kuminah pawh lo buatsaih ta ila, tim phah em emna tur ka hre chuang lo.
“Hei hi chu mimal thil a ni a, LPS hian a hmingchhiat phah mai thei a, mahse tel zelna tlak lo angah chuan mipui hian an ngaih ka ring lo," tiin a chhang. Ama mimal ngaihdan a sawi tel nghal bawk a, "MS-i chanchin ka hriat phat khan ka khawngaih em em a, min shock bawk a. Nunze mawi tak nei tura inzirtirna kan pek nasat teh lul nen a pawi ka ti khawp mai.
“He thil hi, mi tam takina an lo chetsual tawhna a ni a. Hemi vanga pawlawh ta viauah chuan ka dah lutuk lo. Rilru chu a tibuai ang reng khawp mai," a ti.

[MS-i nihna hi hlih sak anih chuan top-3 a mi Joy-a leh Josephine te zinga tu emaw zawk zawk hian Youth Icon dinhmun an luah thei dawn chuang lova, Youth Icon 2006-Zoramchhani hi Youth Icon 2007 a ni nghal ang: LPS]

(Hotu lamin nikawp tura min ti a nih chuan ka nih kawp dan tura hi a duhthusam awm loh viau ka ti a. Mawhphurhna a thuahhnih dawn a, ka huphurh khawp ang: Zoramchhani)

Sex video leh Malsawmtluangi Fanai (Youth Icon 2007)

2009-03-05T22:01:00.000-08:00

Mizote rahchin apianga hrelo an awm lovang tihngam- Malsawmtluangi Fanai (Youth Icon 2007) chuan hetiang lamah bawk harsatna a tawk ve ta a. Hei hian Aizawl khawpui a sawinghing lawih a, Zo khaw lamah pawh ti ti lian ber a tling. Computer-ah a awm deuh vek tawh a, mobile phone-ah pawh a mikhual tawh lo hle.
An chenna In lam panin
Hemi chungchangah hian nimin chawhnu dar 3 vel khan an chenna Inah kalin, thil awmdan zawhchian kan tum a. Mahse, MS-i hi a zinchhuah lai tak anih avangin thil awmdan chiang taka hriat theih a ni lova. Network that tawk loh vangin biak pawh theih a ni bawk si lova, mahse a chhungte’n zan lama rawn ngaihven leh tura min hrilh hnu-ah office lam panin kan haw chho leh ta a.
Zan dar 7 velah kan be leh a, Aizawl lam panin an rawn chhuak mek tih a ni a. Kawnga an awm lai hian MS-i hian a chhungte bulah, "U Robert-a kha In-ah lo awm rawh se," a tih avangin kan han ngaichang leh hrih phawt te te a.
Kan thleng ta!
A hnu deuh lawkah chuan dar 8:30 vela an In lam pana kal tura sawmna dawng lehin, kan tlan thla leh ta a. Mahse, MS-i te hian kawngah harsatna neuh neuh an tawh avangin an rawn thleng lawk thei lova.
In-a kan thut hahchawlh hnu lawk hian Aizawl an rawn lut tihah a u bulah, 'An lo thleng tawh em?' tiin a zawt a, rilru nuam lo leh hrehawm ti tak chungin an lo thlen hun tur kan nghak a, darkar khat vel a liam tih-ah a nu nen an rawn thleng ta a.
A chhungte chuan thil sawiho tur pawimawh an neih thu sawiin, chhung-kua anga an sawi ho hma loh chu official anga engmah sawi theih a awm hrih lo an tih leh tak avangin thingpuite in hovin a zin kawng te kan han zawt nual a.
A hmu ve ta le
MS-i hian he video hi a la hmu lova nizan khan a hmu ve chiah a ni. Sawi tawh angin, a chhungte lamin thawm neih loh phawt an tih deuh avangin MS-i pawh hian thuawih takin a zawm mai a. A hmelah hlauh-thawnna leh chi-aina a lang miah lova.
Pachang takin a tuar a, huaisen taka hmachhawn a tum tih chu a hmel atangin a lang chiang reng a. Thu hahchawl hman lovin a in sil sawk sawk a, sitting room-ah lo thu pheiin, thil tam tak kan sawi a.
Hma lam panin
A chunga harsatna lo thleng chu pawi ti viau mahse, engkim anih tur ang ang a nih vek tawh avangin engmah a sawi lova, chhungte nena inrawn khawm hnu-a kal zel dan tur sawi tur an nih avangin engmah zawh zui a ni lo bawk.
MS, mangtha
A chhungte hi an felin an tha em em a, hun harsa tak an tawk mek chung pawh hian duhsak takin min lo lawm a, hlim taka kan inkawm hnu chuan dar 10:30 a ri ta reng mai a. Zinhah te an nih avangin kan inmangtha ta a ni.
MS-i chuan, "Ka thlaphang reng reng lo, min lo tawngtaipui dawn nia," tia min thlah hnu chuan Office lam panin kan inkhalh chhuak leh ta a ni. A hmalam hun turah engmah sawi chian a nei lova, engkim tithei Pathian kutah a innghat tawp a, a kaihhruaina ang zela kal a tum.

Mipui kan pawimawh
Tunah hian, Mizoram hmun hrang hrang atangin a chanchin ngaihven an tam hle a. Phone leh message hi an chhang seng lo a ni ber a. Hetiang hunah hian mipuite pawh kan thangharh a hun hle.
Tibuai lo thei ang bera kan awm tir hi a tul tak meuh meuh a. MS-i hian Hunthawl a mamawh a, hahchawlh a thlahlel ngawih ngawih a, a mimal nun leh zalenna hi i zah sak hram hram ang u.
Ngenna pawimawh
Tin, he thilah hian amah hi awmtha lo leh lerh em em anga sawi a ni mek bawk a, hei erawh hi chu hriat sual palh liau liau a ni a, a vanduai palh niin a lang.
Hei mai bakah a chungchang hi mak pui puia sawi a awm mek bawk a, thu puar-pawleng pawh a tam hle a ni. Hengte hi ama tawngka ngei atanga chhuak a nih loh chuan awihchin tawk thiam turin MS-i hian a duh tak zetin a ngen.

ZOROCK hla thar 'MOBILE' leak-out

2009-03-05T04:14:00.000-08:00

Kumin furpui hma ngeia tihchhuah a tum, album thar- 'The Essential Zo rock' -a hla mawi tak pakhat 'Mobile' tih chu tunlai hian Aizawl mai ni lo, Mizoram hmun hrang hrangah an play ri chuah chuah tawh a.
Album chhuah hma hauha hetianga hla mawi tak mai leak-out avang hian amah Zorock-a pawh a rilru a na ang reng hle a, mahse Pa zaidam tih takah a thinrimna hi tawngkam-ah chantir lem lovin a inbengdai hram a.
Chuti chung chuan, "Hla hlui-ah a chang der dawn a nia le, a van pawi dawn ve" tih bak engmah a sawi zui lo. Mahse, a rilru a na hle tih chu zep rual ani lova, a pawi tihzia hi hla pawhin phuah chhuak se, a hit leh pek viau ang tihngam a ni.

Eng 'Mobile' maw ni a?
He hla hi a ngaithla tawhte'n a nalh zia an sawi nak nak hlawm a, a thu inphuahdan fuh zet leh a 'chord' kaldan mam zet mai chu ngaihthlak zawh hnu pawha min ngaihthlak nawn tirtu a ni tlat.
He hla hi Maruat-i tana a phuah sak liau liau niin, request tu hian Aizawl atangin a zu be vang vanga, a thun man Rs. 2500/- te pe-in, he hla hian khaw eng a lo hmu ta kha a ni a. Mahse, album leh music video-a awm tur ni si a, tihchhuah a nih hma hauhin an nei ferfur ta mai si.
"Hetiang thil hi ka hlauh ruk em em a ni a, theihtawpin ka fimkhur ve a. Aizawl ka chhoh hma-in an lo nei sup sup tawh anga, thiante leh min duhsaktute zar liau liau kan buaipui hah ve em em mai, heti maia a awm tur hi kei chuan ka ngaingam lo a ni," tiin Zorock hian a sawi.
“He hla hi min request-tu leh midang pahnih hnenah lo ngaithla chhin turin ka thawn a, an mahni hnen atanga chhuak a ni tawh mai ang chu. A zia lo khawp mai. Sawi tawh ang khan, hla thar a nih dawn laiin tunah chuan 'Mobile' hi hla hlui a ni mai dawn tihna a ni a, a pawi khawp mai," tiin aw zawi raihin a sawi bawk.

Release dan tur kalphung
Tuna a tum dan chuan function te neih a, khuallian te nena han tih huks lam kha a lang lem lova, veng hrang hrangah YMA anga inhlawhna tha te a lo awm theihnan projector hmanga pholan a, amah ngei pawh zai a, a hmun-a album hralh mai a tum rilru a, a tih ngei pawh a beisei.
A hun tur tak hi a la sawi chiang thei lova, nizan lamah pawh khan shooting an nei a, 'Ka pheikhawk' tih hla pakhat a thun dawn bawk a, tun thla chhung hi chuan a tihchhuah hman a beiseiawm lem lo na-in, thla ral lamah rawn zin chhoh tumna a nei a, hemi rual hian a rawn rik pui hluai dawn nge tih erawh hunin a la hril ang chu!

Sailova rilru a nâ, cable neitute lakah vui

2009-02-26T23:42:00.000-08:00

Hetiang em em arilru-na taka a thusawi hi a awm angem aw... tih mai tur khawpin nimin tlai khan Sailova chuan cellphone connection chhe tak karah vawi engemaw zat a a rawn dial a. A rilru hrehawmna leh tawrh-natna hi a hminga tawmpui tu an tam laia a taka bawhzuitu an awm mang le si lo chuan a thinlung hi chhun anga na-in a hliam mek.
A kaikuang chu...
"A hmasaberin zai mite hi kan lungrual lova, chetchhiat kan hlau vek a, mipui rilru-a tlaknat loh thlengin. Mahse, kan thu a inhmu thei chuang lo. Demand channel hi kan mutan a ni vek a, han sawi ho thin mah ila, tlema lo kal thui leh intatluh hi an awm leh thin a, chu chuan harsatna min thlen.
Top artste te hian music video an pe tam lova, mahse artiste pangai ti mai ila, boruak rawn neih tumte hian an pe lut nasa a. A mihring taka hit kan duh a, kan châk em ema hi a buaithlak.
"Mizoram mipui zat hian zai mite eizawnna hi a la phuhru zo lo nasa a, hei taka hi cable neitute pawh hian min hriatpui se ka ti ngawt mai. Tunhma-a hla thlan ang khan kalpui leh se, demand channel hi chu duh leh karkhatah nikhat emaw chauh thlan theihna hun siam se, zaithiamte tel lova an kal theih loh ang bawk hian hemi kawngah hian kan ngenna pawh hi min zahder sak thiam se ka ti a ni. Kan eizawnna hi 'National' thil a ni lova, 'state' huam chhung bak a nih loh avang hian kan market pawh hi a zim.
“Mizoram tana tha ber chu Demand channel hi awm lo se a tha ber. Demand a tam chuan supply a tlem vang a ni a. Tunah hi chuan supply a tam lutuk a, demand pawh a hniam nghal rawih rawih a. Chu taka chu tuna zai mite dinhmun a ni. Nitin hmehchhuah turin supply a lut tam em em a, chu chu kan chhiatpui.
Rawngbawltute fihlim lo
"Tin, phalna tel lova CD copy chungchangah hian kohhran hruaitute leh pastor thlengin an inrawlh vek a. Fihlim alawi hi kan awm lo. CD ka va lei khan copy chhawn theihna right ka nei lo, lei theihna right chiah ka nei. CD kan write ruk hian a ruka thil ti (rukru) kan ni tih kan hre tawh lo. Hman deuh lawk khan mipakhat hian CD min rawn zawrh a.
"Lei rawh, i hlate pawh a awm a sin," a ti a, chutiang vel chu tuna kan dinhmun chu a ni tawh. Sap rama ka awm ve laite khan, 'Min lo copy teh a' han ti dek dek la, "I duh chuan original lei ve mai rawh' min ti mai thin. Ram changkang leh hnam ropuite hian original hi an ngaisang em em a, Mizo te erawh chuan Duplicate hi kan lawm tlat thung si a ni. A thei fa te pawh ni lem lo, rethei deuhte pawhin original neih hram an tum thin.
Cable neitute pawh
"Cable operator te pawh hian zaithiamte hi zahder ve se ka ti thin. Thalaite khawvel a ni tawh a, zai leh lam bak hi chu a tui tak tak theih tawh lova, chumi hlawkna lo teltu pawh an ni. Tuna a lan dan chuan, zaithiamte min zahlo tulh tulh a. Engemaw deuh hlekah min lam leh chul a, rilru hi a na ve thlawt a ni.
“Buongliankung tribute-a ka zai pawh kha cable lamah an lo lak leh ka hlauh vangin ka va phone khalh hman hram a, chutiang vel chu a ni. Concert leh function vela kan zaite an duhna lai lai an lo cut a, an thun leh hmiah thin bawk a. A inzahloh thlak ka ti khawp mai," tiin Sailova hian rilru na takin a sawi.

Mami Varte-i’n tunhma a phak lohna chhan sawi

2009-02-23T23:26:00.000-08:00

Tawngkam bungrua a tlachham deuh tih mai lovah chuan a rilru-a awm ang ang sawi mai thin a ni a, zaithiam invawng fai tak leh In lama chhungte kut ke ber anih vang pawha fak hlawh tak Mami hian engemaw harsatna hrang hrang vangin nikum lam khan boruak a nei lem lova, kum hmasa lam nena khaikhin chuan hniam lam a pan tih pawh a pha lo.
Tihian a sawi ta a...
"Kum hmasa lam kha ka pha lo tih chu ka hrechiang a, ka phak lohna chhan leh vang erawh chu chutianga han sawi mai tur ka hre lo na a. In lamah naute kan neih tawh vangte, Ka u te Dawr siam ka puih vangte leh In lamah kan buai ve rak rak thin vang ni berin ka hria a.
“Mipui beisei chu ka pha lo tih ka hria. Tin, video leh album buaipui hi tih tak tak a ngai thin a, mimal ang chauha hmalak theih a ni lova, chhungkaw tanrualte a lo ngai a, nikum lam kha chuan a chhungkua pawhin kan hman rual lo bawk nen, duh ang takin hma a lak theih loh a ni," tiin ‘Queen of Demand channel’ tia hriatlar ni thin Mami hian a sawi.
A sakhaw mi em?
Nimin khan inkhawm lem lovin In lamah a chawl hahdam zawk a, inkhawm loh vanga sakhaw mi lo anga ngaihna-in bu a khuar mekna ramah hian Mami chuan, "Ka inkhawm ziah chuang lova, engemaw rokhawlhna leh harsatna vanga inkhawm loh chang pawh ka nei. Sakhaw mi tak ka nih leh nih loh chungchangah hian sawi tur em em ka nei lo.
“Bible chhiar leh tawngtaite hi chu a theih ang angin ka ti ve thin. Mahse, fakna hla sa turin min ko se chuan sak mai tur chu ka hre lovang. A chhan chu, sak tur a tam lutuk a, thlan mai tur ka hriat ka ring lo," tiin a sawi bawk.
Biak In-ah la zai lo
Lengzem hla sa thinte'n Biak In-ah hun an chang ngai lem lo nia sawi fo thin hi ani chuan a hriatthiam vak loh thu leh amah bikah chuan lengzem hla a sak vanga kohhrana inkiltawihna leh nuam tihlohna ang chi engmah a neih loh thu leh an veng hrim hrim hi a nawm em vangin hetiang lama harsatna hi engmah a tawk lo a ti.
Mahse, mi hriat a hlawh hnu-ah erawh vawikhatmah Biak In-ah a la zai lo nia sawiin, "Lengzem hla ka sak vang hian ka indah hrang lova, min enhrang paw'n ka hre lo bawk. Function hrang hrangah chuan fakna hla ka sa nual tawh thin a, mahse Biak In-ah chuan ka la sa lo," a ti.
Kuminah ngei
Hetih lai hian, kumin chhung ngeia tihchhuah tur album an buaipui chho leh tan tawh a, hla hlui leh hla thar chungchangah thutlukna an la siam mai loh avangin thuchiang engmah a la nei thei lo.
A pa erawh chuan hla hlui lam hi sak a chi zawk lovang maw? tiin thurawn a pe a, chhungkua anga an ngaihtuah hnu-a tha ber tura an ngaih chu a kalpui mai dawn niin Mami Varte hian a sawi

Lungawi lo NGTV-a’n Rs 50,000 a beisei chiah em?

2009-02-19T00:13:00.000-08:00

Manipur-a Inneihnaa zai tura sawm anih tuma a inchhiar zat a sawi vanga dem hlawh tak nia sawi, chuai thei lo NGTV chuan nimin tlai khan hemi chungchang hi zep nei map lovin a kip a kawiin Thalai Times a hrilh a, lungchhe takin hetiang hian a sawi chhuak.
"Sum duh lutuk anga min chhuah hi hriatthiam har ka ti. Mipui hmaa ka zai phat atangin keima hlawkna turin vawikhatmah concert ka neih ka la hre lo. Engmah ni lo mahila, concert-na atanga Biak In ding hi a tam tawh em em a, khawtlang angah leh pawl angahte pawh theih tawp chhuahin ka pui thin. Chutih lai kara hetianga puhna ka dawng hi chu a na ka ti khawp mai," tiin NGTV hian a sawi.
Kar hmasa mai khan Imphal atangin zaithiam dang pawh sawm tum lem lovin NGTV a kal phawt chuan pawi tih lohna nen a fans te'n inneih lawmpui-nan zai tura an sawmnaah amah dawr turin mipakhat an rawn tir a. Chu pa nen chuan Tourist Lodge, Chaltlangah inhmu-in, tha takin an inthen leh mai a. Chanchin inhriattir zel turin an thlahliam hnu-a, a ni lo zawnga thu a thang ta chiam mai chu mak a tih thu sawiin, "Ka rate min zawt a, ka rate dik tak chu cheng singnga a nih thuin ka chhang a. Mahse, laina rate te, inbiakremna rate ang chite pawh a awm thova, ka ti a.
"Ani pawhin, 'Kei pawh Architect ka ni a, laina hnai rate leh inbiakremna ang chi chu a awm tho a lawm' tiin min chhang a. Tichuan, chanchin min rawn hriattir leh dawn nia tiin ka thlah liam a. Mahse, rin lo takin 'NGTV-a’n pawisa a um, singnga a inchhiar a, a to lutuk. Hetiangte chuan zaithiam tam tak a sawm theih a lawm' tihte chu a ri ta nawk nghal a.
"Dik tak chuan- rate min zawt a, a dik tak ka sawi a ni mai a. Inbiak dan a zirin a tul chuan a thlawn tak takin, mahni intum chawpin ka kal hreh reng reng lova, hetiangte hi chu ka tan thil thar a ni lova, a thlawn liau liaua ka zaina hi chhiar sen pawh a ni tawh lo. Min rawn be leh ang chu maw tia ka ngaihchan laiin an reh vang vang a, thu mak pui pui ka hre zui leh ta si a, min er vang leh min duh loh hrim hrim vang ni maiin ka hria," tin NGTV hian a sawi.
A kal châk hle tih a pha lova, mahse an indawrna a fuh loh vanga thulh leh ta zawk anih thu a sawi. Zaithiam dangte chu an han kal ngei a, mi pakhatin sangsarih zanga vel theuh an hlawh dawn nia hriat a ni. Zaithiam dangte hian an rate dik tak an sawi lo nge ni a, inbiakremna anga kalpui a ni zawk tih hi hriat ni lem lo mahse NGTV-a rampawn rate hi an pha lo nasa hle.
World record thar?
Hetih lai hian, March thla chhunga tihchhuah hman hram tumin album pali a peihfel thawkhat tawh a. Chungte chu - 'Rorelna ni ropui', 'The very best of NGTV', 'Damlai Hringnun' leh 'H.Lalhmingmawia hla leh a Duhzawngte' tih a ni a, tunah hian music video pawh a siam chhunzawm zel a, sawm pali vel a zo tawh.
'Tum khata album release tam ber record siam i tum a ni lo maw?' tia zawhna chu, "Chutiang lam ka ngaihtuah hran lova, duh ni ilang chuan tunah hian release mai theih album pariat ka nei," tiin confi takin NGTV hian a chhang.

Hla 150 chuang phuah tawh Rosy-i’n Traffic jam tihziaawm dan hria

2009-02-18T23:54:00.000-08:00

Hman deuh khan Pakistan sipai ho hmaah zam miah lovin India tan a au chhuak tawh a, a theihna zawng zawng nen hlauhna chhete pawh nei lovin hmaichhanah te pawh rum takin a melh ngam! Tunah hian Mizoram tan enge a tih theih ve tak ang le? tia zawhna chu zaithiam hriathlawh tak ni chho mek Rosy chuan 'Aizawl Traffic' tawt lutuk chinfelna tur idea tha tak panga vel a neih thu-in a chhang ngei ang.
‘New Aizawl’ siam tumna a awm mai bawk si loh avangin Aizawl khawpui hi engtikah emaw chuan a la chawl rup lovang tih sawi a har hle a, sorkar lam hian ngaihtuahna seng viau mahse kan kawngin a zo tawh lova, kan In sakin a dip dal zo tawh bawk a, tihtheih awm chhun chu kut kuangkuaha thlir mai a ni ta.
Rosy K. Rem-sangpuii hian tun atanga reiloteah 'Traffic jam solution' hi pholan theih ngei a inbeisei a, tunah hian a peihfel thawkhat tawh a, a tihchhuah hun tur chiahin a dang ta. "Keima irawm chhuak ve liau liau a ni a. Heng a chinfel dan point hrang hrangah hian kan hriatlar deuh chu pahnih khat a awm mai thei a, a dang zawng hi chu thil thar vek a ni," tiin a sawi.
Hunawl a neihin article a ziak thin a, TV ennan hun a hmang meuh lo, a bak chu hlaphuah a ni leh mai. Tunah hian hla 150 chuang a phuah tawh a, Mizo hmeichhiaah chuan hlaphuah tam berte zinga mi a ni hial awm e.
"Fakna hla a tam ber a, lovesong hi 30 vel bawr chu ka phuah ve tawh. Hengte hi ka tawnhriat atang te, mi tawn hriat atang te, rilru khawih deuh film enna atang te-a lo chhuak a ni a. Rilru khawih tak tak an ni hlawm na a, ka la tahpui chiah lova, mahse mahni chan angte erawh hi chu a mi deh dan a dang zar mai," a ti.
Rosy hi mi lungleng thei tak a ni a. Mipui zi nuai nuai karah pawh engemaw ngaihtuah neuh neuh chung hian a lung hi a leng veng veng thin. Hetiang hi khawvel ram zau zawk thlir pawhin an tam lo hle ang a tihtheih a, Mizo te hi huau huau leh tih let let lawm leh tuipui tak kan ni a, a tak ram kan thlen tawh hi chuan thil dang ngaihtuah hman lek lovin kan bawh leh huk thin.
Rosy erawh chu a ni ve lem lova, puipunna hmun leh boruak hot tak hnuaiah pawh rilru ding takin hla a phuah thei a, a thluk te a lo lang nghal mai a, a thu te nen lam a rawn chhuak mai thin.
"Mi an rik luih luih lai paw'n ka lung a leng daih thei. Mak tak maiin, lunglen hi ka chhiat pui ngai lova, nuam ka ti zawk a, ka hmang tangkai zawkin ka hria," tiin tun atanga reilotea 'Halleluiah to the Lamb' music video tihchhuah tum Rosy hian a sawi.

Music video sexy phena Tetei Ralte thuruk

2009-02-08T01:49:00.000-08:00

Tunlai hian Tetei Ralte music video 'Beiseinain' tih chuan demand channel-a luahlum sawt hle nia hriat a ni a, tam takin a hla nalh an tih laiin, mi thahnem tak pawhin a lan dan sexy tak mai chu hmuhnawm an tih thu hahipin an sawi.
Ngaihdan a inang thei lova, pawmdan lah a hrang nuaih ang bawk hian tlema lang 'sexy' deuh tawh hi chu Mizo society- ah phei chuan sawi leh sel a hlawh hma em em a, nitina Vh1 leh MTV vela lo lang nena khaikhin ralah chuan 'Beiseinain' hla hi a la nep hle.
He a music video mit-la tak vang hian Tetei boruak hi a kang leh dawrh a tihtheih a, hun engemaw chen a reh hnu-ah he hla hian remote control a thunun hneh chho viau a ni.
Youtube.com lamah pawh a boruak hi a namai lo hle a, tunah hian nasa takin ngaihdan a inpawtkual mek a, comment ziahte lah nilenga tuipui tham a tling. Thenkhatin 'a nau chawbur chu a van lian tha ve' an ti a, duhthawh taka ‘a van nalh tak em’ ti tawk lah bo lo. Hengte hi Tetei hian a hmuin a chhiar ve vek a, Thalai Times a hrilh nghe nghe.
Kawnpui atangin Tetei chuan, "Pawn hi ka chhuak ngai meuh lova, heti chung hian chhuah chhun chhunah min chibai nawk nawktu hi an awm deuh reng a, Kawnpui lamah pawh thlan a hlawh hle niin an sawi. Police thenkhat pawhin lirtheia ka chuang laite hi min tiding a, 'a fuh hle mai' tiin min chibai leh nawlh thin bawk a, engtinemaw tak chuan an lo ngaihven ve hle niin a lang," a ti.
TV ah nitin hmuh tur a awm laiin Mizo nula ngat- lang deuh rei ruaia a inlan erawh chuan a ri hluai a ni mai a, khatianga inlan kha a tum deuh hrim hrim a ni lo maw? tia zawhna chu, "Ka tum chiah chuang lova, a rawn lang ve tawp mai a nih kha. Shooting kan neih hma zan khan ka khua te a sik a, nuam lo chung chungin kan shoot a.
“Cameraman Zova (ZOZAM) phei chuan, "Tete, tunhma kha i ang tawh lo khawp mai," a ti hial. Kei chuan ngaihdan em em ka nei hran lova, a entu te ngaihdan dan kha an hmuhdan pawh a ni mai a. Min sawisel tawk an lo awm paw'n min sawisel ni maiah ka ngai," tiin a chhang.
"Camera angle te pawh kha a ni thova, mahse miin sexy an tih chuan kan tunlai ve tawh tihna a ni mai. Mizo te hi kan taste a sang tawh a, thil ngai ngawr ngawr hi kan ning a, tlema han tihdanglam ve zeuhte pawh hi a tul mai thei a sin," tiin a tuihnih leh zauh bawk.
He music video lo chhuah dan hi kawng lehlamah chuan a lungchhiat thlak hle a, a thiannu hian nikum khan pasal a sun a. A pasalin a thihsan lai hian thlakhat mi lek nau a pai nghe nghe. "An nupa-in he hla hi an duh em em a, an ngaithla reng thin a. An pa-in a boral san hnu phei kha chuan a lungleng lutuk awm ngaihna hre lo chuan he hla hi music video- a siam turin min ngen lawm lawm a, a tap a tap thin. 'Beiseinain' tih hi ka thiannu pual liau liaua siam a ni a, an nupa tan ka hlan a ni," a ti.
He music video puitling tur hian a inseng nasa hle a. A thawmhnaw hak sen mawi tak mai kha metre khatah 250/- niin meter li an hmang a. Makeup artiste leh a behbawm neuh neuh nena a za vaia chhut chuan cheng singkhat chuang a seng a, Zo rimawi khawvela music video (single) chhuak tawhah chuan senso tam ber pawl a tlingpha hial mai thei.

Ka nakin hun turah ka buai lo: Hlutei

2009-02-08T01:46:00.001-08:00

Tunhma atangin ama tawkin tihtur leh tihloh tur hrang hrang a lo duanglawk ve thin a, mahse a hlawmchham fova, rilrunat leh hrehawm tihchang pawh a ngah a, nikum phei kha chu harsatna lian takin a chimbuai a, a mangan chang a tam mai. Hengte vang hian kumin kumthar atang khan siamthar lehna changin mihring remruatna leh ruahmannaa innghat lova, chunglam kaihhruainaa inghat zawk turin rilru a siam fel a, chumi zulzui chuan hmalam pan chho tak tak a tum.
Hlutei chuan, "Ka nakin hun turah ka buai lo. Pasal neih hun tur te leh chhungkaw din chungchangah pawh engmah sawi ka tum lova, lo ruahman kual vel pawh ka tum tawh lovang. Ka daihriat atangin ka chiang tawh a, chung lam remruatnaah ka innghat tawh dawn a ni," a ti. Hetih lai hian kumina pasal neih chungchang chu 'Ka hman ka ring lo' a ti zawi raih.
"Pasal nei a, chhungte han chhuahsan tur hi chu a hrehawm anga, thil huphurhawm tak a ni ngei ang. Mahse, tleirawl lai atang tawhin hmun hrang hrangah awmin mahni ke-a han din chang hi a tam mai a. Lehlam takah chuan harsatna ka neih ka ring lo. Pasal duat dan turah ngaihtuahawm ka nih ka ring lova, chawhmeh siam te phei hi chu thiam ve tak chu niin ka inhria," a ti.
Zai lama a thlen san ang he huin zirna lamah erawh a inchhuang hran lem lo. A pawl zat sawi ni lova "A sawi châk hran loh" thu-a bul tan ta zawkin, "Ka ti lo lak lawh tawh a, tunah hi chuan zirthat leh tumna em em pawh ka nei hran lo. Tin, lehkhazir hi ka peih loh hrim hrim bawk a. Zir san te hi a that rualin tunlaia hna a vang tawh a, zirsanin awmzia a neih loh chang a tam hle. A pawimawh ber nia ka hriat chu "Mahni line hriatchian hi" ni ta berin ka hria," tiin a ngaihdan dik tak a sawi chhuak bawk.

Nuthlawi an zei tak tak em?

2009-02-08T01:43:00.000-08:00

Aw 'sial' tak a neih vanga Zofate chenna a pianga ngaihven hlawh em em Ngengpuii chuan hunte lo inher zelah uaithla lam pan tawh mahse mahni chauh len reng mai chu tha berin a hre bik lo.
"Hetianga awm reng chu ka duh bik lo" tia bul rawn tanin a hnathawhna office lama fakhlawh tak chuan, "Nuthlawi ka nih vang hian harsatna ka tawh ka hre hran lova, Mizo society-ah hrim hrim pawh hian nuthlawi fel leh puitling tak tak hi an tam em em a, sawi kai deuhte chu awm mahse, nunin a zir phawt chuan tuma'n an dahhniamin ka hre lova, a lang a pauin sawi chhuak lem lo mahse, a ruk tak chuan ngaihsan an hlawh hle a ni," a ti.
Duh reng vang thlawi ni lo an awm a, engemaw harsatna bik vang riaua pasal thente pawh an awm. Heng vangte hian 'Nuthlawi' vang maia enhniam leh zuk dahniamna hi a tha lo hle tih pawh a sawi a, 'Nuthlawi hi an zei bik" tih tawngkam pawh ni tunlai chhanah chuan a dik chiah tawh lo nia a ngaihthu a sawi nghal bawk a.
"Hei hi chu tunhmaa tawngkam lar tak a ni thin a. An zei vak em emna chhan pawh ka hre hran lova, tunlaiah phei chuan tleirawl te te hi an zei daih zawk a, mipa chhawnchhaih leh engkim maiah hian tlukloh rim an nam zawk emaw te a tihtheih hial tawh a, he tawngkam hi chu hmanlai tawngkam ni deuh berin ka hria a, tunlaiah chuan a hmantlak tawh lo mai thei," tiin zathiamte zinga ‘frank’ leh biaknuam ber pawl Ngengpuii hian a sawi.

Johan-a inchhir ngawih ngawih

2009-02-08T01:36:00.000-08:00

A inchhir ngawih ngawih a, zep a tum hran lova, a tawnhriat atangin mipakhat talin inhmuh-chhuah pah nan a hman phawt chuan a chhungril a awm, a sawi zen zen loh a phawrh chhuak ta!
2004 chho vela 'Chhing Mitthla' atanga Zo rimawi khawvela dinhmun nghet tak rawn nei chho Johan-a chuan tunah hian engmah neih leh kawl a nei tawh lo chungin khatih lai boruak a hun tawn that zia leh hlawk zia sawiin ruahmanna leh hmathlir a lo nei tha tawk lo chu pawi a ti ngawih ngawih a, nimin tlaia hemi chungchang a sawi pawh hian hrehawm a tihzia chu hairual a ni lo.
"Khatih lai kha chuan Pathian ropuina leh fakna lam ang chia kal lova, khawvel taka ka kal avangin sum leh pai tam tak lalut mah ila, mahni thu thu-a kal na na na chu a luh tam leh a zo hnem a ni mai a. Nakina atana lo inkhawl lawk emaw lo dahthat ang chi kha a awm meuh lova, tun thleng hian a nghawng ka la tuar zel chu a nih hi.
“Sum leh pai ka ren lova, ka hman huau huau a, future ngaihtuah lek lovin ka lo khawsa a, a pawi khawp mai. Hei hi ka hringnun, tuna ka hman meka ka la inchhir ber pakhat a ni a, hetiang hi tu chungah mah thleng tawh lo se ka ti a, kan that, kan vanglai hian sum leh hman hman danah hian fimkhur lehzual ang u tih hi ka thalai puite hnen ka chah duh em em pawh chu a ni," a ti.
Tungchhoa kal mihringte hian vul lai hun kan nei theuh tih hi a hrechiang viau mahse Pathian ngaihsak lova vanglai hun hman hian a tawpah inchhirna leh tahna mai a thlen tih hrechiangtute zingah Johan-a pawh hi a mikhual hauh lova, pawi a ti em em a, mahse hunin a liam pui tawh miau si a ni.
Tarlan tawh angin Johana hian Parpui Chawnthu hla hlang awmna album a buaipui mek a, tunah hian hla 7 thun zo tawhin, he album-a hla te hi hla lenglawng leh famngaih hla te an ni. A tihchhuah hun tur an la sawi chiang thei lova, tuna a ngaihpawimawh ber chu uluk taka buatsaih a, a theihna zawng zawng nena he album puitlin hi a ni tiin 'Nula rimchang chu ka nei ve tho a nia," tia a nakruh bo zawng mek Johana hian a sawi.

Zoramchhani'n fiahna hmachhawn leh dawn

2009-02-02T23:03:00.000-08:00

Kum hmasa mai khan, ‘lehkhathiam thei vak lo’ leh ‘Mizo subject tih loh chu a fail vek’ tihthawm a riring hle a. Mahse, Zoramchhani (RC-i) chuan, “Kumtawp result-ah an hre mai ang” tiin huaisen takin a lo sawi tawh.
Tunah hian April thlaa Class X exam turin a inbuatsaih chho leh tan tawh a, fiahna lian tak a hmachhawn leh dawn ta. Inleng neih ngah a duh vak lova, zaina tur programe pawh neih tam tha a ti lo bawk.
Tunkar chho hian February 5-a tihchhuah tur ‘Phuloh Hmangaihna’ album-a awm, ‘Nunthar’ tih chu music video-ah a siam dawn a, Dinagrafix kutchhuak a ni ang.

MHIP 'Life member' atangin TBC-a 'Patron' ah kaisang

2009-02-01T23:01:00.000-08:00

Zo rimawi khawvela hriatlar a nih hma paw'n tu ngaihzawn rawn mah a hlawh ngai lova, Zofate rahchian apianga a hming hre lo an awm lova tihngam anih hnu paw'n 'Ka chhas a nih saw' tih tur pakhat mah a nei chuang lova. Atan hian hmangaihna kawl a eng thei reng reng lo mai a, chhim leh hmar chhak leh thlang hrutin mit han len vel mahse a duhzawng a hmuh laiin amah rawn beisei lettu a hmu zo lehchuang bawk si lova, kum hnih kalta vel atanga tlanval luck lo a nihna chu kumin kumtharah pawh hian a la chhawm zel dawn te pawh a ang lehnghal!
Mahse, Nu hovin an atchilh tlat thung! Hei hi zep theih rual a ni lova, a kalna a pianga amah bawr laih laihtute hi Nu ho an ni zel. "Tunhnaia Vancheng leh Lungdai kan kalnaah pawh Nu hovin min lo lawm hle a, nula lamin ka thiante an bawr sup sup laiin kei chu nu hovin thla min lak pui laih laih thung a, boruak hip dan a dang duh khawp mai," tiin TBC-a hian a sawi. Hman deuh khan MHIP member-ah lakluh anih hnu-in life member a ni nghal a, tunhnaiah kaisang lehin 'Patron' a ni fel leh diam tawh. "Membership fee pe a, member tak tak ang kan ni lova, mahse min duhsak a, hetiang hian tunhma thil thlen ngai pawh ni lo - MHIP member hi a hmingin kan ni ta mai a ni," a ti.
"Tlangval laia MHIP member tia mi fiam i hlawh fo awm si a, engtinnge? tia zawhna chu, "Nia, min fiamtu leh min kap nak naktu hi chu an awm deuh reng a. Ka nuiliam ve mai a, nuam tih lohna emaw zahna ang chi engmah ka nei lo," tiin a chhang. Hetih lai hian April thla chhung ngeia tihchhuah tumin lenglawng album a buatsaih mek a, hei vang hian tunhnai chho hian zin veivak a tum lova, studio lamah hun hman tam a tum.
Album thar-a hla awm, tuna hriattheih chin te chu :
1. Leng lengin, Zan Lalnu, Hmangaihna a dai zo ta em ni (Roliana Ralte), 2. Rinawm Thianghlimin, Vul tir ang aw (C.Zarmawia), 3. Nunhlui liam hnu, Ngaihlai Mapui (TBC Zaithanpuia), Aw Lanu Valrual (BZ-a), Ka huan pangpar (Zorock), Zonun parmawi (Kima Chhangte), Ka rawn zawng zel che (Lalvulmawia Pautu) te an ni a, hla hnih dang a belh leh dawn a ni.
============================================

Mimi Renthlei Bihchianna

2009-01-31T23:27:00.000-08:00

Mimi Renthlei hian talent tha tak mai a nei a, chu chu hlaphuah lam hi niin a music video hmasa ber, ‘Hmangaih vangin’ tihte kha Class-VII a nih laia a phuah a ni. ‘Lunglen’ pawh kha hun rei lote chhunga a phuah a niin hei phei hi chu tute emaw a ngaih em vang nge tih chu sawi chian theih a nih loh laiin a lung a leng em em a, chu mi thawi dam na atana a phuah a ni. ‘Duhaisawm’ phei hi chu zan lai pelh hnu-ah engemaw tak hian kamin a muhil thei reng reng lova, a rilru-a hla thluk awm veng veng chu kai thovin hun reilote chhung bawkin a puitlin ve leh mai a ni.
Shania Twain, Dixie Chicks leh Carrie Underwood te hi a ngainain an hlate pawh hian a rilru a hneh hle thin a, a ngaihthlak zin berte pawh an ni. Mipui hmaa a inlanna hmasa ber chu, Michael M Sailoa album release zan kha a ni a, hemi hnu hian Tripwire lamah insuanin hmun hrang hrangah concert an nei thin a, a che tha thei hle.

Mahse, a che tha reng bik lo
Chhiahtlang-a concert an neih tumin stage-a a zai chu a hma zawna lam mipa rualin a ban an pawh sak ta thut a, a bu lawih mai a. A ke vei lam chu a tla ta a, ding lam erawh stage-ah a awm thung. “Ka buai khawp mai, mahse security lamin min rawn buaipui hman hlauh a. Hrehawm ka ti lutuk chu zai chhunzawm thei ta lo chuan backstage- lamah tlan lut nghalin ka tap ta vak vak mai a, rei pawh ka tap hman lova, music zawh hnua hla kal leh tura kha ka hun tho a nih avangin a hun chiah tihah ka va chhuak leh a, mittui tlapur chung chuan ka tlingtla thei ta hram a ni,” a ti.
“Vawi khat leh pawh Miss Shillong thlanna an neih khan Michael-a nen kan zai a, ka che nasa deuh nge ni dawn, ka kawr hak lehlam zawng chu a tet ta thut mai a, lehlam tet si a, lehlam tet bawk si lo kha ni theiin ka hre bawk si lo. Mipuiin an hriat ka hlau bawk nen, a tawpah chuan a tet lo lam chu ka han pawt tet ve ta mai a, rilru a hah map map viau na a, a nuihzatthlak ang reng khawp mai,” tiin a sawi chhunzawm bawk.

Lam (Dance) lamah hian:
“Zirna em em ka nei lova, mahse music a rik tawh hi chuan han suk dat dat hi nuam ka ti ve hrim hrim a. Ka lam dawn chiah hian chet hmasakna em em nei lovin ka kut leh kete hi a rualin an che mai thin. Engmah chengchang lo, din tlawn zurh ang chi hi chu a dik lova, a boruak a zira kalpui thiam kha a fuh berin ka hria”.

Khawvel tawp hma chiah a a film en chak ngawih ngawih:
“Passion of Christ- A chhan chu maw, a pawimawh tlat”.
Darthlalang hmaa a han thut chiah hian, a rilru a lo lang nghal chu:
“Awi ka rei, ka van upa sawt ve”.
Khawvel mipuite hriata thuchah a sawi duh ta tlat mai a:
“Hawh u, i inhrethiam tlang ang u”.

Chief Minister ni ta se:
1. “A bik takin, kan veng (Ramrikawn) ah hian tui a harsa hle a, tui tam zawk haw tir dan ka ngaihtuah rang ngawt ang. Hmun dang pawh a intahtawlin ka ngaihtuah bawk ang.
2. “Stadium puitling leh lian tak ka din ang. Thalaite kan thangharh zel a, infiamna leh rimawi lamah pawh kan hmasawnna hi hmuh theihin a lang tawh a, mahse infiam mite leh hetiang lama tuite tana chenfakawm tur stadium kan la nei thei lo fo hi chu a mangan thlak hlein ka hria”

3. “Kawng zim lutuk hi tihzau dan ka ngaihtuah bawk ang. Kan khawpui hi ruahmanna mumal tak neia din a nih loh miau avangin harsatna hi kan la tawk zel dawn chauh niin a lang a. Tunah pawh hian ruahmanna fel fai tak neiin hma la tan leh ta pawh ni ila, a tlai chuang lo. A thatna leh hlawkna hi keinin tel lo mah ila, chhuan lo la awm zel turte’n an tel dawn a, chuvang chuan heti ang lamah hian kan thanharh a ngai hle in ka hria.”

Love letter:
“Pawl kua ka zir kum, 2003 khan ka dawng ve hlauh mai a, mahse ka chhang let lo. Darthlalang en chunga chhiar tur ang chi hi a ni leh nghal a, mi dang kaltlangin min rawn pe nghe nghe. Min beiseitu hi, dik taka sawi chuan, ka rilru-a awm lem lo leh, ka dream loh kha a ni tlat a, ka chhang let ta lem lo a ni. Tun hnuah pawh kan inhmu zauh zauh a, boruak a hre chek a ni ang chu.. a bawh zui tawh lem lo.
“Pawl 12 kan pass tawh bawk a- tiin 2005 kum khan love letter ni chiah si lo, tawngkaa chhan chu ka nei ve a. Dik taka sawi chuan ngaihzawng han sawi mai tur hi ka nei lova, tih taka taka ka ‘yes’ pui hi pakhat chiah an la awm. Tunah tak phei hi chuan ka nei lo, ka ti tak tak a nia, ka nei miah lo. Chu bakah album buaipui a hun tam zawk hman a ngaih avangin hunawl hi ka nei thei lova, engtikah emaw chuan an rawn lang ve em ang chu maw”.

A mipa duhzawng a sawi ta!
1. ‘Care taker’ ang deuh, min ngaihsak hliah liah mai se, ngaihsak nih hi ka duh tlat. A theih phei chuan 24x7 ni thei se.
2. Smart tak, mahse ‘over smart’ erawh ka duh lo.
3. Zai lama min tuipui leh min phurpui thei tur
4. Keimah mai ni lo, ka chhungte leh unaute hmangaih theitu tur

Turn off: Mipa intizei lutuk, zei lutuk over hrim hrimte leh tideuh hah hahte hi chu ‘sorry’ a ni tlat.
Turn on: An induh poh leh ka duhna a zual ni maiin ka hria.

Engnge a hman:
Shampoo: Wella (for normal hair)
Make Up: Foundation atan Lakme Natural, Herbal- safe sunscreen
Face Wash: Lakme

Ka Hringnun Lamtluang: Vanlalsailova

2009-01-31T23:12:00.000-08:00

Pianpui unau hmeichhe pali ka nei a, mipa an awm si lovah chuan ka pu chu a mangang hle a. Beidawn tawp hnu-ah kei hi siam ka ni. An dilna chhannaah ngaiin ka naupan lai atang tawhin ka nu leh pate hian Pathian hnenah rawngbawltu, Pastor ni turin min hlan nghal a.

A chhin hawnna
West Phaileng-a seilian ka ni a, thingtlangah hun tam zawk ka hmang a, dinhmun a lo phet bawk nen chuan hmalam hun atan beisei a chau hle a, thil ropui tak duan a har. Aizawl kal te chu... kum khatah vawi khat pawh kan kal ngai lo. Sikul ah zirtirtu te’n ‘Aim in life’ min zawh paw’n ‘Pastor’ ka tih loh chuan ‘Forest officer’ tiin ka chhang mai thin. Hei pawh hi duhthusam mai a nia, a taka thlen theih pawh ka inring lo.
Zirna lamah chuan ‘a lai hawl’ vel hi ka ni thin a, sports lamah chuan High school pumpuiah captain te ka ni a. Football, Volleyball ah te pawh captain te niin Badminton-ah pawh middle sikul kan kal lai chuan ka champion tawh a. West Phaileng pumpuia GS player te hial ka ni tawh bawk.

Bawng sikul hla & VTR
Zai hi zaina chang ka hriat atangin ka zai tan a, thiante nena han zai ho dal dal pawh hian thiante hi an ngawi that zel a, ‘Engatinge in ngawih tlat zel a’ tia ka han zawhte hian, “I zaithiam em a, I aw a nalh bawk si a. kan lo ngaithla mai a ni,” tiin an sawi thin. 1997 kum khan YMA local rising day-ah thiante ho nena kan phuah, ‘SP’ tih leh ‘Bawng sikul’ hla chu kan sa a, mipuiin min lawm hle a. Kan hotupa berin, ‘Ka dawn thin.. oh! a sang lutuk’ tia hla a lak san em avang khan an nui dur dur mai a, Chutah, ‘Pa Sai, kha han la zawk teh’ tiin guitar chu min awrh tir ta nghal a, kan han zai ta tak tak mai chu hall khat tlat mipui kha awmngaihna an hre tawh lo a ni ber.
Tlang venga awm kan nia, fiamthu duh ve ngang kan ni bawk nen. Bawng awm miah lo kha, Putar pakhat Pu Chhawntluanga chu Bawng Sikul headmaster kan ti a, keini hi ‘naupangte leh zirtirtu’ tiin sikul kan din der ve a. ‘Aw bawng, aw bawng min tihlimtu, ka chhuang zel ang che West Phailangah’ tihte chu kan tuipui ber a ni thin.
Heti ang hun lai vel hian VTR (Vocal The Risk) band kan din ve a, khata tang khan ka nun hi a risky chho ta ni berin ka hria, tun thleng pawh hian zai dawn leh thil tih dawng reng reng hian inpuahchah lawkna pawh a awm hlei thei lova, a dawn hnaih lamah a tlachawp leh rilru a awm ang ang khan ka chet chhuah pui ta mai thin a ni.

Chhungkaw rethei tak
Kan chhungkaw khawsak phung kha a lungchhiat thlak hle a; lei chhuat, a bang dap, a chung rangva tlem, a rel thingtuai leh a ban kha thing lian deuh hi a ni leh mai a. Ruah a sur te hian inchhungah a far zawih zawih thin. Chhungkaw vei mi ka ni a, daikal in chhe lutuk te hi ka vei hle a, daikal laia lehkha chhiar ka chin chhohna chhan pawh hi khatih lai huna ka rilru hah lutuk leh hrehawm ti lutuk theihnghilh nan tithin kha ka ni. Mipa awmchhun hian engtinnge kan chhungkua hi ka khai din theih ang? Thenawm te’n electric an han chhit eng tliar tliar laiin kan inah chuan khawnvawr kan chhi ve thung a. Ka u te hi khaw khat nula hmeltha a an sawi an nih ve avangin inleng hi kan nei deuh reng thin a, ka nu hian kuhva leh zialte zuarin hawker a ni thin. IN chhe em em mai a, inleng an awm laih laih changte hian hrehawm ka ti thei hle a, parda chhe zet mai kan neih chhun kan han zar a, han hawi vel ila, thil chhuanawm han tihtur reng reng awm lo hnuaiah chuan kan cheng chu a ni a. Rilru hian hmalam thui taka hi a ngaihtuah ngam ngang lo a ni.
Hetih lai vel hian ‘Bangladesh thak’ an tih kha kan unauin kan vei ve a, kan taksa pum a thak chhuak vek a. Kapa hian zantin sahbawn sen nen min bual thin a. Sahbawn phul te hi hrufai mai loin zankhuate hian kan inchiah a. Inenkawlna tur pawisa kan nei si lo. Zanah ka pi pawnpui, ka nuin a chhawm chu sinin kan unau za chuan kan mu dal thin a ni.

Duh zawngin duh lo
Tleirawl chhuah tirh pawh hian a hmingin hmel duh zawng leh min lo duhdertu te pawh an awm a. Mahse, dinhmun avanga min hnartu hi an tam ve hle a. Insitna avangin engmah hi ka sawi ve ngam lo thin a. Star te bulah ngam leh ngam loin kan tawlh hrut hrut a, ‘min rawn nuih hun tur’ thlir rengin a khat tawkin kan han en leh zauh thin bawk a. Kan duh ngawih ngawihte leh an bialpate an han thut dun tawh phei hi chuan... kan chang ve dawn lo tih kan hre kar mai si a. Rilru hrehawmna hlirin ka tleirawl hun kha ka hmang a ni. Hmangaihna lam ah hrim hrim hian ka che tha ngai lova, chet chhiat hi a tam zawk.

Pulpit tlangah a ding ta!
Kum 10 mi lek ka nih lai hian Dampui-ah speaker Lalsaikhuma te nen rawngbawlturin kan kal a, zan khat chu kan thlenna in neitu Upa Rinthanga chuan, “Sailo, zanin chu Speaker in thu a sawi hmain min.5-10 chhung vel hun i hmang dawn nia,” min ti ta a. ‘Aih’ tih kha a ni chiah bawk si lo, chaw ei pawh a tui lo chawpchilh nghal a, thu han sawi tur chu thih hreh hian ka hreh tak meuh a ni. ‘Engnge ka sawi tak ang?’ tiin ka inngaihtuah nasa mai a. Tichuan, zan a lo thleng ta a. Pulpit tlang atang chuan Galatia 5:1-a “Bawih ni lo turin Krista chuan” tih kha changthlanah hmangin... khawvel tawp hnaih tawh zia te, HPC in an kah... a thih hnua van ram fang police inspector chanchin te chu ka han sawi chho. Pulpit tlang ka han chum hlek tawh hi chuan an nui leh hak thin a, mipui pawh khan min lawm ve hlein ka hria. A thu hrimin, Pathian zarah naupan tet atanga ‘Langsar’ an tih ang chi hi ni vein ka inhria a, Aizawl a sikul ka luh tirh pawh khan mi dangte chu, ‘Hmelthat vang te, hausak vang te, lehkha thiam vang tein an langsar thin a. Mahse, kei erawh chu ka bula awm hi nuam an tiin, chawlh laite hian min bawr ve laih laih thin a, ka ti ti kotlangah hian an hlim thei hle, chibaitu pawh ka tawng nasain min chibai luih luih thin. Tunah pawh hian kha tih lai hun vel kha mitthlaah hian a la cham reng a ni.

Retheihna atangin retheih leh zualna
1998 khan Muma School, Armed vengah ka kal a, 1999 kum khan West Phaileng-ah chhuk thlain ka chawl lai lawk a. Ka pa chuan leilet-ah min thawh tir ta mai chu.. tuar zuau ve chi ka nih avang hian ka ti hlei thei tlat lo mai a. Heti chung hian matric chu mak tak maiin kan zo ve thei ta hram a, khawtlang mak tih a tling hial. Aizawlah hian ka cousin te bulah hun engemaw chen ka awm a, mahse ka cousin hian min boral san tak avangin Chanmari-a a best te bulah ka insawn leh ta a. Mi ina awm ka nih avangin inthlahrun a na thei hle a. Nau ek suk, bungbel nawh leh insuk chitin reng ka khawih vek a, khatih lai khan Modern sikul ah lutin function ilo velah hian ‘Desparado’ tih hla hi ka sa thin. Class-XII exam ka chhan dawn hnaih hian ka kal na a chhuak leh ta tlat mai a, khawiah mah chesawn thei loin khum betin ka awm a. Ka cousin nau hi lo kalin History chu chhiar ri turin ka ti a, min han chhiar sak ve mai bawk a. Mahse, kei lah sap tawng thiam tha fum fe lo, mi chhiar ringa by-heart tum chu a tihchi loh hle a, exam thei lo pawh ni ila, sikul-a va inlan hrim hrim kha an tih avangin ka va inlan ve a. Mahse, ka fail ta tho a ni.

W. Phaileng tlangval invawrh dawn ta
Laipuitlang-a ka cousin te bula ka awm lai khan Vulmawi Collection Vol.5 ah khan ‘Zoram Tang Fan Fan’ tih hla kha ka sa a, khata tang khan Pu. C.Dina hian a rukin min lo zawng daih tawh a ni awm a. West Phailenga MZI khawmpui lian nghah a nih tum khan kan inchhar chhuak ta a, interview te min neihpui hnu chuan theih tawpa min puih a inhuam thu min hrilh nghal a. Tichuan, Chhinga venga insawnin an in ahte chuan ka chuangkai ta zak zak mai a. Programme hrang hrangahte zaiin ka zui tan ta a, Central Jail-a independence day an hman tum khan, ‘Derna Anka’ tih hla kha ka sa a. Ka ngaihah chuan, ‘KHAWVELA KA ZAI CHHIAT BER’ tia mahni inen pawha thlan tla nghal zawih zawiha kha Mizoram mipui hmun thuma then hmun khatte chuan min lo hmelhriat tan ta reng mai a, kha khan tun dinhmun ka thlen theihnan kawng a sial ni ta berin ka hre hial. Mi inah kum thum ka awm hnu, a thla thumna ah chuan miin min hre ve tan ta a ni. February 19, 2003 khan NGTV nen Lunglei-ah concert hlawhtling tak kan neih hnu khan Lelte in concert report an pe tha thei bawk a, min hrelar ve tawh viau a. Mahse, Aizawl ah erawh chuan min hre lutuk hrih lo naa, boruak erawh a tha tawh hle. Tichuan, Chapchar Kut ah khan kha boruak kha a alhchhuak tak tak ta a, Zoram pumah hriat ka hlawh chho ta a ni.

Indawr tanna leh tahna
Album kan han buatsaih chhoh dawn khan Pu Dina hian, “Sailo, Rs 8000 pek che a, a master leisak nge i duh a, album pakhat zela Rs. 5 hlawh?” tiin min zawt a. Kha tih lai khan album flop a tam hle a, ka album ah pawh hian beiseina a sang bik chuang lo. Copy 500 pawh hi a ral thei ang em tih laia album pakhat zela cheng nga lo ei chu a tihchi loh bakah chhungkaw rethei tak tan chuan cheng sang riat hi lak mai a tha zawk ang tiin thu kan tithlu ta a.
Cheng sangriat ka dawn atang hian sneaker ka lei a, a dang zawng chu, kan te ber hnenah, ‘Dan khatna a pasal i neih phawt chuan a senso tul ang zawng zawng ka tum sak vek ang che’ ka lo tih tawh avangin hemi tuma an inneih hian album atanga pawisa lo lut chu a zo leh nghal diak a, engmah chan a lawi ka nei tawh lo a ni.
Tichuan, debut album, ‘Zoram Tang Fan Fan / Derna Anka’ tih chu November 7, 2002 khan tihchhuah a lo ni ta a, hemi hnu hian hlawh tlem te te neiin hmun hrang hrangah ka zai thin a. Ka zai tam he hu angin pawisa lut erawh a tlem thei hle. Masi hnaih dawn te a nih avangin ka nu chuan, “Mama, i zai hlawh atanga i pawisa hmuh te kha lo khawl tang tang thin ang che,” tiin min chah a. Hemi kum, West Phaileng-a Masi hmang tura ka chhuk thla chu Rs.700 chiah ka neih avangin a tlem ka ti a, ka zak ngawih ngawih bawk a. In ka thlen chuan ka nu hnenah zak chung chungin pawisa chu ka pe a, “Mama, a van tam em em ve! Pathianin Masi chhung thlaphang lotea kan awm theihnan min pe a nih hi” tia a han sawi chhuak ta mai chu ka mittui hi a sur thla nghal zung zung a. Bedroom lamah tlanlutin ka tap nghal ta zawih zawih a. Chhung inkhawmnaah chuan ‘Pathian hnenah In tihzau (extend) na tur i dil ang u. Inchhung lam a theih loh anih pawhin ‘Choka’ tal hi’ tiin tawngtaina kan nei a. Ka nu thusawi kha mak ka ti lutuk a, eng tihtham mah nilo pawisa tlem te chunga a lawm thiam em em khan mittui a kothla nasa hle.

Chenna In atan a fehchhuak
“Chenna tha si lova mi a rawn inchei chhuah chuan a mawng a hlim a ni. Chenna in tha tak nei si a, slipper khing lo bun chhuak chuan a nihna a zahpui tawh lo” tihna a ni. A tawi zawnga sawi chuan a ‘confi’ hle tihna a ni mai. Choka lamah ka chhungte chuan chawei turin an phei sang sang tawh a, mahse kei chu khup bawh meuhin ka tap zawih zawih a, ka nu chuan, “Mama, chaw kan ei, lo phei thuai rawh. Chawhmeh a tam lo a nia,” a tih laite chuan ka mittui hi a sur nasa lutuk a, an hriat ka hlau bawk si. Kan chenna in chhe lutuk avang hian vawi duai lo ka mittui hi a lo tla tawh thin a ni.
February 19, 2003 khan Lungleiah show kan va nei a, Hemi tum hi chuan zan khatah Rs 3000 a ni a, zan khatna hlawhtling taka kan neih zawh hnu hian a zawna zan thum neiha Rs 9000 hlawh chhuah ngei ka tum ta a, zan hnihna ah hian RTP Cinema hall khattlat mipui an pung khawm a. Zan thumnah chuan entur an awm tawh lo mai ang a, kan tih laiin a mak a makin mipui an lo pungkhawm leh a, zep lovah chuan kei pawh ka chau tawh lutuk a, mahse Rs 9000 hlawh ngei kha ka duh bawk si a, tichuan harsatna em em awm loin a zanthumna pawh hi kan tlingtla thei ta hram a.

Zan thum + Rs 9,000
IB-a kan innghah tum hian NGTV chu suitcase pathum nen a rawn inchhawp riap mai a, kei erawh boot sen lawk ber bur, cheng 500 man, Jeans tight tawk pakhat, T-shirt sen (album cover a mi kha), Leather jacket a nghawng hmul (duplicate) mawza pawh bun khat chiah, inthlakna turin t-shirt pakhat chu ka nei ve bawk a. Mahse, ka lawm ve hle tho. A chhan chu, ka kutah hian Rs 90000 a awm a ni tih ka hriat avangin thawmhnaw tihvel kha a lang tawh lova, haw thuai thuaia chhungte hmuh hlan ka nghak hlel em em mai a, Rs 700 pawh tam an tih si chuan, Rs 9000 chu an van hlimpui dawn em... choka tal chu kan extend thei tawh ang chu maw tiin ka hlim ve hle.
Aizawl ka han thleng chu thiantha leh chhungkhat lainate’n min lo lawm sap sap hlawm a, concert boruak vel ka han hrilh hlawm bawk a, kan nui dar dar mai a ni. Aizawlah hian rei pawh awm hman loin West Phaileng lam pan chuan ka chhukthla lehnghal a, Sumo ah ka cassette chu kawngtluanin an play a, kan kawt chiahah a han ding a, intha zo tak mai hian sumo atang chuan ka zuangthla a. In chhung leh pawnah te chuam mi an lo punkhawm ve nasa mai a, tun hma zawnga thiante zingah pawh Luck lo bon lutuk thina kha fiamthu duh tih takah ka’n hawi champ thar kual ve leh a, ka nu hnenah chuan, “ka nu, kha.. han chhiar ta che” ka han ti a. (Motor chuan man leh Aizawl-a ka chhungte hnenah pawisa ka pekte avangin Rs 9000 hi a kim tawh lova, Rs 7000 vel ka thlenpui) Ka nu’n a han hmu chu tam a ti em em mai a. Tunah chuan kan in pawh tlemin kan thuamtha thei tawh dawn ta! A zavaia cheithatna erawh hi chu Aizawl-a rei fe concert ka neih hnu-ah chauh kan puitlin thei hram a ni.

Lak luh awm ta lo chu
Tihian ka ngaihtuah thin... concert pawh hmun hrang hrangah te neiin zan khatah sing chuang pawh lalutin dinhmun pawh a tha chho viau a, mite pawhin hausa tawh viau turah pawh min ngai a. An thlirna atang chuan a dik a ni.
Mahse, rethei sa a piang, ba rulh ngai, ei leh in a lo ngai leh a, chhungkua tihchangtlunnan hman a lo ngai leh bawk a. Lakluh engmah awm bawk si lo chu pawisa lut hmasa apiang heti ang hian tihral ani thin a. Kei pawhin mak ka ti a, zep lovah chuan ka pawisa lakluh hi a tam hle tih pawh ka hria.
Kar khat chhung rigawta nuai khat ka lakluh tum pawh hi a tlem lo. Ka nu hian, “Mama, tunkar chhung hian nuai khat i lalut tawh e,” tiin min hrilh thin. Mi min rin dan ang em chuan hausa lo mah ila, min hmuhsitna tur daltu a ni zawk ta hlauh mai a, a lehlam taka thlir chuan a lawmawm tho mai.
Dinhmun vanga hnawltute kha
Tawng mawi lo ni suh se, kan tleirawl chhoh tirh laia min hnartu te pawh tun hnu-ah inhmu lehin kan intawng leh thova, mahse, an lakah rilru chhia ka pu lova, ‘Khawnge ka’n bei thar leh teh ang’ tia thungrulh tumna ka nei lova, tha takin kan awm mai a ni. Enviroment leh dinhmun a zir hian ngaihdan leh khawhmuh dan hi a dang vek thei ani tih hi a dik hle. Keimahah hian chiang takin a thleng a, dinhmun a chhiat meuh chuan zahawm taka awm a theih lova, mi zingah pawh mahni leh mahni insitin kan kun tlawk tlawk thin zawk a ni.

Phai khawpui Champhai
Hmun hrang hranga concert ka neihnaah sawi hmaih hauh loh tur chu Champhai concert kha a ni a. Kha boruak khan min vawrh lehzual nite pawh hian ka hria a. Zan thum neih tura ruahmanna siam a niin zankhatna phei chu a hit tawp a, boruak pawh a sang hle. Zan hnihnaah erawh ka che chhe hle thung a. Ka zai hma lawkin ka kal na chu lo chhuakin ka mangang hle mai a. Damdawi ei thin kha ka kawl tawh bawk si lo, ni danga ka ei ngai loh damdawi mum hnih ka han hmawm chiah tihah ka buai tan chu ani reng mai a. Hall khat tlata mipui pungkhawm, pawn lamah pawh chuti bawk.. mipui innek nasat lutuk avanga buaina buaina chhuak leh khawi maw laia lo insual tawk nen.. a then phei chuan hall chung khuhna te pawh lakthlak an lo tum hian a ni awm e. Ka zai laklawh lai chuan dang a rawn ro nghal a, hla 7 chu ka sa zo thei hram a, a bak chu a ngaihna a awm tawh lo. Ka zawi vek a, damdawi kha a chak em avangin ka lo rui reng chu niin, duh angin mipui pawh ka hmachhawn thei lova, tun hnu-a an sawi leh danin, “Zan hnihna ah a sexy lo zawk” an lo ti a ni awm e.

Zan hnihna ‘hot’ tawk lo
A zankhatna ah kha chuan kei pawh ka tang a, a sexy thei ang berin ka inlan a. kawr zipper ka han zip thla a, an te tuar tuar a, ka’n zip chho leh a, an haw haw leh dur dur bawk a. A khat tawkin flying kiss ka’n pe bawk a. Mitmeng hrim hrim pawh kha a sexy thei ang ber a nih tawh avangin mipui boruak kha duhthusam piahlam a ni. Heti ang hi a nih tak avangin zan thumna tur erawh DC in concert neih chhunzawm a remti tawh lo tlat mai a, a chhan chu mipui boruak a san tawh em avangin thil pawi thleng thei a ni a, buaina a chhuah a hlauhawm em avangin cancel a ni ta a ni.
Mahse, zan thumna chu, a tawp zan a ni bawk a, concert kalpui a nih theih nan keimah ngei pawhin DC chu ka ngen ngawih ngawih a, mahse tihhlawhtlin a ni ta lo a ni. Champhai boruak kha a tha hle mai a, KTP committee pawh an thu rei thei tawh lova, thusawitu pawhin rei tak an sawi tha thei tawh lova, kohhran inkhawm leh thiltihna hrang hrangah harsatna thlentu ni anga ka lang erawh kha chu pawi ka ti a, kha boruak kha a nat em avangin tihngaihna a awm ta ngang lo a ni.
Concert a theih dawn loh avangin hall-a banner te chu an la thla a, kei pawhin kil khat atang chuan mittui tling puau chuang hian ka lo thlir a, chau hle mah ila, mipui duhdan kha kalpui ka chak em a, mahse a remchang thei ta lo a ni.

Thaha vauna a dawng ta!
Zoram dung leh vanga mite’n min hriat lar tak tak hnu, Chhinga venga mahnia in ka luah tirh khan thaha vaunate hial ka dawng a, min vautute nen hian kan inbe fuh chiah lova, ka awm loh hlan hian ka chhungte an lo hrilh a, vawi khat mai pawh a ni lo a ni awm es.
Hemi hnu atang phei chuan ka fimkhur chho viau mai a, caller ID (rawn phone tu number hriattheihna) a la awm loh avangin han tihngaihna vak a awm lova, min vengtu han ruat pawh kha a ni chiah bawk si lo, min itsikna vang pawh a ni thei a, khatih lai kha chuan rilru chu a hah ve duh khawp mai.
Ka lar chhoh vanglai tak khan kei pawh ka buai a, mi tu tu te emaw pawh an buai hle a ni ang, nupa inthen phah tihte, lehkha pawh thlak tihte leh pa ber in nu ber a khawih tihte kha thu dik vek a ni. Heti ang lam hi a thleng nual a, a hriat pawh hriat ngam loh chi pawh a tam khawp mai. Mahni pawha pawi tih leh hrehawm tih ngawih ngawih chang hi ka ngah thin hle a, kei a kara tute emaw an lo buai a, kut inthlakna te, chhungkuaa innghirnghona te hial a chhuak ta kha pawi ka ti a, inthiamlohna nasa takin ka khat thin.
Ei leh in te a tha chho va, mahni pawh in fit veh vawh tak han nih chhoh takah chuan thlemna chi hrang hrangin min bawhbuai nasa hle a. Kha tih laia ka thil tawn tur ang chu mi tam zawk hian an rin hriat theih mai chuan ka ring. Mak tak mai chu, sex lama kha ti em em a ka insum thei kha mak ka ti hle a, a chang chuan tite hian ka ngaihtuah hial thin, ‘Khatiang thil kha Gospel ka sak hnu-ah hian tawng leh ta ngat ila, ka insum zo lo hial ta ve ang,’ tiin. Lengzem huanga ka awm lai khan ka tawngtai nasa hle thin a, ‘Faktea aia ka tawngtai tlemna bik tur ka hre lo’ te pawh ka ti ve hial thin. Zun ram thiarna ah te leh mahni chauha awm mai mai lai pawh hian ka tawngtai ngat ngat thin a, Sachin ka ei ringawt pawhin keimahah inthiamlohna nasa tak lo lut nghalin, Pathian hnenah ngaihdam ka dil nghal thin a ni.
Hmeichhiain min han bawr nak nak lai te kha thlemnaah kan ngai phal lova, luck vang liau liauah kan ngai thin. Intih theih nan taka lo hman mai pawh kha thil harsa a ni reng reng lova, kan tana zan khat thil thu leka inphal an tam em em a. Mahse, sawi tawh ang khan heti ang lamah hian insumna ka nei tha hle mai a, a changa han kiss zuai ang chi te hi chu sawi ngai lovah dah ta mai ila, amaherawh chu hei pawh hi a tha ka ti ber lova, mi pakhat ka fawh ringawt pawh hian ka rilru hi a na leh ngawih ngawih thin a, a tawpah chuan mahni inthiamlohna in ka khat leh ta nghal thin. Tu te emaw va tihchhiat tumna leh an nun kawng tikhawlo tura chet lak hi ka thei lo.

Kir zai i rel lon’g maw..?
Chhinga venga kan awm lai hian ka thiannu pakhatin, a bialpa nena a inkar thu min hrilh a. An inhmangaih em em a, mahse inthen a ngai ta si. La induh ru ve ve mahse, bul tan hmasatu nih kha an hreh dun ve ve a, kawnga han inhmuh changa an laih dun zia te thlengin min hrilh a. Chu mi hmang chuan he hla, ‘Kir zai i rel lon’g maw’ tih hi a lo piang chhuak ta a. Kei pawh hian mak ka ti a, heti ang em em a a thluk leh hla thu inphuah mawi hi awihawm loh ka ti ve hial.
Album pakhatna a reh deuh hnu khan he hla hian min vawrh chho leh niin a lang a. Tin, sawi hmaih hauh loh tur chu, ka thiannu leh a bialpa te hi tunah chuan nupaa insiam tawhin, fate pawh pahnih lai an nei tawh nghe nghe a, he hla hmang a ka ko chhuah sak tihte paw’n a sawi theih ang chu.
‘Kir zai i rel lon’g maw’ hi Hindi te in ka dah hman hial a, mawi tak a ni. Ngaithla tawh te paw’n tha an ti hle a, MTV leh Channel V lamah pawh dah se, a hit ngei min beisei pui bawk. Vai rama kan zuk kal pawh khan ‘Pal’ kha ka sa a, vai ho pawhin mawi an ti a, an zaithiam chhuan vawr ber ai pawh khan thiam min ti zawk tlat mai a, tihchhuah ngei pawh an duh. Mahse, contract ka sign tak loh vang mai kha a ni a, han ngaihtuah kir leh chang hi chuan a uihawm duh ang reng khawp mai.
Ka nun a thlemna awm nasa ber pawh, tunlaiah khawvel hi nasa takin a inhawng tawh a, National-ah pawh invawrh theihna remchang a tam tawh hle. Infiamna mai bakah rimawi lam hawi pawhin kawng a inhawng reng a, national- lam han luhchilh rum rum te hi ka châk ve hle thin. Mahse, ‘Rei lote nawmna ai chuan tap chunga i hniak hnung rawn zuiin nunna kraws kawng ka thlang zawk ang’ tiin hlaah te hial a lo awm tawh si a. Mosia nun hian min kaihruai tha hlein ka hre bawk a. Aigupta fanu/fapa a vuah niin a tawpah chuan lalber dinhmun luah thei tur a nih laia a mite nena tihduhdah leh hrehawm a thlang ta zawk kha a ropui ka ti a, kei.. ‘vai ho kara mi hriat hlawh nih tum ve kha, a zahthlak ngawih ngawih a, khatiang dinhmun ka’n it ta chiam mai pawh kha a nih hian a ni lo reng reng tih ka hre ta a, engmah bawhzui ta lem lo chuan ka theihnghilh ta a ni.

Piantharna lam tluang
Lengzem huang chhuahsan a, Gospel a ka pakai tak avang hian inchhirna ka nei lova, vawite khat mah hi ka la inchhir ngai lo reng reng. Sum leh pai lam ka en lova, mahse pawi tih em em erawh ka nei- concert thar, hla thar, boruak thar nena album pahnihna ka tour pui hman ta lo kha a ni a, la piang thar hman lova, tour neih kha ka thil châk ber a ni.
Pianthar boruak inmung chhohna erawh hi chu a rei tawh a, album thar ka buaipui laite khan rilru-a insual nasa thei hle. ‘Hei hi ka album hmasa ber leh a tawpna a ni ang’ tia ‘Zoram tang fan fan / Derna Anka’ tihchhuah tuma ka thusawi khan min vaw let leh dawt dawt mai a, studio-a a ruktea ka record pawhin ka ngaih a ngam thei tawh lo. Lo zai lut vek pawh ni ila, tichhuak thei dinhmunah hian ka indah ngam lova, a chang chuan tihian ka ngaihtuah thin, ‘Mi thenkhat pawhin love song sa tawh loin fakna hla ka sa ang’ an ti a. Mahse, rei pawh a rial hmain love song an sa leh a, Pathianin a hrem chuang hlei nem,” tiin, Engemaw chhuanlam neuh neuh siam a, inkhuhmawi ka tum poh leh ka rilru chu a beidawng tulh dulh zawk a, hlauhthawnnain ka khat nghal bawk thin.
Ka nu hian, “Mihring hmaa thu sawiin i intiam a ni lova, Pathian hmaa intiam i ni tih hre reng ang che,” min ti a. A tir atang reng khan lengzem album buaipui hi ka chhungte hian min support reng reng lova, ka tan hian tawngtaina neiin Pathian hnenah ngaihdam an dil thin. Chutih laiin Pu Dina khan ‘Lengzem album’ a ti tlat bawk si a, keini’n promoter dang kan hmu bawk si lo, “Pathian hnenah theih tawp chhuahin min dil pui rawh u,” ka ti tawp mai a. Chuta ka nu kaltlanga chhanna lo lang chu, “I fapa hi fakna hla sa tura talent pek a ni,” tih a ni!
Hla hmasa ber, ‘Derna Anka’ ka han thun zo chiah tihah khan ka hrawk hi a vung ta vak mai a, thla khat chuang chawlh a ngai ta a, a dam fel dawn emaw tih laiin Kal na in min tlakbuak zui leh ta! Kha album kha harsatna leh hrehawmna nasa tak karah a chhuak ve thei ta hram a ni.
Chutah hlawhtlinna in a rawn zui a, sum leh paiah te pawh rual awt lem loin hman tur te chu a awm ve ta zel a, dik tak chuan ka chhungte pawh kha an mihring mihrinna a lo chhuak a, kei ngei pawh duhamna bawihah ka lut reng chu niin, album pahnihna a zu zi dawn khan ka chhungte chuan, “Mama, a la hma lutuk lo maw.. Pathian kohna a ni chiah em? tiin min zawt nak nak hlawm nghe nghe a ni.

Nunhlui sunna hun a hmang
Lengzem sa tawh lo va, fakna hla hmanga ka hringnun kawng ka zawh tan atanga a ni thumna tlaiah chuan ka khawvel hlui chu ka sun a. Ka chanchin ziah tuma, “Tichuan, ka nun hlui chu he khawvela vawi te khat mah kir leh tawh lo turin ka thlah liam ta! tih ka han ziah meuh chuan ka kut hi a chawl nghal tawp mai a, engmah ziak chhunzawm thei dinhmunah ka ding ta lo. Seling tlangdung leh khawi maw lai laia eng phet phet ka han hmu a, ‘Saitual, Keifang hall-a concert ka neih lai te, stage-ah ka tlan kual a, sound box chunga ka zuan kai lai te leh fans engemaw zatin min au tuar tuar lai te chu ka mitthlaah hian a lo lang nghal uar uar mai. Ka mittui a tla nghal zawih zawih a, ka lung a leng lutuk a, tawrhzawh rual loh khawpin a nasa a ni. Ka tap chhuak hawm hawm a, inhnuai lama awmte’n min hriat ka hlau si, tlangval pumpa han tap ta vak vak mai chu a mawi chiah si lo. Mahse, kha tih lai huna ka boruak tawn kha mihring chaknaa dan beh chi emaw mihring theihna zawng zawng hmanga inthlem lungawi chi kha a ni si lo a ni.
Kamis senduk tial, jeans leh sneaker bunin thingthi hnapin ka awm a, “Lalpa, hei Vanlalsailova hlui hi i hnenah hruai ang che” tiin ka tawngtai a. Ka mithmuhah chuan Vantirhkoh pakhat hian Sailova chu zawi te tea hruai ang hian ka hmu a, ‘An hruai ta. Ngui ri riai sak hmel. Nimah se, Zion an thlen hunah nunna thing par chu an tlan tawh ang’ tih hla chang chu ka rilru-ah a lo lut nghal a.
Zan a tlai tan tawh a, thla pawh a eng fiah kalh mai.Chhum in van boruak khi a bawh chiai mai bawk a, han hawi vel ila, boruak hrim hrim kha a ngui ruai niin a lang. Min sunpui ve ni te hialin ka hria a, kei pawh nasa taka tapin, ‘Kir zai i rel lo’ng maw’, ‘Ka di ka par mawi te’, ‘Nang ngaih vang hian zan mu ka chhing thei lo’ tihte chu ka sawi chhuah theihte an ni a, nun hlui han thlahliam tur kha a nâ ka ti a, ka tuar zo dawn lo ni te’n ka hre hman hial. Tlangban ban vuan meuh chuan tlangval pumpa chu ding tha mumal thei loin ka bu deuh lawp lawp a, darkar khat chhung zet chu chawl loin ka tap a ni. Ka zawi vek a, “Van mipuite u, ka nun hi min khawngaih pui ula, min dem suh u. Min thlamuan ula, min sun pui ve teh u” tiin ka au chhuak a, dinhmun thara inhlan kai kha a chakawm teh meuh mai, mahse dinhmun hlui kha dawn kir loh theih loh a ni a, boruak thara ka han awm tur chu ka lung hi a leng lawk em em mai a ni.

An hrang lua e
Heti ang deuh hian Setana hian tum thum zet chu lunglenna in min thlem vak tawh a, thla kha hnuah zing dar 3 ve ni tain ka hria, Ar khuang ri chuan min tiharh hlawl mai a. Thawk leh khatah nun hlui ngaihna chu nasa mangkheng hian a rawn tho chhuak leh a, tukverh atang chuan College veng-field a lang a, Keifang, Seling, Champhai tlangdungte chu ka thlir a. Awmngaihna ka hre lo, ka mu leh tawp a, a rukin ka tap ta a, thutlukna ka siam hi a fuh chiah ang maw? Engatinge heti ang dinhmuna ka din tak mai? Hlim tak leh tu dang ngai lem lova, concert ka neih lai te, fans te’n min lawm a, min bawr laih laih laite kha, aw.. engatinge ka hriat chhuah leh thin ni!
Ka thawm hriain ka nu leh pate chu room-ah an lo phei nghal a, a tirah chuan thlarau lama ka tui hal vanga ka tap niah an ngai a, “Mama, engnge ni ta, engatinge i tah?” tiin min zawt a, “Setana’n min bei, Ka nun hlui ka ngai ngawih ngawih a ni,” tiin ka chhang a. Tichuan, ka lu chungah kut nghatin min tawngtai pui ta a, mak tak maiin chawp leh chilh hian a chhanna a lo thleng ta a, thawk leh khatah hian ka khur dawt a, ka lunglenna zawng zawng chu lak bo duak ang hi a ni ta nghal a ni. Hemi hnu rei vak lovah heti ang deuha thlemna nasa tak ka tawk leh a, mahse ka tap duh tawh lo a ni. Tun thleng hian zanlaia ka thangharh te hian khatiang thil kha a thleng leh ang tih ka hlau hle thin a, theihnghilh hram hram ka tum thin.

Ngaithla ngam lo
Lungleng mi ka ni a, kei tluka lungleng thei hi mihringah hian an tam ka ring lo. Naupan lai hun ngaihtuah chang pawha mittui tla zawih zawih thei ka ni ve a, ka hla sak reng rengte pawh hi a thluk leh thu ah te pawh hian ka mizia chu a lang chiang awm e. Fakna hla ka sak hnu hian album pakhatna kha ka ngaithla ngam lutuk lova, a chhan chu hun engemaw chen ka lo tour pui tawh a, kha tih lai nun kha ngaihtuah loh theih loh a nih thin avangin nun hlui ngaih leh vak ka hlau a, ngaihthlak chi-ah ka ngai tawh lo a ni.
Album leak out zawk kha chu ka ngaithla ve fo thin a, a bik takin, ‘Lo let la, ka kiangah,’ tih leh ‘A tu’n min sel lo se’ tihte hi ka ngaithla zauh zauh thin.
Ka hla hlui leh tihchhuah hman loh te kha sak dilin a track nen lama min diltu hi an tam hle a. Mahse, tumah sak tir ka tum lo. Tul ka ti lova, hlui hlawn thil a ni tawh a, kei pawhina tha ka tih tawh loh leh tul ka tih tawh loh chu midang tih atan paw’n ka duh lo a ni.

A van lunglen thlak ve le
Kumin Chapchar Kut kan hman hma lawk khan 2003 kuma Lammual-a ka sak tawh, ‘Zoram Tang Fan Fan’ tih chu kha tih hun laia ka incheina ang chiah khan darthlalang hmaah ka ding ta a. Computer atang a ka han play chiah mai tihah lunglenna mu hnu chu kaihthawh a ni leh ta! Darthlalangah chuan ka han inen a, ka lung hi a leng em mai a, ka hnuk a ulh hial a ni. Kha mi tum, ka zai hmaa, ‘A van lunglen thlak ve’ ka tih kha mi thenkhat chuan sawi selin, ‘Sailova hian van ram a ngai dawn emaw tih nak a laiin khawvel hi a la ngai zawk ta fo a ni maw’ an lo ti a ni awm e. Mahse, kei chuan hei hi ka sawi duh, ‘Nun hlui ngaihna chang hre lo leh, ngai ve lo mihring hi an awm ka ring lo. An lo awm a nih paw’n an piangsual tihna a ni ang. Tupawhin a taksa pekna hmasa zawk kha a theihnghilh thei ngai lo.’
‘Sul hnu leh nunhlui ngaihna te’n min bo san reng an tum si lo
Min vur lua e, i malsawmna te’n khawvel nawm hrephak ve turin Sual setan an ka hringnunah doral lian thlem nan a rawn hmang e’ tih hla ang deuh khan nunhlui mual liam ta kha kohkir theih rual a nih loh laiin theihnghilh theih erawh a ni thei lo thung.

Hmangaihna lama rilru no tak Jojo-i inpuanna

2009-01-28T22:03:00.000-08:00

Josephine (Jojo) chuan a mize dik tak sawi lang zauhin, "Mi min thlir dan leh hmuh ang hi ka ni lo. Ka rilru hi a no lutuk a, engemaw hlekah hian a na hma em em bawk a, hei hi ka chhiatpui fo tawh," tia bul tanin, "Hmangaihnaah phei chuan a boruak zawh loh chang ka ngah mai. Ka rilru hi a na hma lutuk a, nikuma ka bialpa nen kan inthen pawh khan 'Hmangaihna la na mi' tih takah ka tuar na ang reng khawp mai a, ei theih loh leh muttheih loh lam chu thuhran ni se, mittui hi ka seng hnem em em a ni," a ti.
Sawi chhunzawm zelin, "Icon boruak a zawh hnu thlakhat pawh a ral hma-in kan inthen a, ka dem hran lo. A hminga mite hriat lo nih ve takah chuan mipa ta'n pawha thikthu tihchhiatna tur hi a tam hle a, a chang chuan tihian ka ngaihtuah mai mai thin.
“Kawnga kan kal a 'I zaithiam lutuk' min tihte hian nuam ka ti a, mahse chhungril tak takah chuan zawhna tam tak a lo lut nghal a. Kan khawvel zim chho ta lutuk leh engkim maia inven leh uluk reng ngai ta mai hi a hrehawm. Dik taka sawi chuan, hetiang nun hi tu tan mah ka duhsak hran lo. Ka nun hlui bawk kha ka ngai leh thin," a ti. Hetia a sawi lai hian Jojo-i aw hi a zawi raih raih hle.
Aw, hmangaihna sawi thiam ila
"Hmangaihna hi a awm tak tak pawh ka ring lo," tia a sawi hnu lawkin, a ngawi deuh vang vang phawt a. "A buaithlak, inthen hi chuan rilru hi a na veng veng mai a, ngaiawh leh tur hian hun tam a duh leh thin" a ti. A sawi zo chiah tiin a aw 'key' a danglam nghal thut!
"Nia, tikhan ka sawi kual vak a, tunah hian min hnemtu tur an awm mai thei a sin, ka sawi sei tawh lo mai ang," a ti nghal zaih. Hmangaihna par a tlan mek em tih lam zawh a tul lem lova, duhsakna sang ber inhlan chungin kan inmangtha ta a ni.

Pakistan sipai hmaa zam lo Mizo nula Rosy

2009-01-27T01:03:00.000-08:00

January 8 khan Aizawl chhuahsanin National Youth Festival hmang turin Amritsar a pan vang vang a, a kalpui zaithiam leh band dangte nen an zuk chetha hle. Nimin khan Kohima atangin a thil tawn leh daihriatte hahip tak meuhin zaithiam Rosy K Rem-sangpuii chuan hetiang hian a sawi.
"A nuam tawp. Kan zai tha, mipui lam pawhin min lo lawm a, a pumpuia thlirin Mizo zaimite kan langsar ber niin an sawi. Ka thil tawn dang leh chu maw, Pakistan ramri hrul-ah kalin nasa mangkhengin kan ram tan kan au a. A hmunah hian tawng mawi lo ni suh se, Pitar ha bal te te pawhin an awrawl neih zawng zawngin, "Hin-dustan, Zindabad' tiin an au nasa hle. Pakistan sipaite chevel kan hmu vek a, anni pawhin min rawn au-el ve bawk a, tlai lam boruak phei chu a sang thei khawp mai.
“Khata tang khan thumaia kan zir thin ‘India ram hi kan ram a ni a, kan hmangaih tur a ni’ tih chu a takin ka zuk hrechiang zual a, ram hmangaihnain ka khat lehzual a, boruak \ang tak karah awrawl tawpin 'Hindustan, Zindabad' tiin ka au a, sawi fiah theih loh boruak dangdai takin ka pumin min fanchhuak a ni," a ti.
"Hetianga ramri-a Pakistan sipai hma-chhawn tur hian khaw hla tak tak atangin mi an lo kalkhawm thin a, pawisa tam tak sengin rickshaw te an hawh a, Pakistan lam ai mahin mi kan thahnem zawk ziah a, anni lam pawhin thawm an rawn nei beng-chheng thei hle a, mahse tih tak takna lamah chuan min tluk lo hlein ka hria," tiin Rosy hian a sawi.
Khata tang khan Ram leh hnam an zahpui loh zia a hriatchian rualin, "Isua hi kha aia tan leh atana dinngam tur kan ni zawk dawn lawm ni?" tih zawhna chuan a hringnunah bungthar a keupui nghal a, "Isua zahpui loh lehzualna nen ka lo haw dawn," a ti.
Ruahman ang chuan Kohima atangin Rosy hi Dimapur a lut anga, chumi atang chuan Imphal-ah kawi lut lehin, February 2 hian Aizawl leilung a rah hman beisei a ni.

SP-i then hnu lo ngaichang rawh

2009-01-22T23:30:00.000-08:00

Nimin tlai dar 3 vel khan Class-III room-ah naupang zirtirin a buai hle a, chawlh an neih chhung reilote chu hmangtangkaiin, “Ka mut a chhuak tawp,” a ti.
“Tunlai chu ka chau deuh a, naupang enkawl hi rin ai takin a lo harsa a, nileng lenga han au deuh tawh hi chuan a chauh ve theih khawp mai," tia bul rawn tanin SP-i chuan, "Kum a thar a piang hian 'pasal i nei dawn tawh em?' min tiziah a, mite hian pasal nei thuai se min ti hlein ka hria," tiin 'ham' deuh bai bai chungin a sawi.
Thlaleh maia exam hmachhawn tur SP-i chuan, "Lehkha a zir theih tak tak lova, February 13 hian BA Third Year exam kan tan dawn a, ka la zir lo nasa. Inpuahchah ngaihna vak pawh ka hre lo," a ti. Hetih lai hian music video siam a tum mek thu pawh sawi nghalin, "PS Chawngthu hla, 'Samang Ka Then Hnu' tih kha siam ila kan ti deuh a, shooting neih hun tur chu kan la chiang lo," tiin a sawi.
SP-i hian music video a siam reng rengin hetiang lam hawi hlathu a hmang nasa hle a, chhas lamah a riang vak lo nia hriat a nih lai leh hetiang lama khawhar tehchiam lo nia sawi anih laia 'inthen' lam hawi ringawt a sa tluk tluk mai hian zawhna a siam tam hle mai a, amah pawh hian a pha bik lova, a chhan leh vang chiah pawh sawi chuang lovin, “Mi in an duh a," a ti zaih.

Aizawl nula ni mai tur Zomuanpuii’n X-ray la dawn

2009-01-22T23:24:00.000-08:00

Sihphir fachuam Zomuanpuii chuan nikum lama a lo buaipui tawh hla 13- awmna music video collection siam chu buaipui chho zelin kumthar pawh khan engmah buaipui hman lovin Lunglei, Mualvum leh Tuirial-ahte kalin shooting a nei char char.
Heng vangte pawh ani mahna- kar hmasa atang khan insawiselna a nei nghal a, tunah hian X-ray la ngei turin doctor in thurawn a lo pe a, kar hmasa pawh khan Damdawi In-a indahluh hial an lo tum hman tawh nghe nghe a ni.
Hemi chungchang hi sawiin Zomuanpuii chuan, "Ka awm nge pum zawk kan la hre chiah lova, thawk zawngte hian a rawn na leh vak thin a, hei vang hian zin leh zai pawh duh angin ka ti hlei thei tawh lova, Doctor-in X-ray turin min ti a, chumi hnu-a result lo chhuah dan a zirin ka awm dan tur chu a sawi chian theih chauh ang," a ti.
Hetih lai hian an awmna Sihphir chu nuam ti hle mahse, a eizawnna leh hnathawhin a zir chiah tawh loh avang leh remchan zawkna avangte'n Aizawl-ah rawn insawn thlak an tum mek nia hriat a ni.
"Mamawh leh thil tul bikah Aizawl kal zel a ngai a, chuvang chuan thlaleh atangin nge ka hre chiah lova Aizawla rawn awm thlak kan tum. Heta kan In hi chu miin an luah mai anga, kan awmna veng tur chiah erawh a la chiang lo," tiin hunawl neih a pianga computer-a photoshop buaipui em em hian a sawi.

Johan-a'n huphurh lawk

2009-01-19T22:52:00.000-08:00

Hlaphuah thiam tak Parpuii Chawngthu hla hlang awmna album buaipui mek Johan H Lalmalsawma chuan tunhma ang em ema boruak a neih leh a ring tawh lova, mahse theih tawp chhuah erawh a tum. "Ka huphurh khawp mai. Mahse, hla te hi a hlu a, a phuahtu pawh hian a roh em em a, chuvang chuan a hlawkna lam pawh um lovin kan tichhuak dawn a ni," tiin a sawi.
Hetih lai hian chhas zui ruk a nei nia sawi chu a pha thung a, "Zui ka nei em em lova, rawng-bawlna tak taka luh tawh chuan a inmil thei lo. A chhan chu, chhas hi No.1 ah kan lo dah leh thin a, chuvang chuan chhas leh Pathian thu hi inkawprem har tak a ni a, ka tan pawh hian a la hun lo te pawh a ni mahna," tiin tunlaia engemaw ri ret ret awm nia an sawi chu a chhang let nghal.
Johan-a album thar hi peihfel thawkhat tawh niin mixing tlem an khawih anga, tichuan hun remchang hmasa berah ngaihthlak theih tura phochhuah a ni ang.

Isak-a’n a nupui hruai tum lo?

2009-01-19T22:45:00.000-08:00

Nikum khan "Kumtharah te chuan inhruai dante pawh kan ngaihtuah tawh ang chu" tiin a lo sawi tawh a, mahse kum a lo thar a, thuthar erawh a nei thei lo. Isak Malsawmtluanga chuan hemi chungchangah hian engmah sawi theih a nei loh thu leh hunin a la rawn hril mai tur thu sawiin, "Kan nu nena inhruai leh hruai loh chungchangah hian engmah sawi theih ka nei lova, chu chu tun dinhmuna chiang taka ka sawi theih chu a ni mai," tiin a sawi.
Nimin kha a fanu Grace Lalhruaitluangi piancham a ni a, Isak-a pawh hian piancham lawmna hi a va hmanpui ve ngei a, mahse thu thar erawh a rawn nei haw lem lo. Isak-a te hi engvanga awmdun thei mai rih lo nge an nih tih zawhna hi a ri reng a, mahse thuchiang erawh a awm thei si lo a ni. 'In hruai chu intum ang chu maw" tia zawhna pawh, "Ka hre lo le" tih chiahin a chhang.

Mamuani'n thla thum mi fa pai mek

2009-01-19T22:39:00.000-08:00

Pasal a neih fuh em vanga thlamuang taka In lama Home minister nihna chelh mek Mamuani chuan thla thum-a upa fa a pai mek a, a pasal Samuel Lalzarmawia'n thleng keh thei dawma a dawm leh a duat hlum lo chauh chu manhla a ti hle a, a pasal fel zia hahipin a sawi.
"Upa lam kan ni tawh a, chutih laia pasal fel leh tha tak mai ka nei thei hi ka lawm a, kawng engkimah pasal nih a tling a, a thlazar hnuaiah hian ka him tawk a ni," a ti. Tunah hian raino hmatheh zinga langsar tak 'luak chhuak' boruak chuan Mamuani hi nasa takin a bawhbuai mek a, hrehawm a ti thei hle. "Ka luak reng ringawt mai, tlem chuan ka tla deuh chuan ka hria. Chaw han ei teuh pawh ni ila, kan luak leh teuh a ni mai a, tunlai chu luak thlarau-in min chenchilh a ni ringawt," tiin a hun tawn meka harsatna a tawh a sawi chhuak bawk.
Heti chung hian Mamuani hian hmun hrang hrang atangin sawmna a dawng awl lova, In nghaktu ber a nih avangin a tan chhuah a remchang lova, a pasal erawh chuan zai lama a theih ang anga hma la turin a fuih reng, "Kan pa hian zai hi min la tuipui reng a, min thlawp em em mai bawk a, chuvang chuan zai hi chu chawlhsan mai mai thei ka ni lova, a remchan dan a zirin kan zai chho zel ang chu," a ti.
Thla thum mi pai mek Mamuani hi Doctor te chuan July 16 chho vela nei tur angin an sawi tawh a, a phur hle nghe nghe. Mipa nge hmeichhia ni ang tia zawhna chu, "Duhthlan ralah chuan fatir hi chu hmeichhia ni thei se, a chhan chu nu te an chhawk zangkhai thei a, an chhawr hma thei bawk si a," tiin a chhang.

Sailova'n nupui neih inpeih ta

2009-01-17T21:17:00.000-08:00

Kum thum kalta atang khan 'Ngaih-zawng neih kum' leh 'Nupui neih kum' te a lo puang un un tawh a. Mahse, 2009 a lo inher chhuak a, a ngaite bawkin a inlan leh a, hetiang lamah hi chuan hmasawnna a nei chau ang reng hle a, chuvangte pawh a ni mahna, nimin thleng khan ama puala 'Kumpuan'a la neih loh thu sawiin chung lam atanga a dawn hun a nghak tawp.
"Hmeichhe lam pang an remchang a nih phawt chuan nupui neih hi tunah hi chuan ka inpeih at tawh mai. Mahse, kan luck lo tluang zel a, mahni hi chu inpeih engang mah ila, hmeichhia zawkin min la 'yes' loh chhung hi chuan maltlat leh rih phawt hi a ngai a ni," tiin Sailova hian a sawi.
Pute u, kawngpui tha min pe rawh u!
Malaysia atangin a lo thleng leh tawh a, a kal hmasak tum khan 'faina' a rawn uar haw hle a, tun tumah erawh chuan 'Kawngpui tha' tih a ni thung. Hemi chungchang hi sawiin, "Mi ram ve te zawng an kawngpuite a tha-in, a fai em em a, kan ramah ve thung chuan an han siam tha ve teh thin na a, fur pui chu sawi loh ruah phing phi siau tlak ringawt pawh hian a len chhe vek thei a, tihngaihna a awm lo a ni. Khawpui timawia, tikhawpuitu ber hi building intiang erhurh lam aiin kawngpui tha leh changkangah hian a innghat zawk," tiin a rualawh thu a sawi.
"Sorkar hmasaah kha chuan kawngpui te hi black topping tih a ni ngai lova, surfacing (a chung tihmam) ringawt a ni a, kar tam a liam hma-in kan chil chhe leh vek mai a, Aizawl khawpui cheimawi chu sawi loh an tihmelhem zawk.
“Tun sorkar tharah hian beiseina ka nei sâng hle a, an tawngkam leh an thu sawi reng reng atang hi chuan a thlamuan thlak hle-in ka hria. Chutih rual rualin, a tir lamah hian sorkar thar apiang hi a thlamuan thlak dup dup khawp mai a, hun a lo rei a, ze ngai bawk a chhuak leh a. Tun sorkar erawh hi chuan chak taka ram hmasawnnan ke a pen ka beisei hle a ni," a ti bawk.
Ban ngam rawh se!
Department hrang hranga sorkar hna-thawkte khawsak dan chu a vei hle a. Mitha leh rinawm tak tak an awm laiin a tam zawk chu 'Hlawh min pe tho, thawk tha lo mahila thlatin hlawh a kiam chuang lo' an tifo mai chu tha lo a ti hle a, "Mahni hnathawha tui lo hi chu sorkar thar hi chuan ban ngam rawh se. Ram thanmawh bawk an ni a, sorkar hian dim lovin na takin action la se ka ti tak zet zet a ni," tiin Sailova hian duhthawh takin a sawi.
England leh khaw-chhak ram hrang hrang a tlawhnaah an ram mipuite'n bawlhhlawh an paih dante chu entawk tlak a tihle a, "Keini ve thung chu bawlhhlawh bawm-ah kan paih a, a luh loh chuan chhar lehna chang kan hre lova, kan zak tlat a. Mahse, mi ramah chuan an chhar leh ngat thin," a ti.

Mapuii (Trinity) in sermon ropui thlak

2009-01-17T21:13:00.000-08:00

Mapuii (Trinity) chuan nizan hmasa khan an Biak In-ah 'I dinthar leh ang U' tih thupui hmangin thalaite hmaah sermon a thlak a, minute 20 chhung vel lek mahni se, a tla tha hle a, ngaithlatute'n an hlawkpui hle a ni.
"Tling lovin chak lo hle mahila, kumin kum thar atang hi chuan thlen chin atanga hmasawn chhoh hret hret ka tum hle a. Hemi zana ka insawmna ber pawh a ni a, tawngkam ka thiam lo hle tih hrereng chungin theih ang tawkin thuchah ka sawi ve a, midangin an lo hlawkpui em tih hre lem lo mahila, keimahah chuan zirlai thar ka chhar chhuah belh nual a ni," a ti.
"Sermon hi tunhma chuan ka ti ve zeuh zeuh tawh a, mahse a rei leh deuh tawh a, nizan hmasa pawh khan ka nervous hle a, zun te a chhuak rum rum mai a, mahse kan han din chhuah tak tak hnu chuan a zia chho ve leh mai," tia bul tanin Mapuii chuan, "Lei-a ro chang tur pawhin theihtawp kan chhuah a ni a, Van-a ro chang tur phei chuan kan tih tang tang a ngai. Peih lo mah ila, Pathian tan kan tih tang tang a ngai a ni. Tun hnai deuh atang khan Zing tawngtaite hi ka peih lo em em thin a, mahse rilru-in ka tum tlat a, peih lo viau mahila, ka ti tang tang a, ka hlawk pui hle a ni," tiin a sawi bawk.

Zoramchhani te Inah misual a lut!

2009-01-17T21:04:00.000-08:00

Misual hi ka pate room-ah a tawm ve a, ngaihthatlohna nei miah lovin thisente kha ka tifai a: Zoramchhani

Malaysia atangin a rawn 'bawl' haw a, boruak lum lutuk a ngaih lova, hmai no sar thin kha tunah chuan a bawl ve tuk tuk tawh! "Ka mu thei lova, a lum reng bawk si a, sik leh sa ka ngaih lo a ni," tiin Zoramchhani’n a sawi.
Hetih lai hian, Masi lai vela an In chhunga thil thleng chuan a la tihlauthawng reng a, mahse a hlauh zualpui erawh a reh tawh thung. Masi ruai theh ni khan RC-i te In-ah misual tutih hriahloh a lut ru a, hun engemaw chen chu RC-i nen hian an awm dun nghe nghe.
"A mak tawp. Khami ni khan engemaw hian min mawlh tlat mai a, ruaitheh tura ka kal pawh theh ta lo chuan ka haw chho leh a, In-ah keimahin ka awm a. Hetih lai hian chhuatah thisen tling ka hmu a, ngaihthat lohna em em pawh nei chuang lovin ka tifai a. Kut hniakte pawh a lang thei. Rei vak lo ka awm hnu-in ka chhungte an lo haw a, chutah pawh chuan kan la hre mai lova,”
“Kapa-in ka nau hnenah, "Mama, room-ah chapal min va lak lawk teh" a ti a, chuta tang chuan ka pate room-ah misual hi a lo awm ngei tih kan hre ta a, police te sawi dan chuan, In-a ka awm lai hian misual hi ka pate room-ah a tawm ve a, tukverhte ka hawn vek avangin ka room-a ka awm hlan-in, thawm nei miah lovin a chhuak leh ta a ni," tiin nimin tlai khan Masi lai vela thil thleng ni mahse RC-i hian a lak thu tak em vangin a sawi chhuak.
Hetih lai hian, han rinhlelh tur emaw tinzawn tur deuh engmah an neih loh thu sawiin, "Tumah rinhlelh kan nei lova, misual hian enge a beisei a, lak a tum tih pawh kan hre lova, sum leh pai kan nei bawk si lova, rinthiam a har khawp mai," a ti.
"Thil kal tawh mahse, vanduaithlak takin misual nen lo intawng ta ila, min tihhlum hma-in a na ve hman tho vang. Sum leh pai lak te kha a tum anih chuan a ring sual ngawt ang, lakchhuah tur a nei lo khawp ang.
“He thil thlen hun hi tlai lam dar 2 - 3:30 inkar vel a nih kan ring a, keimah chauhin ka awm lehnghal a, a hlauhawm duh ang reng khawp mai, ka khur tawp," tiin RC-i hian a sawi.

Chhungte aia a ngaihpawimawh zawk chu!

2009-01-06T22:09:00.000-08:00

Leitlangpui fachuam Pensy B Lalthangliani chuan vawiinah hian Pu Zorampela hla pakhat chu music video a siam a tum a, mahse a hla thupui a sawi chhuak thei lo tlat! "E... ka van hre tawh love, hman deuh kha chuan ka sa ka sa a, mahse tunhnai khan ka sa ngai ta meuh lova, a thupui pawh ka theihngilh der mai a, ka hre tawh miah lo," tia bul rawn tanin, "A zia lo mange aw... vawiinah shooting neih kan tum leh nghal a," tiin Saron veng kumthar ruaithehnaa fatu ni bawk Pensy hian a sawi.
Lungleiah Masi a hmang a, amaherawh chu kumthar erawh Aizawl-ah programme pawimawh tak tak a neih avangin helamah a hmang thung a. Kumthar ni pawimawh bera a chhungte bula a hmang lo hian zawhna a titam nghal hle. "Helama min pawt bertu a awm hran lova. Programe pawi-mawh tak tak, tunhma atanga ka lo 'yes' tawhte a awm vang maia hmang ka ni a.
“Ka chhungte pawhin chhungkima hman thlahlel viau mahse min ngaihpawimawh sak zawk bawk avangin kumthar hi Aizawl-ah ka hmang ta zawk a, chutiangin min pawt bettu a awm hran lo," tiin nui sang chungin a sawi.
Ruaithehnaah a zai lova, mahse zei taka fatu hna a thawh avanga fak hlawh Pensy chuan, "Tun tum hi ka vawikhat fatu-na ani lova, vawi engemaw zat ka lo fatu ve tawh a, nuam ka tihzawng tak a ni. Chawhmeh siam chungchangah chuan Salad han siam vel hi nuam ka ti ber a, a eitu lamin tui an tih leh tih loh erawh ka hre zui ta lo," a ti bawk.
2009 a lo inher chhuah phat atang khan kumin chhung ngeia tihchhuah a tum 'Mizo gosepl album' chu a buai pui nghal char char a, English album erawh tun nipui chhunga tihchhuah hman hram a inbeisei hle a ni.

Luck thei lo TBC-a

2009-01-06T22:07:00.002-08:00

"Nula zei leh tha tak Ka tawng dah lo’ng maw' tiin Bike a lei a, kum khat dawn a tlan kual hnu pawha phurhtur remchang a hmuh zawh loh vanga a ruk taka mangang TBC Zaithanpuia chuan nimin khan aw ki hniam reih rawih hian, "Ka hre bik tawh lo. Luck lo a lei ah Masi leh Kum tharah khan ar kan pui tur nei lovin zaikhawmna lamah ka tal ta zawk a, hman pui tur neih loh chuan e... tihngaihna a vang duh khawp mai," tiin a sawi.
"A hminga tlangval nihte chuan duhzawngte chu nei ve e.. mahse, kan duhzawngte hian min duh chuan si loh chuan hmalak ngaihna a awm bawk si lova, a buaithlak thei khawp mai," tiin a sawi bawk.
TBC-a hian April thla lama tihchhuah tur lenglawng album thar a buaipui chho leh tan tawh a, studio lamah track siam tirin a bur ngur ngur leh tawh a ni. Hetih lai hian Karizma bike sen chu a dumin a thlak daih mai a. A chhan a sawinaah chuan, "Ka tal fuh vak lova, chuvang mai a nia. A color ka duhzawng a nih vang a ni hran lova, a lo remchang thut a, a dumin ka hnawih ta zawk alawm le," a ti.
Rokhawlhna dang a awm lem loh chuan ni 7 hian Lunglei-ah function pawimawh tak hmang turin a phei ang.