Maldives panin Dr. Luke inkapchhuak leh dawn

Mizoram atanga rampawn (foreign)-a zai tura band zinchhuak hmasa ber record an siam a, nikum khan hlawhtling takin, khawvel hmun hrang hranga mite’n chawlh hahdamnana an hman lar berte zinga mi, Maldives-ah an inlan a. Lawm an hlawh a, an kham loh em avangin kuminah pawh Dr. Luke hi an rawn sâwm nawn leh a, rokhawlhna a awm lem loh chuan December 22, Nilaini hian Aizawl chhuahsanin, Maldives an pan dawn a ni.

Hemi chungchang hi sawi chiangin, Dr. Luke khuangpu Jerome chuan, “Nikumah khan ‘Kumtharah pawh kan la rawn sâwm leh ang che u’ min ti a, tawngkam tha mai maiah kan ngai a, mahse min rawn sâwm tak tak a, keimahni lam zawk hi kan inpeih loh avangin thuchiang kan hrilh thei lawk lova. “A chhan pakhatah chuan guitarist Mamuana hi Delhi-a lehkha zira a awm vang a ni a, kan han sawi ho tak tak hnu chuan kal leh ngei tha kan ti a, tichuan kan zuk tichiang (confirm) ta a ni,” tiin a sawi.

Hetih lai hian, inpuahchahna erawh an nei tha thei meuh lova, band member an kim miau loh avangin mahni awmna hmunah a remchandan ang angin an zir a. December 18 hian Mamuana hi a rawn thleng thei emaw a ni dawn a, Aizawl-ah hian ni hnih vel bak zirna hun tak tak an nei hman dawn niin a lang lo. Hei vang hian an sak tur leh zir turte chu Delhi-ah te an zuk thawn thla a, chutiang vel chu tuna an dinhmun chu a ni.

“Kan inpuahchahna a nep khawp mai. Tun hrihah chuan chuti tehchiama inbuatsaihna nei thei pawh kan ni lova, band member kan kim miau loh avangin a theih ang angin kan ti ve hram hram a ni. Kawng lehlamah erawh chuan lawmna tur kan nei thung a.
“Joseph-a (Ex- Realistic) in tun tumah hian min tawiawm thei dawn a, kan lawm tak zet. Feli hi a hah thei em em a, zankhatah darkar 4 inzawm zatin a zai thin a, Joseph-a’n min puih theih dawn avangin kan hahdam deuh tawh ang,” a ti bawk.
Dr Luke hian fakna hla bakah, instrumental turu tak tak vawrhchhuah an tum a, an zai leh rimawi ngaithlatute hian an music play hi an tuipui a, an ‘enjoy’ hle bawk. Mizoramah ‘Original nen a inang em, a sa dik em? Guitar zut a inang em?” ti-a lo khaikhin duah ang chi erawh Maldives-ah hian a awm ve lem loh avangin hahdam takin an che thei a, chu chu nuam an tih em emna chhan pawh a ni.

Dr Luke te hi an manager, David Hlawndo hovin an fehchhuak anga, an tum anga an awm thei a nih chuan January 3 hian Mizoram panin
an rawn let leh ang.