Sailova'n Suu Kyi lawmpui, raltlante lainat

"Burma ram hi tunhma chuan ‘golden city’ tia sawi thin a ni a, ram hausa leh rangkachak khawpui tih hiala hriat lar niin, ramdang mite pawhina an hmuh châk em em thin a ni. Amaherawhchu, Sipai rorelna hnuaiah an tlachhe ta a ni a, chu chu Aung San Suu Kyi hian tundin leh a tum a ni. Hetianga chhuah zalen a ni ta hi thinlung takin ka lawm pui a, Burma mipui zawng zawng, ramchhung leh pâwn-a chhan hrang hrang vanga awm te thlengin ka lawmpui.

“Mahni ramah pawh awm ngam lovin Malaysia leh thenawm ramahte tlanlutin, khawvel ram hrang hrangah himna zawngin an tlanlut mek bawk a. Mimal tak pawhin an dinhmun hi hrechiang ve hle-in ka inhria, Malaysia-a an dinhmun retheihzia te
thlengin mit ngeiin ka hmu a ni. “Malaysia thlen tumin, a rukin bawng phurhna motor-ah te, ran leh thil dang phurhnaah te a theih ang anga inhnawh lutin an han thleng rawih mai a, chutah lawngchawlhna leh hmun dangah te police-in an lo man a, mihring tling lo khawpin an lo sawisa a, an thih hmâ chu rim takin an chhawr mai a ni. Kawng lakah pawh police man hlau reng renga tlan an nih avangin mi tam tak chu motor accident avangin an thi a. Zalenna an zawnna lamah an thih phah nasa em em a ni.

“Sipai rorelna râwng tak hi zo hnahthlak unaute ngei ngei pawhin an tuar nasa em em a, sipai sorkar rorelna khian mipuite thleng phak hmasawnna a pek loh avangin ei tur nei lo leh sipai rikrapna nasa lutuk avanga tlanchhia te an ni hlawm a. Mizoram chhungah ngei pawh tam tak an lo lut a, raltlan an nih avangin hmuhsit an hlawh a, an phâk ang tawk tawk an thawk a, an dinhmun a hniam avangin keini’n kan lo enhniam leh tawh bawk si nen. Mizoram chhunga an thawhna lamah pawh an hnathawhin a tihtlei zawh loh avangin thil pawi tak tak an khawih hnem hle a, an puar khawp an hmu lo lutuk hi an tuar nasa hle-in ka hria.

“Aung San Suu Kyi hi burma ram tiengtu tur a nih ka ring tlat a, burma-in kawng dik a zawh a, a chhunga chengte’n zalenna te, mihring dikna leh chanvo te thlenga an neih theihnan leh ram hausa an nihna hi khawvel hriata a taka pholang leh tur hian amahah pawh rinna ka nghat lian hle a ni. Burma hi Aung San Suu Kyi kaltlanga a insiam rem loh paw’n a thisen tal hi chuan a au harh ngei ngei ang ti ka ring tlat bawk a, amah hi mimal tak pawhin ka tan a, ka ngaisâng a, tawngtainah ah te hial ka dil sak tawh nghe nghe.

“Sawi tawh angin, kan zinna hrang hrangah mahni ramah pawh thlamuang taka awm ngam tawh lova, mi rama raltlana awm hi ka hmu hnem em em a, ka lainat a, ka tawrhpui hle bawk. Aung San Suu Kyi chhuah zalenna hian beiseina thar a pek ka ring tlat a, zalenna duhawm tak an nei leh ngei anga, ‘golden city’ ah a insiam leh ngei bawk anga, ram mipuite pawhin mipui rorelna dik tak hi an neih leh ngei pawh ka beisei pui a, thinlung takin duhsakna ka hlan a ni: Vanlalsailova