Tuesday, December 11, 2018

‘Rinawmin Krismas’ thlir theih ta

 PB Sanghlunpuii chuan 'Rinawmin Krismas' tih chu thlir theih turin youtube lamah a phochhuak ta a, John Mawitea leh Mapuii Fanai te nupa phuah hian belhchian a dawl hle.
Tunhmâ zawnga lengzem hla sa thin hian a vawikhatna ni turin Masi hla pangai ni lo, love song kaipha deuh tur a chhawpchhuak a, Zo rimawi khawvel-ah hetiang lam hla hi kan neih tlêm tak a nih avangin a dawnsawn a nuam.
PB-i chuan, "Love song rawngkai Masi hla tak hi a tlêm a, midang te tih-hlim nan ka duh ve hrim hrim bawk avangin Mapuiite nupa ka bia a, anni'n min lo siamsak nghal a, Masi hla ka vawikhat siamna tur a ni," tiin a sawi.
Recording leh Video hi 3 Bro-Sis Audio visual kutchhuak a ni a, Music hi Kima Chhangte a ni thung.

Friday, December 7, 2018

Kum 10 kalta chhunga a chunga thil thlengah vuina nei lo: MS-i Fanai


A khuh hawnna 
Mi thenkhat tan nikhat hi kum sang-khat ang maiin a rei a, thenkhat ve thung tan erawh kum khat hi ni khat emaw tih mai turin chak takin a liam mai thin. Kum 2007 khan Zo rimawi khawvel barakhaihin, Malsawmtluangi Fanai (MS-i) a rawn invawrhchhuak a, a zaiin Zoram a chiah hneh hle. Kum 2008 tawp lam khan mimal nunah harsatna tâwkin, a buai chho map map hle a, zawhna leh inrinsiakna pawh a tam. Rilru paukhauh leh huaisen takin a hun tawng a paltlang a, a khawvel zim ta viau angin lang mah se, a beidawng lo. Kum 10 liam a liam tawh a, hun engemaw chen a reh hnu-ah nizan hmasa khan hetiang hian a a thil tawn langsar zual a sawi. 

Kum10 liam ta chhunga a thil zirchhuah 
"Han sawi mai ngaihna ka van hre lo... Kum sawm liam ta chhunga ka chunga thil thleng zawng zawng te kha ka thatna tur veka Pathian ruat niin ka hria a, ka vui lo. “Chuan, ka chungah engpawh thleng mah se, pawm thiam dan ka hriat pahin, khang zawng zawng khan chhelna min pe niin ka hria. Engpawh ni ila, Pathianah ka inhlan tam pah a, harsatna leh rilruhahna ka neih reng rengin ka tawngtainaah ka thlen hmasa ziah bawk a, Pathian kutah engkim hi ka dah tawp zel." MS-i hian harsatna karah hun hlimawm a tawng zel a, a remchan dan azira zai leh rimawi lamah ke pel zel a tum.

Thursday, December 6, 2018

GUM OB te'n tlachawp takin Masi Music video buatsaih!


Ruahmanna a awm hran lova, tum lawk pawh a awm lo bawk. Phur thutna atanga intan, Gospel United Mizoram (GUM) OB  te Masi music video thar chu tunkar chhung hian zawh hman tum a ni a, an tihchhuah turhi 'Entu Ropui' tih a ni ang.

TKP Shalom Unit, Mission Vengthlang te'n naktuk zan hian GUM OB te hi zai turin an sâwm a, eng hla nge an sak ang, tia ngaihtuahna nasa tak an sen hnu-ah GS Henry Varte te In-ah inhmu khawm-in, Selah hla, 'Light of the Stable' chu an ngiahtuah chhuak a, an lehlin hnu-ah an zirho nghal. Hei hi duhtawk lovin music video siam an tithlu bawk.

OB zinga Vice Chairman Vanlalsailova erawh Malaysia lam-ah rawngbawl a thangbo avangin a tel thei dawn lo. Foster recording kutchhuak a ni dawn a, music video hi Sreenfirm production niiin, karthar lam hian thlir theih beisei a ni.

Monday, December 3, 2018

Nunu-i'n khiangawi ta!


Kum 2000 chho vela Zo rimawi khawvela a 'Aw' ngaihnobei leh hipna dangdai vanga tla na tak leh a nunze mawi tak vanga hriathlawh ni bawk, VL Neihthangi (Nunui) chuan khiang a awi ta a, December 1, 2018 khan Francisco Lalhmangaiha Punte chu Kulikawn a, Christ the King Cathedral-ah 'Tiam Tlat E' a tihpui ta. 


Engtia intawng nge in nih le?
Nunui:
Kum 2015 kha a ni a, a tirah chuan WhatsApp group-a fiamthu huang pakhatah kan awm hova, a hran a hriatna ka nei chuang lo. Dangpuithu chungchang te kan sawi a, tui ka tih thu te a lo lo hria ni ngei tur a ni. A hranpa (Private) a kan inbiak hnu chuan ani lunglei kal khan Tlabung dang-puithu number 1 ngat kha min lo hawn ta ngei a. Chu pawh chu kan inpe lawk lo. Kan va lam ta a ni. (A nui a). Kan inbiak fe hnu chauha inhmu kan ni a, kan inkawm chho ta zel a, inngainatna a lo piang chho ve zel bawk a, kan inngaih-zawn tak chu 2016 kum khan a ni.

A mizia leh i duh em emna chhan?
Nunui:
Mi zakzum lampang a ni a, Aia upa a zahthiam hle. A bula ka awm khan chutianga hmeichhia va khawih tum ang chi ang kha a ni lo. Hun remchang (chance) zawng phet ang kha a ni lo a, a thlamuanthlak thin hle.
 
Pasal neih hi 'Hun' i inti nge, amah nena intawn tâk vanga 'Hun' i tizawk?
Nunui:
Pasal neih chu kan kum ngaihtuah chuan a hun. Mahse, amah tawn tâkah chuan hun ka ti zawk mah.

Sunday, December 2, 2018

ICU-a awm lai pawha fiamthu la thawh thei a ni: Mapuia

Hun tawp lam: A nupui Rohmingsangi leh Mapuia (Zephyr)

Mizorama Drama club hlut hlawh, ngaihvenhlawh leh mipui ngainat ber zinga chhal ngam, Zephyr Drama Club dintute zingami Lalrintluanga Pachuau (Apa Kungtea) chu December 1, 2018, zan dar 10:05 khan Dur-tlang Synod Hospital-a ICU-ah a lei zinkawng a zawh tawp ta. 

Hetiang hian Mapui-a'n a thiantha tak chungchangah inbunruahna a nei:

'Ka dam veleh min rawn hruai dawn nia..'
“A that reng laia kan inhmuh pawhin dam taka a chhuah rin lohna ka nei lian tawh. Nimin piah khan a hmel en khan a hrisel lo tih ka hre tawh. Ka beisei lo, ka rilru a nuam thei lo. Dam lo chungin, ‘ka inhuam a lawm,’ a ti a, shooting nei nei ang kan la ti a, 'Mapui, ka khua a sik a, a remchan veleh ka dam chian veleh min rawn hruai dawn nia aw,' a ti a, chu chu ka inbiak hnuhnun ber a ni ta a ni. 

Fiamthu lungphum phumpuitu
“Apawi ka ti a, ka fiamthu bul\anna, mipui hmâa ka din ang chi hi amah atanga tam tak min kaihruaitu leh fiamthu lungphum min phumpuitu a ni a, ani hnen atangin tam tak hi hriatphah, min zirtir a ni.

A thih thu a hriat veleh
“Kan nunhlui, ka chhuikir nasa hle a, tunhnai lawka programe nei dun leh tur kan nih avangin min nghawng na hle a, hrehawm ka ti a, rilru mumal put pawh a har khawp mai.

A miza leh entawntlâk a nihna
“Ka tluk lohna hi ka sawi duh a, ka tluk lohna key pawh ka sawi duh. Eng harsatna pawh tâwk se, thil reng rengah a ho (Light) leh hlim awmzâwng a la zel thei hi tluk lo ka inti ngawih ngawih. ICU-a a awm chanchin pawh min hrilh a, ‘ICU-ah ka that tawh hnu khan ka bula mite kha an boral a, Doctor-in chhuah a la phal si lova, ICU-a lungphu enna (Heart monitor) te kha ka chhaih nileng thak mai a ni. A chângin ka'n thaw lo der vel a, a inrin te kha a kham pheiin a kal,’  te a ti a, mittui thlaphungin kan la nui. Chutiang khawpin ICU-a awm lai pawhin fiamthu thawh thei kha a ni. A ngaihsanawm ka ti hle. Comedian search-a lo tel tam tak te zingah a nê pawh pha leh tluk an awm lo. By-heart lovin chawplehchilha sawi tur nuihzatthlak deuh deuh hi a hria, tlachawpin a sawi nghal zung zung thei a, mibik a nih zia a hriat hle.

Friday, November 30, 2018

Live Band hi Professional line ang chuan a kal theih loh - Steward, Vocalist (Magdalene)

 “Live Band hi Mizoramah chuan professional line anga han kalpui chu thil theih a ni lo. Eizawnna hrang hrang dap pah kan ni thin a, hei hian hmalak a ti harsa bawk khawp mai. Mahse kan tuina a ni a, keini pawhin kan kalpui reng rih chu a nih hi”. tiin Steward-a, Mizo rock band Magdalene vocalist chuan a sawi.

Steward-a chuan, “Nakina band la rawn din zel tumte tana kan sawi hnawnna lam ni lo se, Mizoramah chuan mihring kan la tlem a, eizawnna atana hman dawn chuan band din hi thil theih a ni rih lo a ni. A chhan chu mi pakhatin eng programme-a emawa a zai hlawhah Rs. 2000/- vel a dawng a, band va inlan ve dawn ila, chutiang vel tho chu kan hlawh a, band pakhatah a tlem berah member 4 vel kan awm thin a, chung mite chuan Rs. 2000 chu kan han insem leh a, chuta tang chuan in hriatthiam mai ka ring,” tiin a sawifiah a ni.

Amaherawhchu ram pawn lam aim chung leh sponsored-tu tha tak an awmte a nih chuan band din chu a tha a tih reng thu a sawi thung. Rawn ding thar leh zel turte tan pawh performance a pawimawh zia sawiin, “Mi hmaa music va tuma zai ringawt tur kan ni lo va, entertainer kan ni tel bawk tih hriat a tha a, kan performance a zir zelte pawh khan kan zai hi a chawi em em a ni,” tiin a Steward hian a sawi bawk.

Tunlai huna live band performance chu a hmuhnawm tawh takzet thu a sawi bawk.

English leh Mizo hla rock music hmanga Pathian fak hi a danglamna vak a hriat loh thu sawi a, “Pathian fakna a ni a, a hrethiam pha deuh chinah phei chuan a danglamna a awm chuang lo. Chubakah helai tak hi mihring kan inan lohna tilangtu chiang tak pakhat a ni,” tiin a sawi bawk.

Source: thlifim

Wednesday, November 28, 2018

"Min Vote rawh u" tih a ngai lo tur: Rosy K. Remsangpuii

Mizo mipuite hian thil dang chiam kan mamawh hmasa lo. Heng thil panga (5) te hi kan mamawh hmasa ber-
* KAWNG THA
* POWER SUPPLY THA
* TUI THA
* BUHFAI &
* GAS HNIANGHNAR.

Heng te hi in todelh ila chu, "Min vote r’u," tih tih ngai lo in mipui hi chu hmin sa kan ni mai.
Thildang min tawktarh thin te hi chu Side Dish ang deuh chauh a ni, tha em em mahse.
Sorkar tha nih hi tun kan Zoram dinhmun rih mek ah hi chuan a har chiam lo mawle..?

Tumkhat Free Wifi hawnna inkhawm ah Mizopa pawimawh tak, nihna sang tak chelh hian milo call a, Host turin min lo sawm a. "Min duh lo ang, kalo Host dawn chuan, hei aia mamawh hmasa hi kan ngah a. Thalai tih tur neilo Wifi a thlawn a hmang duh an lo thu fur anga, a tangkai zawng nilo in, Social media hmang kan pun phah zel ringawt dawn, kan mamawh hmasa ni lo, itawm tle mawi deuh deuh hi mipui leh thalai te min kawhhmuh tawh suh u tiin ka sawi thut mai dawn ania," tiin kan in ngam tlak bawk a kalo chhang a. "Ekhai" tiin an ngam talo a. Ka pawi ti lo hle a. Midang ka kawhhmuh a, kan nui bawk bawk a,  Ka lo hrilh hrim hrim kha ka lawm.

Mahni zawn theuh ah thil dik ah chuan ngawi ral lo ila, pawngpaw mawl tak awmze neilo a nawr pung pung lam ni lo in.

Kan in tih changkan tawh nen hian heng kan nitin mamawh, sawi ngai lo a kan hnianghnar sa na tur kan la au pui reng mai hian kan Ram hmasawnna a than thut zia a lan tir chiang ber mai awm e, ka ti.

Kan hmasawn tum dan hi a ler atang kan thuai thin a, a fuh lo thin hle a ni. A kalh a kim thei lo. Kan harh a hun tawh viau a ni! Ram hi kan ta anih rualin kan ta ani lo, Ram hi Lalpa ta a ni. Kan ta tih rilru kan put leh lutuk na hian duh duh a sawisak theihna dan kan nei emaw kan ti a, Lalpa pawisawina zawk a ni. Kan tawrh a, a pawi zawh hma hian khawngaihin harh ang u.
Lalpa kan Ram, kan Hnam ti dam leh rawh.