Sunday, February 24, 2019

Hriattirna leh Ngenna

Website mumal zawka siam tum a nih avangin tihtawp rih a ni. Chhiartute hriatthiamna kan ngen e.

Sunday, December 23, 2018

LPS ah MZI Christmas Carol hman a ni

MZI Gen Hqrs buatsaih Christmas Carol Service hlimawm tak chu Dec 22, 2018 zan 8 khan hman ani a, Pu David Z Hmar President in Christmas Carol hi hawngin he hunah hian zaithiam hrang hrang te an zai a. Hranghlui zaìthiam K Lalchamliana chuan Christmas thuchah a sawi bakah zaiin mipui a awi bawk a ni. Lalhmachuana Zofa pawhin Christmas thuchah sawiin, Pu Lalengmawia Vice President, MZI Gen Hqrs chuan Christmas cake a  zai a,  OB te he Christmas Cake hi hlim takin an in barh bawk.

Lallawmawma’n Christmas hla thar mawi tak mai rawn chhawpchhuak in, Joseph Zaihmingthanga, Rinhlui Tlumang, R Lallawmsanga, Melody Lalzirliani, Cindy Lalramhlimawmi, Samuel Lalhruaitluanga te bakah Selesih MZI Choir, One in Christ leh MZI Gen Hqrs Choir ten mawi taka Pathian faka zaiin Christmas hla an sa a ni.  Zaihona hun hlimawm tak hman ho niin MZI Choir ten an kaihruai a house band David-a keyboardist niin Pu Rka (3 Brothers Recording Studio neitupa) chu guitarist ani bawk.

He Christmas Carol Service hlimawm tak hi host zei tak Ruth Lalhnehpuii’n hneh taka kaihruai in khamlo taka hman zawh a ni.

Thursday, December 13, 2018

2023 Inthlanpui ah Sailova tan kawng inhawng ang em?

Kum 2013 tir lam khan Vanlalsailova'n politics a thlir dan chipchiar leh candidate ni tura harsatna a neih loh thu te, policy tha leh a hmathlir te tarlan a ni tawh a, chai a hlawh nghal hle.
Ram a vei a, a siamthatna tur te pawh ngun takin a lo zirchiang tawh a, 2023 hian a hmel kan hmu lovang tih a sawi theih loh! Official-in engmah la sawi lo mah se, amah ngaisangtute leh ngainatute bakah Zoram mipui tam takin a lakah beiseina an nei a, hei hi a tlanchhiatsan rin a ni lo.
Inthlanpui lo awm leh turah a hmel kan hmu ta a nih pawhin a mak dawn lova, ram siamthatna fawng chelh tur hian a inpeihna a rei tawh.
Candidate anga a din ngei pawh ring an tam a, a lakah rinna leh beiseina sang tak an nei. Hetiang hian 2018 Mizoram inthlanpuia mipui thlantlin te lawmpuina leh thuchah tawi a sawi:

MLA thlan thar te hnena thuchah
“MLA ni tur a tling thar zawng zawng te, lawmpuina leh duhsakna ka hlan a che u. Mahse, Pathian hian hlawhtling turin min ko lova, rinawm turin min ko tih kan hre dawn a nia. In hlawhtlinna huang ah khan phatsantu leh tichhetu, rawktu leh rutu ni turin thlem i tawk dawn a, i fimkhur a ngai a ni. Pathian leh mipuite'n kan enthla reng dawn che u a, kum 5 leh kum 10 hi a rei lo a nia. I thiltih in lawmman leh lawm loh man a nei dawn a ni. Ram leh hnam, Pathian Lal ram tan duhsakna ka hlan a che u.”

Inbarakhaihna a thlen ring lo!“MNF in, heti em em hian hmâ an hruai ka ring lova, mahse, an san ber chu ka ring sa. Amaherawhchu, sorkarna em chu an siam zawh ka lo ring bik lo a ni. ZPM chu ka lo rin lawk zat ang chiah an tling.
“Congress, heti em em a an chetchhiat hi chu ka lo ring lo deuh. MLA sawm (10) tal an neih ka lo ring deuh bawk. Engpawhnise, mipuite thlan an nih in hria a, fimkhur leh taima apiang an vanneihna a ni a, fimkhur leh taima taka rorel a, hna thawk turin Ram hruaitu thar te ka chah in, ka ngen bawk.”

Tuesday, December 11, 2018

‘Rinawmin Krismas’ thlir theih ta

 PB Sanghlunpuii chuan 'Rinawmin Krismas' tih chu thlir theih turin youtube lamah a phochhuak ta a, John Mawitea leh Mapuii Fanai te nupa phuah hian belhchian a dawl hle.
Tunhmâ zawnga lengzem hla sa thin hian a vawikhatna ni turin Masi hla pangai ni lo, love song kaipha deuh tur a chhawpchhuak a, Zo rimawi khawvel-ah hetiang lam hla hi kan neih tlêm tak a nih avangin a dawnsawn a nuam.
PB-i chuan, "Love song rawngkai Masi hla tak hi a tlêm a, midang te tih-hlim nan ka duh ve hrim hrim bawk avangin Mapuiite nupa ka bia a, anni'n min lo siamsak nghal a, Masi hla ka vawikhat siamna tur a ni," tiin a sawi.
Recording leh Video hi 3 Bro-Sis Audio visual kutchhuak a ni a, Music hi Kima Chhangte a ni thung.

Friday, December 7, 2018

Kum 10 kalta chhunga a chunga thil thlengah vuina nei lo: MS-i Fanai


A khuh hawnna 
Mi thenkhat tan nikhat hi kum sang-khat ang maiin a rei a, thenkhat ve thung tan erawh kum khat hi ni khat emaw tih mai turin chak takin a liam mai thin. Kum 2007 khan Zo rimawi khawvel barakhaihin, Malsawmtluangi Fanai (MS-i) a rawn invawrhchhuak a, a zaiin Zoram a chiah hneh hle. Kum 2008 tawp lam khan mimal nunah harsatna tâwkin, a buai chho map map hle a, zawhna leh inrinsiakna pawh a tam. Rilru paukhauh leh huaisen takin a hun tawng a paltlang a, a khawvel zim ta viau angin lang mah se, a beidawng lo. Kum 10 liam a liam tawh a, hun engemaw chen a reh hnu-ah nizan hmasa khan hetiang hian a a thil tawn langsar zual a sawi. 

Kum10 liam ta chhunga a thil zirchhuah 
"Han sawi mai ngaihna ka van hre lo... Kum sawm liam ta chhunga ka chunga thil thleng zawng zawng te kha ka thatna tur veka Pathian ruat niin ka hria a, ka vui lo. “Chuan, ka chungah engpawh thleng mah se, pawm thiam dan ka hriat pahin, khang zawng zawng khan chhelna min pe niin ka hria. Engpawh ni ila, Pathianah ka inhlan tam pah a, harsatna leh rilruhahna ka neih reng rengin ka tawngtainaah ka thlen hmasa ziah bawk a, Pathian kutah engkim hi ka dah tawp zel." MS-i hian harsatna karah hun hlimawm a tawng zel a, a remchan dan azira zai leh rimawi lamah ke pel zel a tum.

Thursday, December 6, 2018

GUM OB te'n tlachawp takin Masi Music video buatsaih!


Ruahmanna a awm hran lova, tum lawk pawh a awm lo bawk. Phur thutna atanga intan, Gospel United Mizoram (GUM) OB  te Masi music video thar chu tunkar chhung hian zawh hman tum a ni a, an tihchhuah turhi 'Entu Ropui' tih a ni ang.

TKP Shalom Unit, Mission Vengthlang te'n naktuk zan hian GUM OB te hi zai turin an sâwm a, eng hla nge an sak ang, tia ngaihtuahna nasa tak an sen hnu-ah GS Henry Varte te In-ah inhmu khawm-in, Selah hla, 'Light of the Stable' chu an ngiahtuah chhuak a, an lehlin hnu-ah an zirho nghal. Hei hi duhtawk lovin music video siam an tithlu bawk.

OB zinga Vice Chairman Vanlalsailova erawh Malaysia lam-ah rawngbawl a thangbo avangin a tel thei dawn lo. Foster recording kutchhuak a ni dawn a, music video hi Sreenfirm production niiin, karthar lam hian thlir theih beisei a ni.

Monday, December 3, 2018

Nunu-i'n khiangawi ta!


Kum 2000 chho vela Zo rimawi khawvela a 'Aw' ngaihnobei leh hipna dangdai vanga tla na tak leh a nunze mawi tak vanga hriathlawh ni bawk, VL Neihthangi (Nunui) chuan khiang a awi ta a, December 1, 2018 khan Francisco Lalhmangaiha Punte chu Kulikawn a, Christ the King Cathedral-ah 'Tiam Tlat E' a tihpui ta. 


Engtia intawng nge in nih le?
Nunui:
Kum 2015 kha a ni a, a tirah chuan WhatsApp group-a fiamthu huang pakhatah kan awm hova, a hran a hriatna ka nei chuang lo. Dangpuithu chungchang te kan sawi a, tui ka tih thu te a lo lo hria ni ngei tur a ni. A hranpa (Private) a kan inbiak hnu chuan ani lunglei kal khan Tlabung dang-puithu number 1 ngat kha min lo hawn ta ngei a. Chu pawh chu kan inpe lawk lo. Kan va lam ta a ni. (A nui a). Kan inbiak fe hnu chauha inhmu kan ni a, kan inkawm chho ta zel a, inngainatna a lo piang chho ve zel bawk a, kan inngaih-zawn tak chu 2016 kum khan a ni.

A mizia leh i duh em emna chhan?
Nunui:
Mi zakzum lampang a ni a, Aia upa a zahthiam hle. A bula ka awm khan chutianga hmeichhia va khawih tum ang chi ang kha a ni lo. Hun remchang (chance) zawng phet ang kha a ni lo a, a thlamuanthlak thin hle.
 
Pasal neih hi 'Hun' i inti nge, amah nena intawn tâk vanga 'Hun' i tizawk?
Nunui:
Pasal neih chu kan kum ngaihtuah chuan a hun. Mahse, amah tawn tâkah chuan hun ka ti zawk mah.